امریکا قوشمه ایالتلری نینگ ینگی جمهور باشلیغی دونالد ترامپ، بوگون دوشنبه، ۲۰ – جنوری اۉتکزیلیشی ریجه‌لشتیریلگن آنت ایچیش مراسمی بیلن، بو مملکت سیاسی قدرت‌نی ینه بیربار قۉلگه آله‌دی.
دیمک بو احتفال بیلن ترامپ نینگ امریکاده ایکینچی دور جمهور باشلیغ‌لیک دوری باشلنه‌دی.
اوکراین و غزه اوروش‌لرینی یکونلنتیریش وعده‌سی بیلن قدرت‌گه کېله‌یاتکن دونالد ترامپ، بو دور جمهور باشلیغ دوریده قیسی مهم قرارلرنی آلیشی کوتیله‌دی؟
غزه
دونالد ترامپ وعده‌سی اساسیده، آنت ایچیش مراسمی ییتیب کېلمه‌ی، غزه اوروشی یکونلیشی مقصد آتیش-کېسین کیلیشووی امضالندی. شونینگدېک بو اوروش تامانلری آرقه‌لی اسیرلر آزاد اېتیلیشی جریانی باشله‌نیشیگه هم گواه اېدیک.
بو بیلن اۉتگن ۱۵ آی‌دن بویان شفقت‌سیز اوروش‌لرنی باش‌دن کیچیرگن غزه اهالیسی اوچون قنچه‌لیک دواملی تینچلیک تامین‌لنگنی هلی انیق بیللی اېمس.
بوندن اوتیب، ترامپ نینگ فلسطین و اسراییل مساله‌سیده بۉلگن یانده‌شووی، ایریم خواطرلرنی هم اۉرته‌گه آلیب کېله‌یاتکن. ترامپ اسراییل‌نی کۉپراق قوللب-قوتلیشی کوتیله‌دی. چونکه اونینگ بیرینچی دور جمهور باشلیغ‌لیک دوریده بیز بونگه گواه ایدیک. بو دورده ترامپ بیت المقدس‌‌نی اسراییل باشکینتی اوله‌راق رسمیت‌گه تانیگن اېدی.
اوکراین
دونالد ترامپ بو دور جمهور باشلیغ دوریده مهم مساله‌لردن ینه بیری اوکراین و روسیه آره‌سیده دوام اېتیب تورگن اوروش دیر.
ترامپ نینگ بو اوروش برابریده بۉلگن سیاستی و قراری، اوروش تقدیری اوستیده اونملی تاثیر قویه‌دی. ایشانچ‌لرگه کۉره، ترامپ اوکراین‌دن حمایه قیلیش اوچون بیراز قتتیق قۉل بۉلیشی کوتیله‌دی و بو مملکت‌گه بۉلگن حربی یاردملرنی آزه‌یتیریشی ممکن.
شونینگدېک ترامپ روسیه جمهور باشلیغی ولادیمیر پوتین بیلن اوکراین اوروشی باره‌سیده کیلیشیشی هم گمان اېتیلماقده دیر.
بو باره‌ده سی‌سی‌ان تامانیدن نشر اېتیلگن گزارش‌گه اساس، ترامپ آنت ایچیش مراسمی‌دن کیین پوتین بیلن تلیفونی ملاقات اۉتکزیشی کوتیلگن. عینی حالده ترامپ و پوتین اوچره‌شووی اوچون تیارگرلیکلر هم آلینماقده‌لیگی معلوم قیلینگن که بو اینتیلیش‌لر اوکراین اوروشی تقدیری اوچون اوته مهم دیر.
اوکراین اوروشی تقدیری خصوصیده ترامپ اینتیلیشی شوندی بیرحالده کوتیلماقده دیر که ترامپ سیلاو کمپاین‌لری دوامی‌ده بو اوروش‌نی بیر کیچه و کوندوزده یکونلنتیریشی‌گه وعده بېریب، امریکا نینگ اوکراین‌گه بۉلگن حربی یاردملریدن تنقید قیلگن اېدی.
