افغانستان‌ده طالبان حاکمیت‌نی قۉلگه آلگنیده اوچ ییل بۉلر ایکن افغانستان خلق‌نی سیاسی تقدیرسیزلیگی همان دوام اېتماقده دیر.
حاضر افغانستان ناملی بیر سیاسی جغرافیه یالغیزگینه آت‌گه قالگن و خلق‌ارا سیاسی جریان‌لرده افغانستان ناملی بیر مملکت غایب و شو باعث افغانستان دنیانینگ اینگ انزواده بۉلگن مملکتلری دن دیر.
طالبان قتتیق یانده‌شوولری بیلن حاضرگه قدر اۉز‌لری هم رسمیت‌گه تَن آلینمه‌گن و افغانستان‌نی بیر مملکت اوله‌راق خلق‌ارا دیپلوماسی‌ده چیقیش اوچون هم یۉل قۉیمه‌گن.
افغانستان بیلن علاقه‌لر یالغیز باشقه مملکت‌لرنی منفعتی اساسیده تعریف‌لنه‌دی، افغانستان‌نی بازارلری کورگن همده اقتصادی منفعت‌لرینی توشینگن مملکت‌لر افغانستان بیلن علاقه قورماقده و بیر تامان‌لنمه منفعت‌لرینی ایزله‌ماقده دیر.
افغانستان خلقی ینه بیربار دنیا هم‌جمعیت‌گه بیر مملکت اوله‌راق قوشیلیشی اوچون دنیا بیلن اۉزینی ماس‌لستیریشی کېره‌ک و دنیا قانون و قاعده‌لر و انسان حقلری کبی ارزش‌لرینی تَن آلیشی درکار، بیراق طالبان اېسه بو نرسه‌لرنی تَن آلمه‌ی اۉز حاکمیت‌لرینی افغانستان خلقی اوستیده دوام بېریب کېلماقده.
طالبان نینگ بو یانده‌شوو و سیاست‌لری دوام اېتر اېکن افغانستان خلقی دنیا سیاستی‌دن اوزاق‌ده قالیشی دواملی بۉلیب قاله‌دی.
