بیرلشکن ملتلر تشکیلاتی نینگ آزیق-آوقت دستوری، افغانستان خلقی اوچون جاپان مملکتی نینگ ینگی مالی یاردمی‌دن خبر بېردی.
خلق‌ارا آزیق-آوقت دستوری نینگ اعلام قیلیشیچه، جاپان مملکتی نینگ اوشبو یاردمی ۷ میلیون دالردن عبارت بۉلیب، افغانستان‌ده آچلیک و توییب-آوقت‌لنمسلیککه قرشی کوره‌ش همده باله‌لر و آنه‌لرنی قوللب-قوتلش مقصدیده صرف‌لنه‌دی.
آزیق-آوقت دستوری نینگ افغانستان‌ده‌گی سۉزلاوچیسی ضیاءالدین صافی یېتکیرمه‌لرگه ایتیشیچه “بو یاردم «دبلیو.اف.پی»نی کېله‌سی اوچ آی‌گه قدر ۳۰ مینگ عایله، ۲۰۰ مینگ کیشی، ۶۰ مینگ حامله‌دار عیال و باله‌لری همده ۳۰ مینگ مکتب اۉقووچیسی‌گه یاردم یېتکیریش‌گه قادر قیله‌دی.”
خلق‌ارا آزیق-آوقت دستوری بو حقده اۉزی نینگ نشر قیلگن بیاناتیده، جاپان مملکتی افغانستان اوچون بۉلگن یاردملری دوامی‌دن ایشانچ بېرگنینی هم بیلدیرگن.
بو تشکیلات بیاناتی‌گه کۉره، افغانستان‌ده جاپان ایلچیسی تاکایوشی کورومیا نینیگ ایتیشیچه “حاضر هم افغانستان‌ده ۱۵ میلیون انسان، کیله‌سی وعده آوقت‌لرینی قییردن تامین‌لشینی بیلمه‌یدی. بو رقم حقیقی انسان‌پرورلیک یاردملرگه محتاج عایله‌لر، باله‌لر و جماعه بارلیگینی بیلدیره‌دی. جاپان مملکتی بو آغیر احوال‌ده افغان عایله‌لرنی قوللب-قوتلش اوچون یاردملرینی دوام بېریش‌گه ایشانچ بېره‌دی.”
عینی حالده، خلق‌ارا آزیق-آوقت تشکیلاتی اۉتگن ییلی بو تشکیلات آرقه‌لی افغانستان بویلب ۱۲ میلیون انسان‌گه یاردم ییتکزیلگنیدن هم خبر بېردی.
شونینگدېک آزیق-آوقت دستوری ینه بیر علیحده بیانات‌ده، فرانسه نینگ میلادی ۲۰۲۴ – ییلی بو تشکیلاتگه بېریلگن بیر میلیون یورو یاردمی‌دن هم قدردانلیک بیلدیرگن.
