میلادی ۲۰۲۳ – ییل اکتبر آیی نینگ ۷ – کونی، حماس نینگ اسراییل‌گه قرشی هجومی آرتیدن باشله‌نگن غزه اوروشی، قانلی و اۉلیملی بیرحالده دوام اېتماقده دیر.
گزارش‌لرگه کۉره، حاضرگه قدر اوروش عاقبتیده اهالی جان بېرگنی و بدرغه بۉلگنی باعث، غزه شهری نینگ جمعیتی کمیده آلتی فایز آزهیگن و بو قربانلیکلر اچینرلی بیرحالده دوام اېتیب کېلماقده.
دنیانینگ ایکی قسمت‌گه بۉلیب و اوندن مملکتلر و انسان‌لر بیر قسمی حماس و بیر قسمی اېسه اسراییل نینگ قوللب-قوتلب کېله‌یاتکن بو اوروش، دنیا مملکتلرینی هم خودی شوندی ایکی تامان‌گه اجره‌تیب قۉیگن.
غزه اوروشی باشله‌نگنیدن کیین بو اوروش‌گه نقطه قوییش اوچون خلق‌ارا سعی‌وحرکتلر هم دوام اېتکن، بیراق حاضرگه قدر بو سعی‌وحرکتلر اوروش یکونلنیشی اوچون نتیجه‌سیز قالماقده دیر.
غزه‌ده آتیش-کېسین برقرار اېتیلیشی مقصد بۉلگن خلق‌ارا اینتیلیش‌لر، امریکا قوشمه ایالتلریده دونالد ترامپ جمهور باشلیغ بۉلگنیدن بویان ینگی بیر باسقیچ‌ده کېلگن. چونکه ترامپ آنت ایچیش مراسمی‌گه قدر بو اوروش تقدیری بیللی بۉلیشینی اورغوله‌گن.
بو مساله‌نی نظرگه توتگن حالده، غزه اوروشی یکونلنیشی مقصد بۉلگن بو سعی‌وحرکتلر قیسی احوالده بۉلگنی و کیله‌جکده قندی بیر احوال‌نی کوتیش ممکن‌لیگی حقیده بو یازوو بیر نظر تشله‌گن‌میز.
ترامپ جدیتی
خلق‌ارا یېتکیرمه‌لرنی گزارش بیریشیچه، امریکا قوشمه ایالتلری نینگ جمهور باشلیغی دونالد ترامپ، غزه اوروشی یکونلنیشی اوچون اینتیلیش‌لر جدی‌لنیشینی تاکید قیلگن و ترامپ بو حقده زمان هم تعیین قیلگن.
گزارش‌لرگه کۉره، ترامپ آنت-ایچیش مراسمی که کیله‌سی بیر هفتهگه قدر اۉتکزیلیشی کوتیله‌دی، حماس گروهیگه فرصت بېرگن که اسراییل‌لیک اسیرلرنی آزاد قیلیب، آتیش-کېسین اوچون یۉل آچسه. بۉلمه‌گن تقدیرده یقین شرق منطقه‌سی جهنم‌گه اَیله‌نیشینی بیلدیرگن.
ترامپ نینگ بو جدیت‌نی نظرگه توتکن حالده، امریکا ینگی جمهور باشلیغی آق‌سرای‌گه کېلیشی بیلن غزه اوروشی تقدیری بوتونله‌ی اوزگریشی ممکن‌لیگی گمان‌دن تشقری اېمس. اوشبو جدیت اوچون‌می حاضر یېتکیرمه‌لر قطر مملکتیده باشله‌نگن مذاکره‌لر نتیجه‌لریدن خبر بېرماقده دیر.
غزه‌ده آتیش-کېسین مقصد بۉلگن مذاکره‌لر قیسی احوالده دیر؟
غزه اوروشی تقدیری خصوصیده بۉلگن آتیش-کېسین مذاکره‌لری، امریکا قوشمه ایالتلری، مصر و قطر مملکتری واسطهچیلیگیده دوام اېتماقده دیر و بو مذاکره‌لر نتیجه‌سیده قۉلگه کېلگن آتیش-کېسین ریجه‌سی دوشنبه کونی ۲۴ – جدی اوروش ایکی تامانی بۉلمیش، اسراییل و حماسگه تاپشیریلگن.
قطر آرقه‌لی اسراییل و حماس اختیاریده قۉییلگن بو ریجه حقیده آرتیقچه تفصیلات نشر اېتیلگن اېمس، بیراق ایریم یېتکیرمه‌لر بو ریجه‌گه اساس کېله‌سی ۲۴ ساعت‌گه قدر آتیش-کېسین قراری اعلام اېتیلیشی کېره‌ک دېب گزارش بېرماقده دیر.
