اۉزبېکستان باش وزیری عبدالله عارف‌اف، طالبان باش وزیری اقتصادی اۉرین باسری عبدالغنی برادر و بیرگه‌سیده‌گی هیات بیلن اوچره‌شدی.
طالبان بو اوچره‌شوو تۉغریسیده نشر قیلگن بیاناتیده اعلام قیلیشیچه، طالبان باش وزیری اقتصادی اۉرین باسری عبدالغنی برادر، اۉزبېکستاندن افغانستان آرقه‌لی ایران و جنوبی آسیا مملکتلری بیلن سوداگرلیک علاقه‌لرینی آشیریش‌نی سۉره‌گن.
عبدالغنی برادر بو خصوصده، اۉزبېکستاندن افغانستان‌ده تیمیر – یۉل و سالنگ عمومی قتناو یۉلی قوریلیشی اوستیده سرمایه یاتقیزیشی و بو حقده افغانستان بیلن همکارلیک قیلیشینی طلب قیلگن.
طالبان اقتصادی اۉرین باسرلیگی تامانیدن نشر اېتیلگن بیاناتده بو حقده کېلیشیچه “شونینگدېک ملا برادر اۉزبېکستان‌نی سالنگ ایکینچی تونلی قوریلیشی اوستیده سرمایه یاتقیزیش‌گه چقیردی.”
طالبان نینگ ادعا قیلیشیچه، اۉزبېکستان باش وزیری عبدالله عارف‌اف بو مملکت افغانستان بیلن اقتصادی همکارلیکلرینی آشیریش‌گه تیار دېب اعلام قیلگن.
