بوگون آقشم افغانستان ملی اسلامی جنبش حزبی نینگ رهبری مارشال عبدالرشید دوستم نینگ اویی‌ده، خانم کمبرلی لو باشچیلیگیده امریکانینگ «خلق‌ارا تینچ‌لیک بنیادی» وکیللری و افغانستان‌نی قوتقریش اوچون ملی مقاومت کېنگشی آره‌سیده ملاقات اۉتکزیلدی.
بو ییغین‌ده حضوری بۉلگن افغانستان سابق سیمالری‌دن حاجی محمدمحقق، اۉزی نینگ فیسبوک صحیفه‌سیده، ملاقات حقیده تفصیلات بېریب یازیشیچه، بو ملاقات‌ده افغانستان‌گه عاید تورلی مساله‌لر بحث اېتیلگن.
ییغین‌ده، افغانستان‌ده کینگ قمراوملی انتقالی حکومت اۉرته‌گه کېلیشی، اساسی قانون تشکیل اېتیلیشی و برچه قوملر و خاتین-قیزلر حقلری نظرگه توتیلیشی شونیندېک دیموکراسی عملگه آشیریلیشی تاکید اېتیلگن.
عینی حالده، خلق‌ارا تینچ‌لیک بنیادی وکیللری، جوبایدن حکومتی دوریده، افغانستان مساله‌سی امریکا تامانیدن اونوتیلگن اېدی و دونالد ترامپ اېسه بو سیاست‌نی تعقیب قیلمه‌یدی دېگن.
حاجی محمدمحقق بو حقده یازیشیچه “مهمان هیات اۉتگن اوچ ییل‌ده جوبایدن حکومتی‌ده افغانستان مساله‌سی اونوتیلیب و بو حقده صحبت قیلیش امریکا سیاستی‌گه قرشی اېدی، بیراق ترامپ رهبرلیگیده‌گی حکومت افغانستان تینچ‌لیک مساله‌سینی اۉزینی بیرینچی ایشی قرار بېرگن و بو حکومت افغانستان خلقی احوالینی درک قیلیب، افغانستان خلقی یانیده توریش‌گه قرار آلگن دېب بیلدیردی.”
ایتیش کېره‌ک که امریکا قوشمه ایالتلری اخیرگی اوچ ییل ایچیده، کۉپ بو کبی ییغین‌لرنی طالبان‌گه قرشی افغانستان سابق سیاسی سیمالری اینقسه مارشال عبدالرشید دوستم بیلن ریجه‌لشتیرگن.
ملاقات‌ده مارشال دوستم‌گه علاوه، حاجی محمد محقق، همایون خیری و عبدالبصیر انور حضوری بار اېکن.