مهاجرت
امریکا قوشمه ایالتلری نینگ ینگی جمهور باشلیغی دونالد ترامپ، بو مملکت مهاجرت سیاستی تۉغریسیده هم بیراز قتتیق یانده‌شیشی کوتیله‌دی.
ترامپ اۉتگن کیچه اونگه آواز بېرگن سیلاوچیلر ییغینی‌ده قتنه‌شیب، جمهور باشلیغ بۉلگن بیرینچی کونی‌دن باشلب مهاجرلرگه قرشی چیکلاولر یره‌تیشینی اعلام قیلدی.
ترامپ بو قرارینی شوندی بیرحالده اعلام قیلماقده دیر که حاضر کۉپلب افغانستان وطنداش‌لری، امریکاگه کېتیش‌نی کوتیب تورگن و یقین کونلر ایچیده امریکا سابق حربی‌لری ترامپ‌گه بیر مکتوب یۉللب اوشبو افغانستان‌لیکلر امریکاگه انتقال بېریلیشینی طلب قیلگن اېدی.
اقتصادی چیکلاولر
دونالد ترامپ اوتمیشی سوداگر بۉلگنی امریکا نینگ اقتصادی سیاستی‌ده هم تاثیری قوییشی گمان اېتیله‌دی.
ترامپ اقتصادی چیکلاولری، انیق افغانستان، اوکراین و ناتو خوفسیزلیک تشکیلاتی نینگ نشان‌گه آلیشی ممکن. ترامپ بوندن ایلگری افغانستان و اوکراین مملکتلری‌گه امریکا تامانیدن کۉرسه‌تیلیب تورگن یاردملردن تنقید قیلیب بو یاردملر تۉخته‌تیلیشی کېره‌ک دېب اورغوله‌گن اېدی. ترامپ بو قراری تۉغریسیده قنچه‌لیک جدی بۉلگنینی کېله‌سی کونلر ایچیده آلیشی کوتیلگن قرارلری بیللی قیله‌دی.
عینی حالده ترامپ ناتو تشکیلاتی برابریده بیراز قتتیق قۉل بۉلیب، بو تشکیلات بودجه‌سیده امریکا حصه‌سینی آزه‌یتیریب، تشکیلات باشقه اعضالری اوستیده تشله‌شی کوتیله‌دی.
بونگه قوشیمچه ترامپ سوداگرلیک ساحه‌سیده اینقسه چین نینگ امریکاگه بۉلگن صادراتی برابریده بیراز چیکلاولر یره‌تیب، تعرفه‌لرنی کۉپه‌یتیریشی ممکن دیر.
بو حقده دونالد ترامپ قدرتی نینگ ینگی دوره‌سی باشله‌نیشی عرفه‌سیده چین‌لیک اجتماعی ترماق؛ تیک‌تاک امریکاده باغلندی.
باشقه بیر تاماندن ترامپ مهاجرت مساله‌سی حقیده قتتیق یانده‌شووی هم، ایریم مملکتلر جمله‌دن مکزیک مملکتی اقتصادیاتی اوچون سلبی تاثیر قوییشی کوتیله‌دی. چونکه بو مملکت کۉپلب عایله‌لری نینگ اقتصادی امریکاده‌گی مهاجرلری تامانیدن یوباریله‌یاتکن پول‌گه باغلیق دیر.
بو برچه مساله‌لردن اۉتگن حالده، ترامپ نینگ افغانستان‌گه قرشی یانده‌شووی هم اوته مهم دیر. ترامپ اۉزی نینگ کمپاین دوریده کۉپ تیلگه آلگن مساله‌لردن بیری افغانستان مساله‌سی اېدی. اۉزی نینگ بیرینچی دور جمهورلیک ریاست دوریده دوحه بیتیمی امضالنیشی بیلن طالبان قدرت‌گه قیتیشی‌گه یۉل آچکن ترامپ کېله‌سی کونلر بو باره قندی قرار آلیشی اوته مهم دیر.
