بوگون ۲۱ – فبروری خلق‌ارا آنه تیل کونی بیلن ماس دیر. بیرلشکن ملتلر تشکیلاتی نینگ تعلیم، بیلیم و مدنیت تشکیلاتی یا ده «یونسکو» میلادی ۲۰۰۸ – ییل، ۲۱ – فبروری نی خلق‌ارا آنه تیل کونی اوله‌راق تعیین قیلگن اېدی.
دېیرلی میلادی ۲۰۰۸ – ییل‌دن بویان، دنیا بویلب آنه تیللرگه اهمیت بیریش و اولرنی رواجلنتیریش مقصدیده، اوشبو کون‌دن نشان‌لنه‌دی.
خلق‌ارا آنه تیل کونی بو ییل، افغانستان‌ده شوندی بیرحالده ییتیب کېلماقده دیر که طالبان حاکمیتی آستیده، آنه تیلی‌میز اۉزبېک تیلی رواجلنیشی اوچون بۉلگن اینتیلیش‌لر ایریم خواطرلر بیلن دوچ بۉلیب قالگن.
اۉزبېک تیلی افغانستان و منطقه نینگ بارلیکلریدن
تاریخ‌ده امپراتور و سلطان‌لر، حاکم‌لر و قِیراللر تیلی بۉلمیش اۉزبېک تیلی، دنیا نینگ بای و تیریک تیللری‌دن بیری دیر.
اۉزبېک تیلی کۉپینچه بو تیل سۉزلاوچیلری، اۉرته آسیا و افغانستان‌ده بۉلگنی سبب منطقه نینگ بویوک بارلیکلریدن تانیله‌دی.
دیمک افغانستان ناملی بیر جغرافیه‌ده، یامان یانده‌شوولر و یامان کونلرنی باش‌دن کیچیریب کېلگن بو تیل، طالبان حاکمیتی آستیده ینه بیربار خواطرلی وضعیت‌گه توشیب قالگن.
طالبان اوچ –یریم ییل حاکمیتی دوریده، اۉزبېک تیلی‌گه قرشی ایریم یامان یانده‌شوولر و قرارلرنی قۉلگه آلدی و یقین‌ده اۉزبېک تیلی و ادبیاتی‌دن چیققن شخص‌لرنی دولتی بست‌لرگه کیریش سیناولرگه اشتراک اېتیشی قرشی‌سیده چیکلاو یره‌تدی.
آنه تیل کونی؛ تیلی‌میز رواجی اوچون کۉپراق دقت قیله‌یلیک
فبروی آیی نینگ ۲۱ – سی آنه تیل خلق‌ارا کونی ییتیب کېلیشی بیزگه آنه تیل‌میز رواجلنیشی همده اسره‌لیب-اوه‌یلنیشی اوچون اینتیلیش و قیغوریش‌نی اېسله‌تدی.
فخرلی اوتمیش‌میزدن بیزگه میراث قالیب کېلگن اۉزبېک تیلی‌میز رواجی اوچون، باشقه هر بیر خلق‌دن کۉره بیز کۉپراق اولگوریب و قیغوریش‌میز کېره‌ک دیر. چونکه طالبان دیک تعصب‌لی حاکمیت‌لر تامانیدن نه فقط قوللب-قوتلنمه‌گن بلکیم یامان یانده‌شوولری بیلن بو تیل برابریده توسیق‌لیک یره‌تیلیب تورگن حالده، تیل اوچون قیغوریش و اینتیلیش تویغولی بیز خلق‌نی باشیمیزده قاله‌دی.
آنه تیل رواجی اوچون فرهنگی‌لر حصهسی
افغانستان‌ده آنه تیلی‌میز رواجلنیشی همده اسره‌ب-اوه‌یلنیشی اوچون فرهنگی‌لریمیز و قلم‌کش تویغولی انسان‌لریمیز آرقه‌لی بجریلیب تورگن فعالیت‌لر اوته مهم دیر.
