تانیقلی یازووچی و فرهنگی فعال کاظم امینی، حوت آیی نینگ ۲۳ – سی فیسبوک صحیفه‌سیده، بیر بیانات نشر قیلیب، فاریاب ولایتی مرکزی میمنه شهریده اویی غصب اېتیلگنینی اعلام قیلگن اېدی.
اۉزبېک تی‌وی جناب امینی نینگ اوشبو بیاناتی اساسیده، بیر خبر نشر قیلگنی آرتیدن، بو قضیه نینگ ینه بیر تامانی «مهتاب امام تخنیکی و مسلکی بیلیم‌لر انستیتوتی» نینگ مسوولی شمس الدین شمس، اۉزبېک تی‌وی گه مکتوب یازیب، جناب امینی ادعالرینی رد قیلدی.
شمس الدین شمس اۉزبېک تی‌وی گه یوبارگن معلوماتی و حجت‌لریده، کاظم امینی جنابلری تامانیدن اونگه قرشی بۉلگن ادعالرنی بوتونله‌ی رد قیلیب، اوی‌نی غصب قیلمه‌گنینی بیلدیرگن.
مهتاب امام تخنیکی و مسلکی بیلیم‌لر انستیتوتی مسوولی، اۉزبېک تی‌وی اختیاریده قویگن معلوماتیده، اوی‌نی کرایه‌گه بېریش کېلیشووی اساسیده جناب امینی اویی اوستیده قیلگن خرجت، توله‌نیشینی اۉز بوینی‌گه آلگن و شو اساس اوی کرایه‌سینی جناب امینی‌گه ییتیشتیرگنینی ادعا قیلهدی.
بو شخص نینگ ادعا قیلیشیچه، اۉتگن آلتی آی دوامی‌ده، اویی اوستیده ۱۷۰ مینگ افغانی خرجت قیلگن و بونگه قوشیمچه ۳۰ مینگ افغانی هم جناب امینی‌گه یوبارگن.
شمس الدین شمس جنابلری نینگ اۉزبېک تی‌وی گه ایتیشیچه “میندن کاظم امینی جنابلری ۲۰۰ مینگ افغانی آلگن، ۱۷۰ مینگ افغانی اوی خرجتی بۉلگن، رنگ قیلیش کبی خرجت‌لر و ۳۰ مینگ افغانی هم صراف‌لیک آرقه‌لی امینی صاحب‌گه یوبارگنمن. اوی کرایه‌سی بو آلتی‌ده ۲۰ مینگ‌دن ۱۲۰ مینگ بۉله‌دی، هلی مینی ۸۰ مینگ افغانی پولم امینی صاحب نی اوستیده دیر.“
شمس جنابلری نینگ آرتیق‌لشیچه، اوشبو خرجت‌لر یازووچی و فرهنگی فعال کاظم امینی تامانیدن تانیشتیریلگن، اونینگ جیین‌نی فریدون ناملی شخص کۉزی آلدیده بۉلینگن.
عینی حالده مهتاب امام انستیتوتی نینگ مسوولی، آلتی آی‌دن بیری کاظم امینی نینگ وکیلی و عایله‌سی اوی قباله‌سینی ییتیشتیرمه‌گنینی تاکیدلب، اوی محکمه قراری‌گه قرشی بیر نیچه مراتبه قفل اېتیلگنی سبب، کاظم امینی عایله‌سی قمه‌لگنینی اَیته‌دی.
شونینگدېک شمس جنابلری، حاضر بو جنجل محکمه‌ده دوام اېتیب تورگنینی تاکیدلب، اوشبو جنجللر باعث طالبان تامانیدن ایکی کون قمه‌لگنینی هم بیلدیردی.
