اتریش مملکتی نینگ پایتختی ویانا شهری میزبان‌لیگیده بۉلگن «افغانستان خصوصیده ویانا جریانی» نامی آستیده‌گی ییغین نینگ بیشینچی دوری بوگون سه‌شنبه، ۳۰ – دلو باشلندی.
ییغین‌ده انسان حقلری فعاللری و افغانستان‌لیک سیاسی و مدنی سیمالر همده طالبان‌گه قرشی آزادلیک و مقاومت جبهه‌سی وکیللری اشتراک قیلگن.
ویانا ییغینی نینگ بو دوری «ایرکین و دیموکراتیک افغانستان» عنوانی آستیده باشلنگن و کېله‌سی ایکی کون‌گه قدر دوام اېتیشی بیلدیریلگن.
ییغین حقیده نشر اېتیلگن معلومات‌لرگه کۉره، مذکور ییغین‌ده افغانستان‌لیک سیاسی و حربی تامان‌لر آره‌سیده بیرلیک یره‌تیش یۉللری محاکمه اېتیله‌دی.
عینی حالده بو ییغین باشلنیشی بیلن، افغانستان خصوصیده بو کبی ییغین‌لردن بۉلگن طلب‌لر هم تیلگه آلینماقده. احیرگی اوچ یریم ییل ایچیده اوشبو طلب‌لردن اساسی بیرته‌سی، افغانستان کېله‌جگیده کینگ قمراولی بیر حکومت نظرگه توتیلیشی دیر.
طالبان برابریده دنیا نینگ هم شرط‌لریدن بیری بۉلگن اوشبو مساله حقیده حاضرگه قدر جدی بحث بۉلینمه‌گن. شو باعث افغانستان نینگ کېله‌جکده‌گی سیاسی تقدیری هلی هم بیللی اېمس.
افغانستان سابق سیاسی سیمالریدن فدامحمد پیکان اۉزی نینگ ایکس/سابق تویتر صحیفه‌سیده بو ییغین‌ده فدرالی کبی نامتمرکز بیر تیزیم اوستیده بحث اېتیلیشنی تاکید قیلگن.
جناب پیکان ویانا ییغینی، سابق بُن کنفرانسی دیک باشقیریلمسلیگینی اورغولب یازیشیچه “افغانستان کېله‌جگیده تینچ‌لیک و برقرارلیک‌نی تامین‌لنیشی همده خلق اوچون یارقین بیر یۉل‌نی چیزیش نامتمرکز فدرالی تیزیم آرقه‌لی ممکن دیر.”
ایتیش کېره‌ک که ویانا ییغینی افغانستان حکومتی طالبان قۉلی‌گه توشگنیدن بویان باشلنگن و هر ییلی کمیده بیر مراتبه فعاللر ییغیلیب، افغانستان حقیده بحث قیله‌دیلر.
