یقین شرق منطقه‌سی هر دایم جدی بحران‌لر و قانلی اوروش و تۉقنه‌شوولرنی باش‌دن کېچیرگن و اخیرگی ییللر ایچیده هم غزه، لبنان و یمن‌ده‌گی اوروش‌لر باعث بو منطقه، دنیاده‌گی کتته بحرانی منطقه‌گه اَیله‌نگن.
یقین شرق‌ده‌گی اوشبو وضعیت بوتونله‌ی یکونلنمه‌گن بیر حالده، اخیرگی کونلر ایچیده سوریه‌ده ینه بیربار ایچکی اوروش‌لر باشله‌نگن.
سوریه‌ده ایریم مملکتلر تامانیدن قولب-قوتلنگن قورالی گروه‌لر بو مملکت نینگ روسیه و ایران تامانیدن حمایه بۉلگن جمهور باشلیغی بشار اسدگه قرشی ینه توریب، تیزلیک بیلن سوریه نینگ مهم شهری بۉلمیش حلب شهری باشقیرووینی قۉلگه آلدی‌لر.
ایتیش کېره‌ک که سوریه ینه بیربار قانلی اوروش‌لرگه تامان تارتیلگن و بو مملکت نینگ ایچکی اوروشی بۉلیشی‌گه قره‌مسدن بو ییرده منطقه و دنیا کوچلری بیر بیراوی بیلن اوروشه‌دی.
ایلگری‌ده هم سوریه ایچکی اوروشیده، تورکیه و عرب مملکتلری بشاراسدگه قرشی اېدی و بو تامان روسیه و ایران بشار اسددن حمایه قیلر اېدی. سوریه نینگ اوروشی هم اېسه انه‌شوو محورده ایلگری آلیب باریله‌دی.
بو بیلن ایتیش ممکن که سوریه‌ده‌گی اوروش کۉپینچه منطقه و دنیا کوچلری نینگ اوروشی دیر و اولر اۉز نفوذلری و کوچلرینی سوریه میدانیده سیناوده آلماقده.
بو یازووده سوریه‌ده باشله‌نگن اوروش‌نی و بو اوروش تامان‌لری حقیده بیراز بیلگی بېریش‌گه اولگورگن‌میز.
بشاراسدگه قرشی تورگن گروه‌لر بیلن تانیشیش
اخیرگی وقتلر ایچیده، سوریه‌ده بشار اسدگه قرشی کوره‌ش اوچون اونینگ حاکمیت‌گه قرشی بۉلگن کمیده ۱۲ قورالی و اسلامگرا گروه‌لر بیرله‌شگنی خبر قیلینگن اېدی.
بو گروه‌لردن اینگ مهمی، جیش المجاهدین، تحریر شام، جیش عزت، جیش نصر، ادلب الحر، جبهه شام، گروه فاستقم کما امرت، سوریه نینگ آزادلیک گروهی و فیلق الشام گروهلریدن عبارت دیر.
مذکور گروه‌لرنی ایچیده اینگ مهمی تحریر شام گروهی دیر که بو گروه ایریم سبب‌لر باعث بشار اسدگه قرشی مهم و کوچلی گروه تانیله‌دی و حتا بو گروه تورکیه تامانیدن قولب-قوتلنیشی هم گمان اېتیله‌دی.
طالبان بیلن بیر خیل بۉلگنی اَیتیلگن تحریر شام
بو گروه داعش و سوریه‌ده بشار اسد حاکمیتی‌گه قرشی چیققن مهم گروه تانیله‌دی.
بو گروه ایلگری القاعده گروهی نینگ بیر بولیمی اېدی و انه‌شوو سبب افغانستان طالبانی بو گروه بیلن قیزیققنی گمان اېتیله‌دی. شونینگدېک مذکور گروه بیلن طالبان نینگ بیراق‌لری هم بیر دیر.
بونگه قوشیمچه تحریر شام گروهی اۉزی نینگ حاکمیتی اینقسه ادلب شهریده بۉلگن حاکمیتی عملگه آشیرگن سیاست‌لری طالبان نینگ سیاست‌لری و یانده‌شوولری بیلن بیرخیل اېکنی معلوم قیلینیب کېلماقده دیر.
سوریه‌ده نیمه اوچون حاضر اوروش باشلندی.