افغانستان‌ده اۉزبېک تیل و ادبیاتی و شونینگدېک ایریم اۉزبېکانه مدنیت و بارلیکلر تورلی خیل قیینچیلیکلر بیلن یوز مه یوز بۉلیب کېلگن.
افغانستان نینگ معاصر تاریخی ایچیده، جدی همده آغیر قیینچیلیکلر و توجه‌سیزلیکلرنی باش‌دن کېچیرگن اۉزبېک تیلی، بو مملکتده اۉزبېک فرهنگی‌لرینی تینمه‌ی بجرگن ایش و فعالیت‌لری باعث سقله‌نیب کېلماقده و حاضر هم تیل رواجی اوچون، فرهنگی‌لرنی چرچه‌مسدن بجریب کېله‌یاتگن فعالیت‌لریگه گواه‌میز.
دیمک، افغانستان معاصر تاریخیده، کتاب‌لری آلاو بېریلگنگه قدر حکومتی مهرسیزلیکلرگه گواه بۉلگن اۉزبېک تیلی، جمهوریت تیزیمی کمیده ۲۰ ییل‌لیک دوریده بیراز شرایط‌گه ایگه اېدی. حاضر طالبان دوریده اېسه تیل رواجی خصوصیده بۉلگن سعی‌وحرکتلر ینه بیربار خواطرلی وضعیت‌ده توشیب قالگن.
جمهوریت دوریده هم طلب‌لرگه اساس، اۉزبېکچه تیل و ادبیاتی رواجلنیشی اوچون حکومت تامانیدن اونچه‌لیک توجه قره‌تیلمه‌دی شوندی بۉلسه هم فرهنگی‌لر و تیل‌گه قیزیققن انسان‌لر جیم تورمه‌ی یوزلرچه جلد کتاب‌نی چاپ‌دن چیقاریش‌گه موفق بۉلدی‌لر.
جمهوریت دوریده حاکم بۉلگن افغانستان اساسی قانونی، اۉزبېکچه تیل و ادبیاتی رواجلنیشی اوچون بویروغ بیرر اېدی، بیراق شوندی بۉلسه هم حکومت اونچه‌لیک اۉزبېکچه رواجی اوچون حصه قوشمه‌دی و اۉزبېک تیلی اوقیتیش زمینه‌لری کوتیلگن‌دیک یره‌تیلگن اېمس.
حاضر، افغانستان حاکمیتی تیپه‌سیده تۉرگن طالبان دوریده هم اۉزبېکچه تیل و ادبیاتی نینگ احوالی انچه خواطرلی وضعیت‌ده توشیب قالگن، چونکه حاضر جمهوریت دوری کبی بیر قانون اساسیده هم طالبان حکومتی اۉزبېک تیلی برابریده اۉزینی مسوولیت‌لی حس قیلمه‌یدی.
بونگه علاوه، اۉتگن ایکی ییل ایچیده، اۉزبېکچه تیل‌وادبیاتی اوچون هم طالبان ایریم مهرسیزلیکلرنی قېلگن، طالبان نینگ اخیرگی مهرسیزلیگی؛ تحصیلات وزیرلیگی تامانیدن اۉزبېکچه و تورکچه تیل‌لریگه ترجمه قیلیش تقیق‌لنگن دیر.
بیراق، حاضر هم افغانستان اۉزبېک‌لری نینگ فرهنگی‌لری شرایط آغیرلیگیگه قره‌مسدن تیل و مدنیت رواجلنیشی اوچون قۉللریدن کېلگن ایش‌لرنی بجریب تۉرگن.
اوشبو تلاش‌لرنی اۉتگن ایکی ییل جریانیده فرهنگی‌لر تشبثی بیلن اوتکزیلگن علمی و فرهنگی ییغیلیش‌لردن کېلیب چیقیب ایتیش ممکن.
