افغانستان تورک عیاللری بیردملیک ترماغی بیر بیانات نشر قیلیب، طالبان تامانیدن بیرلشکن ملتلر تشکیلاتی انسان حقلری مخصوص گزارشگری ریچارد بنت نینگ افغانستانگه سفر قیلیشی تقیقلنیشی و بو حاکمیتنینگ ینگی امر بالمعروف و نهی عن المنکر قانونیدن خواطر بیلدیردی.
افغانستان تورک عیاللری بیردملیک ترماغی اۉزی نینگ بیاناتیده بیلدیریشیچه، طالبان بو قرارلری، افغانستانده انسان حقلری وضعیتی آغیرلشگنیدن حکایت قیلهدی.
شونینگدېک بو بیاناتده، طالبان خاتین-قیزلر برابریده یرهتگن چیکلاولریدن، ناتوغری سیاسی فایدهلنماقده دېب آگاهلنتیریلگن.
افغانستان تورک عیاللری بیردملیک ترماغی، حاضر افغانستانده خاتین-قیزلرگه قرشی بۉلگن چیکلاولرگه علاوه، مذهبی و قومی زورهوانلیکلر همده جبری کوچلنتیریش جدیلشگنینی هم معلوم قیلگن.
افغانستان تورک عیاللری، بیرلشکن ملتلر تشکیلاتی نینگ مخصوص گزارشگری ریچارد بنت تامانیدن بوندن ایلگری تیارلنگن گزارشلر ایریم کمچیلیکلر بیلن بیرگه بۉلگنینی اورغولب، شوندی بۉلسه هم ریچارد بنت نینگ افغانستانگه بۉلگن سفری تقیقلنمسلیگی کېرهک اېدی دېب بیلدیریلگن.
عینی حالده، افغانستان تورک عیاللری بیردملیک ترماغی، خلقارا همجمعیتی اینقسه بیرلشکن ملتلر تشکیلاتی و اسلامی همکارلیکلر تشکیلاتیدن خاتین-قیزلر حقلری اوچون طالبان اوستیده کۉپراق باسیم کېلتیریشلرینی سۉرهگن.
