تخار ولایتی دشت قلعه اولسواللیگیدن بۉلگن اۉزبېک تی‌وی منبع‌لری، بو اولسواللیکده اۉزبېکلرنینگ ایکی یریم مینگ جریب ییری اوستیده، طالبان تامانیدن قوللب –قوتلنگن پشتون‌لر، ادعا قیلگنینی ایته‌دیلر.
منبع‌لرنینگ اۉزبېک تی‌وی گه ایتیشیچه، پشتون‌لر ادعا قیلگن ایکی یریم مینگ جریب ییر، دشت قلعه اولسواللیگی نینگ بیر نیچه قیشلاغیده قرار تاپکن.
منبع‌لردن بیری نینگ اۉزبېک تی‌وی گه ایتیشیچه “مامور محمدحسن تخاری ناملی سابق جهادی قومندان‌لردن بیری هم بو باره‌ده پشتون‌لر و طالبان‌گه یاردم بېرماقده دیر، بو ییرلر یوزلرچه هکتار ییر و نیچه قیشلاق‌ده جایله‌شگن که غازی‌تپه و اورته ظلم قیشلاق‌لریدن شامل بۉله‌دی.”
پشتون‌لر ادعا قیلگن ییرلر دشت قلعه اولسواللیگی نینگ غازی‌تپه و اورته ظلم قیشلاقلریده جایله‌شگن.
دشت قلعه اولسواللیگیده اۉزبېک قوم بویوکلری بو حقده عدالت سۉره‌ب، طالبان اداره‌لریده باش اورگن و بیر نیچه مراتبه اعتراض بېلدیرگن، بیراق طالبان اولرنی سیس‌گه قولاق توتمهگن.
دشت قلعه قوم بویوکلری‌دن بیری نینگ ایتیشیچه “دشت قلعه اهالیسی بیر عصردن کۉپراق بۉله‌دی بو ییرلرنی آباد قیلیب اوندن فایده‌لنه‌دی، نسللردن بیری بو اۉزبېکلرگه تېگیشلی بۉلیب کېلگن، اۉزبېکلر بو ییرلر مالکیتی اوچون شرعی قباله‌لری هم بار و همه‌گه بو ییرلر اۉزبېکلردن بۉلگنی بیللی دیر. اۉزبېکلر کوکچه دریاسیدن آریق تارتیب بو ییرلرنی آبادان‌لشتیرگن.”
اۉزبېک تی‌وی منبع‌لری نینگ ایتیشیچه، طالبان اۉتگن ییلی بو اهالی حقی‌دن مدافعه قیلیش‌گه اولگورگن مولوی قادر ناملی اۉزبېک اولسوال‌نی هم ایش‌دن بوشه‌تیب، اۉرنیده دشت قلعه اولسواللیگیده باشقه بیر شخص‌نی اولسوال اوله‌راق تانیشتیرگن.
ایتیلیشیچه، مولوی قادر اولسواللیک دوری‌ده پشتون‌لر و طالبان بو ادعاسینی ناحق بیلگن و شو اوچون اولسواللیک‌دن چیت‌لنتیریلگن و بوندن کیین پشتون‌لرنینگ دعواسی ییرلر اوستیده جدی‌لشگن.
ایتیش کېره‌ک که طالبان تامانیدن بۉلینگن خوفسیزلیک تهدیدلری باعث، اۉزبېک تی‌وی منبع‌لری گزارش‌ده آت‌لری توتیلمسلیگینی طلب قیلدی‌لر، شو باعث گزارش‌ده منبع‌لرنینگ اسمی سِر قالگن.
