طالبان عامه منفعت‌لر وزیرلیگی نینگ اعلام قیلیشیچه، بو وزیرلیک اۉرین باسری محمداسحاق صاحبزاده، ترکمنستان‌گه سفر قیلیب، بو مملکت رسمی‌لری بیلن اوچ شرطنامه امضالگن.
طالبان عامه منفعت‌لر وزیرلیگی محمداشرف حق‌شناس اۉزی نینگ ایکس صحیفه‌سیده یازگن بیاناتیده، اوشبو شرطنامه‌لر، تورغندی – هرات، آقینه – اندخوی و اندخوی – شبرغان، تیمیر – یۉلی قوریلیشی تۉغریسیده بۉلگنینی بیلدیردی.
حق‌شناس نینگ ایتیشیچه ” بو سفر دوامی‌ده، تورغندی – هرات تیمیر – یۉل استیشن‌نی رواجلنتیرش تۉغریسیده ۷ میلیون دالرلیک بیر شرطنامه همده آقینه – اندخوی تیمیر – یۉل لایحه‌سی نینگ قالگن ۱۰ کیلومترنی عملگه آشیریش و اندخوی – شبرغان ۵۵ کیلومتر تیمیر – یۉل لایحه‌سی نینگ تیکشیریش و دیزان قیلیش خصوصیده بۉلگن شرطنامه‌لر، ترکمنستان‌لیک رسمی‌لر بیلن امضالندی.”
طالبان بو لایحه‌لرنی عملگه آشیریش ایشلری تیزلیک بیلن باشلنیشی بیلدیرگن، بیراق انیق بو لایحه‌لر قچان عملگه آشیریلیشی حقیده تفصیلات بېریلگن اېمس دیر.
ایتیش کېره‌ک که ترکمنستان طالبان‌نی رسمیت‌گه تَن آلمه‌گن بۉلسه هم، بو حاکمیت بیلن اقتصادی همکارلیکلرینی آشیریش‌گه اولگورماقده و بو خصوصده بیر قنچه شرطنامه‌لر امضالب، مشترک لایحه‌لرنی قۉلگه آلگن.
