افغانستان‌ده انسان حقلرینی تیکشیرووچی نهادلردن بۉلمیش «رواداری» نهادی، افغانستان‌ده میلادی ۲۰۲۴ – ییل باشلنغیچ آلتی آیی جریانیده‌گی انسان حقلری وضعیتی توغریسیده بۉلگن گزارش‌نی نشر قیلدی.
رواداری نهادی تامانیدن نشر اېتیلگن گزارش‌گه اساس، طالبان حاکمیتی دوریده ملی منبع‌لر، فرصت‌لر، امکانیت‌لر همده انسان‌پرورلیک یاردملرده قۉل تاپیش افغانستان برچه وطنداش‌لری اوچون بیرخیل اېمس، بلکیم بو امکانیت‌لر تبعیض اساسیده طالبان تامانیدن ترقه‌تیله‌دی.
عینی حالده، رواداری نهادی اۉزی نینگ گزارشی‌ده طالبان قومی و مذهبی توشینچه‌لری اساسیده، دولتی اداره‌لرده ایشلاوچیلرنی ایش‌گه آلگنی و اولرنی ایش‌دن بوشه‌تگنیدن هم خبر بېرگن.
شونینگدېک رواداری نهادی اوشبو مدت ایچیده طالبان تامانیدن انسان حقلری نقض اېتیلشی اینقسه خاتین-قیزلر برابریده بۉلگن چیکلاولر کۉپه‌یگنیدن خواطر بیلدیرگن.
رواداری نهادی نینگ بیلدیریشیچه، اخیرگی آلتی آی جریانیده، پارتلش‌لر کبی ناتینچ‌لیک واقعه‌لر قربان‌لری رقمی کمه‌یگن بۉلسه‌ده، بیراق طالبان تامانیدن توتقین‌گه آلینیش، جزالنیش، انسان اۉلیمی‌گه باعث بۉلگن کلتک‌لش کبی یانده‌شوولر میلادی ۲۰۲۳ – ییل عینی زمان‌گه نسبتن اوچ برابر کۉپه‌یگن.
