بوگون ایران اسلامی جمهوریتی و امریکا قوشمه ایالتلری نینگ دیپلومات‌لری، عمان مملکتی نینگ مسقط شهریده، یوز مه یوز اۉلتیریب، مذاکره قیله‌دیلر.
اوشبو مذاکره‌لر شوندی بیرحالده باشلنماقده دیر که امریکا قوشمه ایالتلری ایران‌گه قرشی بیلدیرگن تهدیدلری و آگاه‌لنتیریشلری بیلن بو اوچره‌شووده اشتراک قیلماقده دیر.
دېیرلی ایران و امریکا سۉزلشوولری، نه یالغیز بو ایکی مملکتده بلکیم منطقه جمله‌دن افغانستان‌ده هم اۉز تاثیرلرینی قالدیرگن. بیراق بو سۉزلشوو بیر نتیجه‌گه قۉل تاپیشی اوچون هلی هم اونچه‌لیک امیدلر یۉق دیر.
ایران و امریکا قرمه-قرشی‌لیکلری اوچون سونگی فرصت
اوشبو مذاکره باشلنمس‌دن ایلگری، ایران تشقی ایشلر وزیری سیدعباس عراقچی بو مذاکره‌نی بیر فرصت بیان قیلیب، مذاکره‌ده توپ امریکا میدانی‌ده دېب اعلام قیلگن اېدی.
شونینگدېک اخیرگی کونلر ایچیده، امریکا قوشمه ایالتلری و ایران اسلامی جمهوریتی نینگ مذاکره خصوصیده بۉلگن بیاناتی اساسیده، ایکی مملکت هم بو مذاکره‌دن بیران قرار تشقری‌گه چیقیشینی جدی کوتیب تورگنی کۉرینه‌دی.
امریکا قوشمه ایالتلری نینگ جمهور باشلیغی دونالد ترامپ، مذاکره نتیجه بېرمه‌گن تقدیرده ایران اوچون یامان تمام بۉلیب، بو مملکت‌گه یامان عاقبت‌لرنی اۉرته‌گه آلیب کېلگنینی تیلگه آلگن اېدی. عینی حالده امریکا بو خصوصده ایران‌نی اوروشدن هم آگاه‌لنتیرگن.
بو تامان‌ده ایران هم، مذاکره نتیجه بېرمه‌ی و امریکا قوشمه ایالتلری حربی تهدیدلری کبی یانده‌شوولرینی عملگه آشیریش‌گه فکر قیلگن تقدیرده، ایران هم خلق‌ارا اتمی انرژی آژانسی تشکیلاتی بیلن همکارلیکلرینی یکونلنتیریشیدن آگاه‌لنتیردی.
بو مساله‌نی ایران رهبری آیت الله خامنه‌ای نینگ مصلحتچیسی علی شمخانی اۉزی نینگ ایکس صحیفه‌سیده نشر قیلگن بیاناتیده تیلگه آلیب، وضعیت شوندی بۉلگن تقدیرده ایران اتمی ماده‌لرینی خوفسیز بیر مکان‌گه انتقال بېریشی‌دن خبر بېردی.
دیمک بو سۉزلرگه قره‌گنده، ایران و امریکا ایکی‌سی هم آره‌لریده‌گی قرمه-قرشی‌لیکلرگه بیر تقدیر تعین‌لش اوچون اوشبو مذاکره‌ده کۉز تیککن و مذاکره نتیجه بېرمه‌گن تقدیرده اوروش یا ده ایران و امریکا آره‌سیده‌گی قرمه-قرشی‌لیکلر ینگی و جدی بیر باسقیچ‌گه اوتیشینی کوتیش کېره‌ک دیر.
مذاکره نتیجه‌سی برابریده‌گی توسیق‌لیکلر
ایران اسلامی جمهوریتی و امریکا قوشمه ایالتلری نینگ وکیللری، شوندی بیرحالده بیر بیراوی بیلن سۉزلشوو باشله‌گن دیر که بیر نیچه عامللر جمله‌دن آره‌لریده‌گی ایشانچ‌سیزلیکلر بو مذاکره نتیجه بیریشی اوستیده آغیر سایه تشله‌گن.
ایران و امریکا مذاکره‌لری نتیجه‌سی اوچون قوییده‌گی عامللر توسیق‌لیک یره‌تیشی ممکن:
ایشانچ‌سیزلیک: امریکا قوشمه ایالتلری و ایران اسلامی جمهوریتی خلق‌ارا دیپلوماسی‌ده جدی رقابت و قرمه-قرشی‌لیکده بۉلیب کېلگن مملکتلر جمله‌سیدن دیر. شو باعث بو ایکی مملکت رسمی‌لری اونچه‌لیک بیر بیراوی‌گه ایشانمه‌یدی.
بوندن ایلگری ایران اسلامی جمهوریتی نینگ مذهبی ییتکچیسی آیت الله علی خامنه‌ای، امریکا قوشمه ایالتلری اوستیده هیچ قندی ایشانچ یۉق دېب، امریکا بیلن کیلیشوو عقللی بیر قرار اېمس دېگن اېدی.