بو ریجه قنچه‌لیک اونملی بۉلگنی و اونگه اساس آتیش-کېسین اۉرته‌گه کېلیب و قنچه‌لیک برقرار قالیشی کېله‌سی ساعت‌لر و کونلر ایچیده بیللی بۉلهدی.
ایتیش کېره‌ک که بوندن ایلگری هم اسراییل و حماس گروهی تامانیدن آتیش-کېسین ریجه‌لری رد اېتیلگن و حتا امریکا قوشمه ایالتلری تامانیدن تیارلنگن ریجه هم عملگه آشیریلگن اېمس.
اسراییل و حماس نینگ شرط و شرایطلری
حاضرگه قدر اسراییل حماس نینگ آتیش-کېسین مدتی، حماس اسیرلری آزاد اېتیلیشی و شونگه اوخشش باشقه بیر قنچه مساله‌لر تۉغریسیدهگی فرق‌لی فکر و ملاحظه‌لری، آتیش-کېسین مقصد بۉلگن ریجهلر عملگه آشیریلمسلیگیگه سبب بۉلگن.
حاضر آتیش-کېسین مقصد بۉلگن ینگی اینتیلیش‌لرگه هم بیر قنچه اختلاف‌لر تیلگه آلینماقده دیر. بو اختلاف‌لر قوییدهگی مساله‌لردن عبارت دیر.
حائل منطقه‌سی: خلق‌ارا یېتکیرمه‌لر تامانیدن نشر اېتیلگن گزارش‌لرگه کۉره، اسراییل و حماس آره‌سیده حائل منطقه‌سی قنچه بۉلیشی تۉغریسیده فرق‌لی فکر و ملاحظه‌لری بار دیر.
اسراییل غزه ایچیده ۲۰۰۰ مترلیک حائل منطقه‌سی ایجاد اېتیلیشینی طلب قیله‌دی. حال بو که حماس بو منطقه ۳۰۰ الی ۵۰۰ بۉلیشی‌گه تاکید قیلماقده دیر.
آتیش-کېسین مدتی: آتیش-کېسین قیسی زمان‌گه قدر بۉلیشی هم حاضرگه قدر کیلیشیلمه‌گن مساله‌لردن بیرته‌سی بۉلگنی اَیتیلماقده دیر.
گزارش‌لرگه کۉره، اسراییل رسمی‌لری دایمی آتیش-کېسین‌گه قرشی دیر و آتیش-کېسین کیلیشووی مشخص مدت‌لی و وقتینچه‌لیک بۉلیشی‌گه تاکید قیلیب، اونگه تیارگرلیک کۉرسه‌تماقده دیر.
امید و خواطرلر
یوقاریده ایسلب اۉتیلگن دیک امریکا قوشمه ایالتلری نینگ جمهور باشلیغی، غزه اوروشی عاقبتی خصوصیده اۉز جدیت‌نی اعلام قیلگن. بو اېسه آتیش-کېسین اینتیلیش‌لری جدیت بیلن ایزلهنیب، اوروش یکونلنیشی اوچون امیدلرنی هم اۉرته‌گه آلیب کېله‌دی. باشقه بیر تاماندن ترامپ اسراییل‌لیک اسیرلر آزاد اېتیلمهگنی عاقبتیدن آگاه‌لنتیرگنینی نظرگه توتگن بیرحالده، اوروش و تارتیشوولر ینه‌ده جدی‌لشیشی ممکن‌لیگی تۉغریسیده هم خوف و خواطرلر بار دیر. چونکه ترامپ اوروش بیر تامانی بۉلمیش حماس‌نی آگاهلنتیرگن. حال بو که آتیش-کېسین سعی‌وحرکتلری ایجابی نتیجه‌گه اَیریشیشی اوچون اوروش ایکی تامانی باسیم آستیده آلینیشی و شونینگدېک ایکی تامان فکر و ملاحظه‌لری اوستیده دقت اېتیلیشی درکار دېب اَیتیله‌دی.
بونگه قوشیمچه، حاضرگه قدر دنیا ییریک مملکتلری و دنیا نینگ حربی و سیاسی کوچلری آره‌سیده هم اوروش تقدیری حقیده انیق بیر کیلیشوولری یۉق دیر. شونینگدېک اوروش یکونلنگن تقدیرده غزه‌نی قندی کېله‌جک کوته‌دی و کېله‌سی حکومتی قندی بۉلیشی هم هلی‌گچه بیللی اېمس. بو مساله‌لر هم اېسه کېله‌جکده‌گی خواطرلرنی کوچ‌لنتیره‌دی.
