طالبان حاکمیتی آستیده‌گی افغانستان‌ده باشقه ساحه‌لر کبی، سپورت بۉلیمی هم جدی قیینچیلیکلر بیلن یوز مه یوز بۉلیب کېلماقده دیر.
دېیرلی اخیرگی ییللر ایچیده، افغانستان فوتبالی جدی معمالر بیلن دوچ بۉلیب، بیر نیچه ییل ایلگری، افغانستان ۸ زون‌دن ۸ جماعه آره‌سیده قیزیق دوام اېتیب کېلهیاتکن، افغانستان لیگه‌سی توگه‌تیلگن اېدی و بو اوزگریش‌دن کیین افغانستان‌ده فوتبال ایچکی بیله‌شوولری، «افغانستان قهرمان‌لر لیگه‌سی» نامی آستیده اۉتکزیلماقده اېدی.
بو لیگه نینگ تۉرتینچی دوری هرات ولایتی میزبان‌لیگیده، قیزیق بیراق جدی معمالر و تنقیدلر بیلن اۉتکزیلدی.
اوشبو بیله‌شوولر دوامی‌ده، سرپل فوتبال جماعه‌لریدن «خدیم‌اف‌سی» فوتبال جماعه‌سی، لیگه اۉتکزیلیشی‌ده بار قیینیچلیکلر و توجه‌سیزلیکلر باعث، بیله‌شوولر دوامی‌دن واز کیچگن اېدی و حاضر «اتک انرژی» ناملی فوتبال جماعه‌سی هم، بو جماعه ترقه‌تیلگنینی اعلام قیلدی.
بو جماعه تامانیدن نشر اېتیلگن بیانات‌ده کېلیشیچه “افسوس بیلن افغانستان قهرمان‌لر لیگه‌سی نینگ تۉرتینچی دوری‌گه تېگیشلی واقعه‌لر، ناتوغری باشقریش و توجه‌سیزلیکلرنی کۉرسه‌تدی که بو وضعیت دوامی افغانستان فوتبالی ترقیات اوچون کتته خواطر دیر.”
دیمک اتک انرژی فوتبال جماعه‌سی نینگ ادعا قیلیشیچه، طالبان باشقیرووی آستیده بۉلگن فوتبال لیگه‌سیده ناتۉغری باشقریش، فساد همده توجه‌سیزلیک یوز بېرگن.
اتک انرژی فوتبال جماعه‌سی نینگ بو قراری بیلن بیرگه، بو جماعه نینگ تانیقلی فوتبالچیسی و افغانستان فوتبال ملی تیرمه جماعه‌سی نینگ اعضاسی فاریاب‌لیک محبوب حنفی، هم «ابو مسلم» جماعه‌سی‌گه قوشیلگنی خبر قیلینماقده دیر.
