قویاش ۱۴۰۰ – ییل، ۲۴ – اسد و میلادی ۲۰۲۱ – ییل ۱۵ – آگست، افغانستان سابق جمهور باشلیغی محمداشرف غنی افغانستان‌نی ترک اېتگنی آرتیدن، افغانستان پایتختی کابل شهری طالبان قۉلی‌گه توشدی.
بو بیلن افغانستان کمیده ایگیرمه ییل حاکمیت سورگن جمهوریت تیزیمی قوله‌ب، طالبان ینه بیربار افغانستان حاکمیت‌نی قۉلگه آلدی‌لر.
طالبان افغانستان حاکمیتی تیپه‌سیگه کیلر ایکن مملکت‌دن قاچیب چیققن جمهوریت تیزیمیده‌گی افغانستان سیاسی سیمالری و جریان‌لری بو حاکمیت برابریده «مقاومت» سیس‌نی چیقاردی‌لر و حاضرگه قدر کمیده ۱۰ سیاسی و حربی جریان طالبان برابریده تۉخته‌ش مقصد ایجاد اېتیلگن.
طالبان برابریده سابق سیاسی سیمالر تامانیدن ایجاد اېتیلگن سیاسی و حربی جریان‌لر و جبهه‌لر، افغانستان‌نی قوتقریش اوچون ملی مقاومت کېنگشی، عدالت و ایرکین‌لیک حزبی، تینچ‌لیک و عدالت جریانی، افغانستان آزادی جریانی، فدرال خواه‌لر مجمع‌سی، افغانستان وطنداش‌لری جریانی، ملی مقاومت و آزادلیک جبهه‌لری طالبان برابریده مقاومت قیلیش مقصد توزالدی.
بو جریان‌لرنی کۉپینچه‌سی، تشقی اولکه‌لردن آنلاین شکل‌ده ایجاد اېتیلدی و شو باعث افغانستان ایچکریسیده طالبان برابریده اونملی هیچ بیر ایش قیلیش‌گه موفق بۉلالمه‌گن.
اۉتگن اوچ ییل جریانیده طالبان برابریده تۉخته‌گن گروه‌لر داعش، ملی مقاومت جبهه‌سی جنگری‌لر و سابق حربی‌لردن شکل‌لنگن آزادلیک جبهه‌سی دیر که بیراز طالبان برابریده تۉخته‌گن.
ایتیش کېره‌ک که بو جمله‌دن ملی مقاومت نینگ رهبرلری تشقری‌ده ایدی و یالغیز بیر قنچه جنگری‌لری تاغلرده قالیب طالبان برابریده بیراز کوره‌شدی‌لر و شونینگدېک سابق حربی‌لردن شکل‌لنگن آزادلیک جبهه‌سی هم طالبان برابریده تۉخته‌گن مهم حربی جریان دیر.
حاضرگه قدر بو سیاسی و حربی تۉخته‌شلر طالبان حاکمیتی برابریده هیچ قندی بیر اونملی توسیق‌لیک توغدیرگن اېمس و کۉپینچه‌سی سیاسی جریان‌لرنی فعالیت‌لری اجتماعی ترماق‌لر و مجازی ییغیلیش‌لرگه خلاصه بۉلیب قالگن.
