بیرلشکن ملتلر تشکیلاتی نینگ افغانستان‌ده‌گی نماینده‌لیگی یا ده «یوناما» افغانستان انسانی وضعیتی توغریسیده بیر گزارش نشر قیلدی.
اۉتگن اوچ آی دوامیده‌گی افغانستان‌ده انسانی وضعیت‌نی روایت اېتگن اوشبو گزارش‌ده، بدخشان ولایتیده، طالبان برابریده اهالی نینگ قوزغلانی هم ذکر اېتیلگن.
بو گزارش‌گه اساس، طالبان کوچلری بدخشان ولایتی ارگو، درایم و خاش تومن‌لریده ناراض کیشی‌لر جمله‌سیدن ۱۷ کیشی‌نی اۉلیب و یره‌لنتیرگن.
بو گزارش‌نی بیلدیریشیچه، می آیی نینگ ۳ – سیده درایم اولسواللیگی قرلق منطقه‌سیده ناراضلیک نمایش یۉلگه قۉیگنلر جمله‌سیدن بیر کیشی طالبان تامانیدن اوققه توتیلیب اۉلدیریلگن و ینه بیر کیشی اېسه یره‌لنتیریلگن.
شونینگدېک، بدخشان ولایتی ارگو تومنیده هم ۴ – و ۱۳ – می کونلری، طالبان تامانیدن اوچ کیشی اۉلدیریلیب و ینه ۱۰ کیشی اېسه یره‌لنتیریلگن. بونگه علاوه جون آیی نینگ ۲۶ – کونی خاش اولسواللیگیده طالبان کوچلری آتیشمه‌لری عاقبتیده ایکی ناراض کیشی یره‌لنگن.
عینی حالده، یوناما تامانیدن نشر اېتیلگن گزارش‌گه اساس اۉتگن اوچ آی جریانیده، کمیده ۶۰ مراتبه سابق حکومت کوچلری طالبان تامانیدن توتقین‌گه آلینگن و بو جمله‌دن ۱۰ کیشی هم طالبان تامانیدن کلتک‌لنگن.
اوشبو مدت ایچیده، کمیده بیش سابق حربی کوچلر اۉلدیریلگنی یوناما تامانیدن رویخط‌گه آلینگن.
یوناما گزارش‌نی ینه بیر بۉلیمی، طالبان تامانیدن عامه حضوریده جزالنیش‌لر توغریسیده قره‌تیلگن که بو نهاد اپریل آیی نینگ ۱- سیدن جون آیی نینگ ۳۰ – سیگه قدر، ۱۷۹ کیشی جمله‌دن ۱۴۷ ایرکک، ۲۸ عیال و ۴ باله عامه حضوریده جزالنگنینی رویخط‌گه آلگن.
عیاللرگه قرشی چیکلاولر دوامی جمله‌دن عیاللرنی آی‌لیکلری بیش مینگ افغانی بۉلگنی، شیعه‌لرگه قرشی پارتلش‌لر و قورالی هجوملر دوامی و یېتکرمه‌لرگه قرشی باسیملر یوناما تامانیدن نشر اېتیلگن گزارش نینگ باشقه بۉلیملری دیر.