سوریه مملکتی نینگ کۉپلب ییللیک ایچکی اوروش‌لری میلادی، ۲۰۱۶ – ییلی یکونلنگن اېدی و بو اوروش‌لرده روسیه و ایران حمایه‌سی بیلن غالب چیققن بشار اسد، ۲۰۱۶ – ییل‌دن کیین سوریه نینگ یکه حاکمی بۉلیب و بو مملکت‌ده حاکمیتی‌گه دوام بېریب کېلماقده اېدی و حاضر هم بو حاکمیت ینگی چالش‌لر بیلن دوامی بار.
بیراق حاضر اخیرگی کونلر ایچیده قورالی گروه‌لر قوزغلانی، بشار اسد حاکمیتی نینگ ینه بیربار توسیق‌لیککه تامان تارتگن.
سوریه‌ده قورالی گروه‌لر قوزغلانی‌گه نیچه سبب بارلیگی اَیتیله‌دی:
اوکراین و یقین شرق اوروش‌لری: ایسلب اوتیلگندیک سوریه‌ده بشار اسد حاکمیتی، روسیه هوایی کوچلری و ایران حربی‌لری و لبنان حزب الله‌سی کبی نیابتی گروه‌لری حمایه‌سی بیلن، دوام اېتیب کېلماقده اېدی و حاضر اېسه روسیه نینگ اوکراین اوروشیده‌گی بندلیگی و ایران و حزب الله گروهی نینگ اسراییل بیلن بۉلگن تۉقنه‌شوولری باعث، بشار اسد ایران و روسیه حمایه‌سینی هیچ بۉلمسه، وقتینچهلیک قۉلدن بېرگن. انه‌شوو سبب اسدگه قرشی گروه‌لر ینه بیربار میدان‌گه کېلدی.
بشار اسد بیلن تورکیه دشمن‌لیگی: سوریه‌ده ایچکی اوروش باشله‌نیشی اوچون تورکیه مملکتی نینگ قۉلی بارلیگی هم گمان اېتیله‌دی. چونکه تورکیه مملکتی سوریه‌ده حربی حضوری بۉلگنی یانیده، بو مملکت ایریم قورالی گروهلریدن هم حمایه قیله‌دی.
تورکیه بو بیلن سوریه‌ده بشار اسد حاکمیتی یکونلنیشی و بو مملکتده‌گی کُردلرگه قرشی کوره‌شماقده دیر. اوشبو قرمه-قرشی‌لیک دوامیده اخیرگی آی‌لر ایچیده، تورکیه جمهور باشلیغی رجب طیب اردوغان بشار اسد بیلن مذاکره اۉتکزیش و علاقه قوریش‌گه قیزیققنینی اعلام قیلگن اېدی. بیراق اردوغان نینگ بو تینچ‌لیک پیامی بشاراسد تامانیدن یخشی کوتیب آلینمه‌دی، انه‌شوو سبب اردوغان فرصت‌دن فایده‌لنیب، ینه گروه‌لرنی حمایه قیلیب سوریه‌ده اوروش‌نی باشلهگنی هم گمان اېتیله‌دی.
ایتیش کېره‌ک که سوریه‌ده، تورکیه حمایه‌سیده بۉلگن گروه‌لر میلادی ۲۰۱۶ – ییلی ایران و روسیه حمایه‌سیده بۉلگن بشار اسدگه قرشی مغلوب بۉلگن اېدی و بو مغلوبیت تورکیه و اردوغان‌نی اچچیق‌لنتیرگن اېدی.
اسدگه قرشی گروه‌لر آره‌سیده‌گی کیلیشماوچیلیک
سوریه‌ده بشار اسد حاکمیتی برابریده اوروشیش مقصد ترورچی، اسلامگرا و قورالی کوچلر آره‌سیده اتفاق تشکیل اېتیلگن بۉلسه هم، بیراق بو گروه‌لر اۉز ارا هم هردایم اوروشیب کېلگن.
بو گروه‌لرنی آره‌سیده ایدیولوژی و سیاسی جدی فرق‌لر بار و بونگه قوشیمچه بو گروه‌لر هر بیرینی هر بیر مملکت یا ده جریان حمایه قیله‌دی.
انه‌شوو سیزیلگن اتفاق‌سیزلیکلر باعث، بشار اسدگه قرشی بۉلگن گروه‌لر بو حاکمیت‌نی مغلوب قیلیب، بیرگه‌لیکده بیر تیزیم قوریش‌لری بیراز قییند کۉرینه‌دی.
