طالبان میلادی ۲۰۲۴ – ییل یکونیده، بو ییل دوامیده تورلی ساحهلر یوتوقلرگه قۉل تاپکنینی ادعا قیلدی.
طالبان سۉزلاوچیسی اۉرین باسری حمدالله فطرت تامانیدن یېتکیرمهلر اختیاریده قوییلگن معلوماتلرگه کۉره، طالبان میلادی ۲۰۲۴ – ییل دوامیده، سیاست، اقتصاد، خوفسیزلیک و ترانزیت ساحهلریده کتته یوتوقلرگه قۉل تاپکن.
طالبان نینگ اعلام قیلیشیچه، بو ییل دوامیده اورته آسیا، چین، آذربایجان مملکتلری شامل بیر قنجه مملکتلر بیلن علاقهلری یخشیلنگن.
حمدالله فطرت بو حقده یېتکیرمهلرگه ایتیشیچه ” سیاسی و دیپلوماتیک ساحهده کتته یوتوقلرگه قۉل تاپدیک. چین، بیرلشکن عرب امیرلیگی، آذربایجان، اۉزبېکستان، ترکمنستان، قزاقستان، روسیه و شونگه اوخشش باشقه بیر قنچه مملکتلر بیلن علاقهلر یوقاری درجهده یخشیلندی. روسیه شامل بیر قنچه مملکتلر اسلامی امارتنی قاره رویخطیدن چیقاردی.
طالبان اۉزبېکستان باش وزیری عبدالله عارف و روسیه ملی خوفسیزلیک کېنگشی نینگ مصلحتچیسی سرگی شویگو باشچیلیگیدهگی هیاتلرنی کابلگه سفر قیلیشینی هم، میلادی ۲۰۲۴ – ییل دوامیدهگی کتته یوتوقلریدن بیان قیلدی.
عینی حالده طالبان نینگ ادعا قیلیشیچه، مذکور ییل دوامیده ناتینچلیک واقعهلر سانی هم سیزیلرلی درجهده آزهیب، خوفسیزلیک یخشیلب تامینلنگن. بیراق بیرلشکن ملتلر تشکیلاتی بو ییل ایچیده ناتینچلیک واقعهلر سانی کۉپهیگنیدن خبر بېرگن اېدی.
طالبان شوندی بیرحالده تورلی ساحهلرده یوتوقلرگه قۉل تاپکنیدن خبر بېرماقده دیر که حاضر بو حاکمیت خلقارا همجمعیتی تامانیدن رسمی تَن آلینمهگن و اقتصادی ساحهده هم، افغانستان جمعیتی جملهسیدن کمیده ۲۳ میلیونی، انسانپرورلیک یاردملرگه محتاج دیر.
