میلادی ۲۰۲۴ – ییل دوامیده دنیا تورلی مملکتلری و منطقهلری، جدی اوزگریشلر و واقعهلرگه گواه اېدی.
بو ییل جریانیده دنیا گواه بۉلیب تورگن اوکراین و غزه اوروشلری دوام اېتیب تورگن بیرحالده، بو ییلده باشقه ایریم منطقهلرده هم اوروش و تۉقنهشوولر باشلنیب و دوام اېتدی.
شونینگدېک بو ییل سیلاولر ییلی اېدی و دنیا جمعیتیدن یریمیگه یقینی سیلاولرگه قتنهشیب آواز بېردی. شونینگدېک بو ییل ایچیده بیر قنچه حکومتلرهم اۉز قانونی نهاییسیگه ییتیشمهی قولهشگه یوز کېلتیردی.
دیمک بو گزارشده میلادی ۲۰۲۴ – ییل، دنیا گواه بۉلگن مهم اوزگریشلر و واقعهلرنی بیرگهلیکده تیکشیرماقدهمیز.
سیلاولر ییلی
میلادی ۲۰۲۴ – ییلی باشلهنیشی بیلن خلقارا یېتکیرمهلر بو ییلنی «سیلاولر ییلی» دېب آت قویگن اېدی. چونکه بو ییل جریانیده دنیا اۉنلرچه مملکتیده جمهورلیک ریاست و پارلمانی سیلاولر اۉتکزیلیشی ریجهلشتیریلگن اېدی.
رسمی معلوماتلرگه کۉره، بو ییل دوامیده کمیده ۶۴ مملکت یشاوچیسی بۉلمیش دنیا جمعیتی جملهسیدن، ۴۹ فایزگه یقین انسان سیلاولرگه قتنهشیب آواز بېرگن.
میلادی ۲۰۲۴ – ییل دنیاده اۉتکزیلگن مهم سیلاولر قوییدهگی سیلاولردن عبارت اېدی:
- امریکا جمهورلیک ریاست سیلاوی
- روسیه جمهورلیک ریاست سیلاوی
- بریتانیا عالی کېنگش سیلاوی
- اۉزبېکستان پارلمانی سیلاوی
- ایران جمهورلیک ریاست سیلاوی
- پاکستان سیلاوی
- هندوستان سیلاوی
- آذربایجان سیلاوی
- مغولستان سیلاوی
- بنگلهدیش سیلاوی
- جنوبی کوریا سیلاوی
- شمالی کوریا پارلمانی سیلاوی
- اندونیزیا سیلاوی
- اروپا اتفاقی پارلمانی سیلاوی
- تایوان سیلاو
شونگه اوخشش باشقه بیر قنچه مملکتلر، اینقسه افریقا قارهسیده جایلهشگن مملکتلردن بیر قنچهسیده، اهالی سیلاولرگه قتنهشیب، اولکهلری کیلهجگی اوچون اۉز آوازلرینی ایشلهتدیلر.
میلادی ۲۰۲۴ – ییلده اۉتکزیلگن سیلاولر ایچیده، بیر نیچه مملکت سیلاوی، کۉپلب مناسبتلر بیلن بیرگه بۉلیب و دنیا تامانیدن کوزهتیلدی.
امریکا جمهورلیک ریاست سیلاوی: میلادی ۲۰۲۴ – ییلدهگی امریکا جمهورلیک ریاست سیلاویده حاکم حزب بۉلمیش «دیموکرات» حزبی بیلن جمهوری خواهلر رقابت قیلدی. بو سیلاو نتیجهسیده جمهوریخواه حزبی نینگ نامزدی امریکا سابق جمهور باشلیغی دونالد ترامپ ینه بیربار آقسرایگه یۉل تاپیشی انیقلندی. امریکا نینگ دنیاده بۉلگن نفوذی و دنیانینگ اینگ کوچلی مملکتی بۉلگنی و شونینگدېک غزه و اوکراین اوروشلری تقدیری امریکا سیاسی احوالیگه باغلیق بۉلگنی اوچون، بو سیلاو نتیجهسی دنیا کۉپلب مملکتلری اوچون مهم اېدی و کوزهتیلدی.
تایوان سیلاوی: میلادی ۲۰۲۴ – ییل نینگ باشلهنیشیده اۉتکزیلگن بو سیلاو، امریکا قوشمه ایالتلری و چین آرهسیدهگی جنجللر باعث مهم سیلاولردن بیری اېدی. بو سیلاوده امریکا و چین بیلن یقین ایکی پارتیه رقابت قیلدی که نهایت امریکا بیلن همسو بۉلگن پارتیه سیلاو غالبی چیقدی.
پاکستان سیلاوی: پاکستان مملکتی جدی سیاسی و خوفسیزلیک ترتیبسیزلیکلرنی باشدن کیچیریب تورگن بیرحالده سیلاو اۉتکزدی که بو سیلاوده، پاکستان سابق باش وزیری و حاضرده قماقده سقلهنیب کېلهیاتکن عمران خان رهبرلیگیده بۉلگن «تحریک انصاف» حزبیگه قرشی مسلم لیگ و خلق پارتیهسی بیرگه لیکده رقابت قیلدی که نهایت بو ایکی حزب بیرگه حکومت قوردیلر. البته سیلاو نتیجهسی جدی ناراضلیکلرگه هم سبب بۉلدی. شو باعث بو مملکت سیلاوی دنیا تامانیدن جدی کوزهتیلدی.
