تخار ولایتیده فعال اۉزبېک ییگیتلردن بیری حامد قرلق، تۉرت کوندن بویان، طالبان یانیده محبوس دیر و حاضرگه قدر اونینگ تقدیری بیللی اېمس.
تخار ولایتیدن محلی منبعلرنی اۉزبېک تیوی گه ایتیشیچه، طالبان اسارتیده بۉلگن بو ییگیت ناانیق تقدیری، عایلهسی تینچلیگینی آلگن و بو عایله برچه اعضاسی خواطرده دیر.
ایتیلیشیچه حاضرگه قدر حامد قرلق، طالبان قیسی ادارهسیده و قندی احوالده بۉلگنی بیللی اېمس.
حامد قرلق کیم اېدی؟
تخار ولایتی نینگ دشت قلعه اولسواللیگیده مدنی ایشلر بیلن شغللنیب کېلگن حامد قرلق بو منطقه نینگ فعال ییگیتلریدن دیر.
ایتیلیشیچه حامد قرلق هیچ بیر سیاسی تامان بیلن علاقهسی یۉق و اونینگ کۉپینچه فعالیتی بالهلرگه اۉقیش زمینهسی یرهتیلیشی و عایلهلرنی ایش بیلن تامینلش اوچون قرهتیلگن دیر.
قرلق اۉزی نینگ فعالیتلری همده اۉزبېک مدنیتنی قولب-قوتلش مقصد اجتماعی صحیفهلر اینقسه فیسبوک صحیفهسیده فعال حضوری بار اېدی.
حامد قرلق بو فعالیتلری دوامیده، تخار ولایتی نینگ دشت قلعه اولسواللیگیده قالین ایشلب چیقاریش ایشخانهسینی توزاتیب، بیر نیچه کیشی اوچون ایش زمینهسینی یرهتگن.
شونینگدېک تخارلیک بو مدنی فعال، اخیرگی وقتلر ایچیده ناتانیش شخصلر تامانیدن آلاو بېریلگن «انجنیر حامدالله شهید» ناملی مکتب بناسینی قیته قوریش اوچون اولگوریب و یاردم ییغیش آرقهلی بو مکتب بناسینی قیته توزاتکن.
حامد قرلق نیمه اوچون محبوس بۉلگن؟
اۉزبېک تیوی اختیاریده قوییلگن معلوماتلرگه کۉره، تخارلیک فعال ییگیت حامد قرلق نینگ طالبان تامانیدن محبوس اېتیلیشی، بو ییگیت نینگ «انجنیر حامدالله شهید» ناملی مکتب بناسی قیته قوریلیشی اوچون قوشگنی فعال حصهسیگه باغلیق دیر.
طالبان بو ییگیتنی قۉلگه آلیب، اوندن بو مکتبنی توزاتیشی همده مکتب توزاتیلیشی خرهجتلری قییردن کېلیشی اوچون سوراغ آستیده آلگن.
ایتیش کېرهک که حامد قرلق تدبیری بیلن باشلهنگن بو مکتب بناسی ۹۵ فایز قیته قوریلگن و بو مکتب بناسی آچیلیشی مقصد بیر احتفال هم اۉتگن چهارشنبه کونی ریجهلشتیریلگن اېکن. بیراق قرلق محبوس بۉلگنی باعث بو احتفال اۉتکزیلمهی قالگن.
