بیر قنچه افغانستانلیک اینقسه اۉزبېک فعاللر، ایکس/سابق تویتر صحیفهسیده «هشتک» یازیب، تخارلیک فعال حامد قرلق آزاد اېتیلیشینی سۉرهدیلر.
افغانستان سابق حکومتی رسمیلری و اۉزبېک فعاللردن بۉلگن فریدون الهام، یونس بیک، نقیب تاتار، نثاراحمد نبیزاده مویتن اۉغلو و شونگه اوخشش باشقه بیر قنچه کیشیلر بو دادخواهلیککه قوشیلگن.
باشقه بیر تاماندن نیلوفر نعیمی، رودابه بلخی و فاطمه اعتمادی کبی باشقه فعاللر هم اۉز ایکس صحیفهلریده، تخارلیک اۉزبېک فعال حامد قرلق آزاد اېتیلیشینی طلب قیلگنلر.
بو فعاللر جملهسیدن نثاراحمد نبیزاده مویتن اۉغلو نینگ یازیشیچه “تخارلیک فعال حامد قرلق، یانغینده بوزیلگن بیر مکتب بناسینی قیته قوردی، ساغلیق خذمتلریگه قۉل تاپیش اوچون بیر کلینیک ایجاد قیلدی و قالین توقیش زمینهسینی یرهتیش بیلن عیاللرنی ایش بیلن تامینلهدی، حاضر بیر آیدن کۉپراق بۉلهدی که بو فعال مذکور فداکارلیکلری باعث ناقانونی حالده طالبان تامانیدن توتقینگه آلینگن.”
مذکور فعاللر حامد قرلق طالبان قماقخانهسیده آغیر ساغلیق احوالده ایکنینی ایسلب، خلقارا انسان حقلری تشکیلاتلریدن بو فعال تقدیری خصوصیده دقت قیلیشلرینی سۉرهگن.
دېیرلی حامد قرلق عقرب آیی نینگ ۲۳ –سیدن بویان، طالبان قماقخانهسیده دیر. بیراق حاضرگه قدر بو فعال تقدیری انیق بیللی اېمس.