خوفسیزلیک احوال
میلادی ۲۰۲۴ – ییل باشلهنگنیده دنیا گواه بۉلیب تورگن ایکی ییریک اوروش؛ اوکراینده روسیه و بو مملکت آرهسیدهگی اوروش و غزهده اسراییل و حماس آرهسیدهگی اوروش دوام اېتماقده اېدی.
بو اوروشلرگه قوشیمچه، میلادی ۲۰۲۴ – ییل دوامیده دنیا باشقه بیر قنچه منطقهلری هم اوروشلرگه گواه اېدی که بو اوروشلر اسراییل بیلن لبنان حزب اللهسی و ایران بیلن اسراییل همده سوریه ایچکی اوروشلری و قیزیل دینگیزدهگی تارتیشوولر اېدی.
حاضر، غزه و اوکراین اوروشیدن باشقه، بو اوروشلر تۉختهتیلگن بۉلسه هم بیراق، ایران بیلن اسراییل آرهسیده تۉقنهشوو یوز بېریشی و قیزیل دینگیزده حوثیلرنی اوروشی ینهده یوز بېریشی آگاهلنتیریلیب کېلماقده دیر.
داعش تهدیدی
میلادی ۲۰۲۴ – ییلی دوام اېتگن اوروشلر یانیده داعش گروهی هم تهدیدی خواطرلی بیرحالده مملکتلر تامانیدن تیلگه آلیندی. بو گروه تهدیدی روسیه پایتختی مسکو شهری اطرافیده اۉیوشتیریلگن هجومدن کیین جدی توتیلدی.
میلادی ۲۰۲۴ – ییل مارچ آیی نینگ ۲۲ – کیچهسی یوز بېرگن مسکودهگی بو هجوم عاقبتیده، کمیده ۱۳۰ کیشی جان بېردی و کۉپلب کیشی هم یرهلندی. بو هجوم آرتیدن مملکتلر داعش تهدیدینی جدی توتیب یالغیز تورکیه مملکتی مینگلرچه کیشینی داعش اعضالیگیگه عیبلب اوشلهدی.
شونینگدېک میلادی ۲۰۲۴ –ییلدهگی مهم سپورت واقعهسی بۉلمیش «پاریس ۲۰۲۴ المپیک اۉیینلری» هم داعش تهدیدی خواطری آستیده اۉتکزیلدی.
بو ییل ایچیده انقراضگه اوچرهگن حکومتلر
میلادی ۲۰۲۴ – ییل دنیاده بیر قنچه حکومتلر قولهشی بیلن هم بیرگه اېدی که قوییده بو حکومتلردن ایسلب اوتهمیز.
جنوبی کوریا: میلادی ۲۰۲۴ – ییل یکونلریده جنوبی کوریاده یون سوک یول ییتکچیلیگیده بۉلگن حکومت قولهدی. بو وضعیت یون سوک یول تامانیدن دسمبر آیی نینگ ۳ – کونی حربی حکومت اعلام اېتیلگندن کیین باشلندی و جنوبی کوریا پارلمانی، یون سوک یولنی کمیده ایکی مراتبه استیضاح قیلیب قدرتدن چیکلنتیردی و حاضر بو کیشی حبسگه آلینیشی هم حکم قیلینگن.
سوریه: میلادی ۲۰۲۴ – ییل اخیرگی آییده یوز بېرگن سوریهدهگی اوزگریش دنیا آرقهلی کوزهتیلگن ییل نینگ اینگ مهم وضعیتلریدن بیری اېدی. بو مملکتده اسد عایلهسی نینگ حکومتی کمیده یریم عصرلیک حکومتی جدی قورالی قرشیلیکلرگه یوز کېلتیریب، نهایت بشار اسد قاچیب چیقیشی بیلن قولهدی و تحریرشام باشچیلیگیده بۉلگن عصیانچی گروهلر سوریه حکومتنی قۉلگه آلدیلر.
بنگلهدیش: بنگله دیش مملکتیده هم شیخ حسینه باشچیلیگیده حکومت میلادی ۲۰۲۴ – ییل آگست آیی نینگ ۵ – کونی طلبهلر تامانیدن باشلنگن ناراضلیکلردن کیین قولهدی و شیخ حسینه اوشبو کون بیر تیک اوچر آرقهلی هندوستانگه قاچیب کېتدی.
ایران: ایرانده هم بو مملکت سابق جمهور باشلیغی ابراهیم رییسی میلادی ۲۰۲۴ – ییل ۱۹ – می کونی اوچاغی قولهشی سبب عالمدن اوتدی و حکومتی قانونی وقتیده ییتیشمهی قولهدی. کیین سیلاو نتیجهسیده بو مملکتده ابراهیم رییسی پارتیهسیگه قرشی، «اصلاحطلبلر» پارتیهسیدن بۉلگن مسعود پزشکیان ییتکچیلیگیدهگی حکومت اۉرتهگه کېلدی.
ایتیش کېرهک که بو ییل جریانیده، حماس سیاسی رهبرلری اسماعیل هنیه، یحی سنوار و لبنان حزب اللهسی رهبرلری جملهدن بو حزب باش کاتبی حسن نصرالله اسراییل تامانیدن اۉلدیریلگنی، کۉپلب مناسبتلرگه باعث بۉلگن واقعهلردن اېدی.
