دنیا تورلی مملکتلریده افغانستان اۉزبېک-تورکلری نینگ فعال بیر قنچه مدنی انجمنلری بیرگهلیکده، بیر اویوشمه ایجاد قیلیب، هماهنگ فعالیت قیلیشلرینی اعلام قیلدی.
اۉزبېک تیوی اختیاریده قرار تاپکن معلومات اساسیده، اوشبو انجمنلر مسووللری، ۲۳ – فبروری آنلاین ییغین اۉتکزیش بیلن، مشترک اویوشمهلری آچیلیشینی اعلام قیلگن.
دېیرلی بو اویوشمهده، انگلستانده افغانستان تورکلری نینگ اویوشمهسی یا ده «اتا»، منچسترده فعال علیشیرنوایی اویوشمهسی، انگلستان نینگ کاونتری شهریده فعال بابر انجمنی، افغانستان تورکلری فرهنگی فدراسیونی، سویدنده فعال آیدین اویوشمهسی، سویدن نینگ ستاکهلم شهریده فعال بابر کلتوری اویوشمهسی، دنمارکده فعال افغانستان نینگ مهاجر تورکلری فرهنگی اویوشمهسی، جرمنیده فعال تورکلر بیرلیگی نامیدهگی بیرلشمهسی، سویسدن بیرلیک-برابرلیک اویوشمهسی و اتریشدن اېسه افغانستان تورکلری اویوشمهسی حضوری بارلیگی اَیتیلهدی.
اوشبو اویوشمهلر تامانیدن بیرگهلیکده تیارلنگن بیاناتده، بو اویوشمه آچیلیشی مقصدی حقیده بوندی دېب یازیلگن“ قیسی مملکتده بۉلیشیدن قطعینظر فقط اورتاق بیر هدفگه تۉغری یشهیاتکن اولکهلرده تیل، مدنیت و فرهنگیمیز ساحهسیده مجادلهلرگه دوام بیریش دیر.“
دېیرلی بو حقده اۉتکزیلگن آنلاین ییغیلیشده، خلقمیزنینگ تانیقلی قلم اهلی و علمی کدرلری، جملهدن پروفیسور عبدالحکیم شرعی جوزجانی، پروفیسور استاد بسم الله توردیقل میمنهگی، دوکتور عزیزالله آرال، دوکتور محمدعالم لبیب، استاد حلیم یارقین، شفیقه یارقین، دوکتور نجیبه ضیایی و شونگه اوخشش باشقه بیر قنچه سیمالر اشتراک قیلگن.
افغانستان اۉزبېک-تورکلری نینگ مشترک بو انجمنی تیارلنگن بیر اساسنامه اساسیده، فعالیتلرینی باشلهشی و بو اویوشمه اوچون خاص بیر سایت ایجاد اېتیلیشی هم قرار قیلینگن.