شوندی ایشانچ‌سیزلیکلر بارلیگی سبب، امریکا و ایران وکیللری بیر بیراوینی راضی قیلیب، مذاکره‌لری نتیجه بېریشی بیرازگینه قییند کۉرینه‌دی.
ایران و امریکا مقصدلری آره‌سیده‌گی کتته فرق: امریکا قوشمه ایالتلری ایران بیلن مذاکره‌سیدن مقصدی، بو مملکت هیچ قچان هسته‌ای قوراللرگه قۉل تاپمسلیگی دیر. امریکا نینگ مقصدی بو بۉلسه‌ده، بیراق ایران اېسه بوندی بیر قرارگه قوله‌یلیک بیلن تَن بېریشی ممکن اېمس. چونکه ایران خلق‌ارا دیپلوماسی و اۉیین‌لرده اۉرنینی سقلش یالغیز یۉلی و باسیمی هسته‌ای قورال دېب توشینه‌دی. شوندی اېکن امریکا و ایران مملکتلری قوله‌یلیک بیلن مقصدلریدن قۉل تارتیش‌لری ممکن اېمس و بو هم اېسه مذاکره نتیجه بیریشی برابریده توسیق‌لیک یره‌تَدی.
اوتمیش‌ده‌گی نتیجه‌سیز اینتیلیش‌لر: امریکا قوشمه ایالتلری و ایران اسلامی جمهوریتی بوندن ایلگری هم، هسته‌ای قورال خصوصیده مذاکره‌لر اۉتکزگن و اروپا حضوریده بو حقده «برجام» ناملی بیر کیلیشوو هم قۉلگه کېلگن اېدی. بیراق امریکا قوشمه ایالتلری جمهور باشلیغی دونالد ترامپ، بیرینچی دور جمهور رییس‌لیگیده بو کیلیشوودن چیقدی. شو باعث اوشبو مذاکره‌لر نتیجه‌سیز قالگن اېدی.
حاضر هم اېسه امریکاده هم دونالد ترامپ قدرت‌ده بۉلگنی همده اوتمیش‌ده مذاکره نتیجه‌سیز قالگنی، امریکا و ایران مذاکره‌لریدن ایجابی بیر نتیجه چیقیشینی بیراز قییند کۉرسه‌تَدی.
امریکا و ایران تیارگرلیکلری
امریکا قوشمه ایالتلری شوندی بیرحالده ایران بیلن مذاکره‌نی باشله‌گن دیر که بو مملکتده دونالد ترامپ حکومتگه کېلگنیدن بیری، امریکا خلق‌ارا بحران‌لرگه ییچیم یۉل تاپیش اوچون سۉزلشوو یۉللرینی جدی توتگن.
امریکا حاضر روسیه بیلن اوکراین اوروشی تقدیری حقیده سۉزلشوولرنی باشله‌گن و شونینگدېک غزه اوروشی تقدیری خصوصیده‌گی اینتیلیش‌لر و مذاکره‌لر هم، دونالد ترامپ حکومتگه کېلگنیدن کیین جدی‌لشدی.
بو تامان‌ده ایران شوندی بیرحالده امریکا بیلن مذاکره‌گه قیلماقده دیر که اخیرگی ایکی ییل ایچیده، بو مملکت خلق‌ارا دیپلوماسی‌ده بیرازگینه زیان‌لرنی تجربه قیلدی.
حاضر ایران سوریه‌دن قۉلی کیسیلگن و بو تامان لبنان‌ده هم ایران تامانیدن قوللب-قوتلنگن حزب الله گروهی خلع‌سلاح اېتیلیش باسیمی آستیده دیر.
شونینگدېک ایران نینگ یمن حوثی‌لری کبی منطقه‌ده‌گی باشقه باسیملری هم امریکا هجوملری و باسیملری آستیده قرار تاپکن. ایران نینگ اۉزی هم دونالد ترامپ آگاه‌لنتیریشی اساسیده، اوروشی خوفی آستیده قالگن.
شوندی اېکن ایران حاضر امریکا بیلن مذاکره‌ده باشقه هر بیر زمان‌دن کۉره کۉپراق کوچ‌سیز اشتراک قیلماقده دېب ایتسه‌ک، اده‌شمه‌گن بۉله‌میز.
بونی یانیده ایران امریکا بیلن بۉلگن مذاکره‌ده، اینقسه هسته‌ای قورال خصوصیده‌گی مذاکره‌ده اونچه‌لیک خلق‌ارا حمایه‌گه هم ایگه اېمس. ایران کۉپراق حمایه‌سیگه کۉز تیککن روسیه هم، حاضر ایران‌دن بو حقده اونچه‌لیک حمایه قیلیش شرایطی‌ده اېمس. شو باعث امریکا نینگ ایران بیلن مذاکره قیلووچی وکیلی استیو ویتکاف عمان‌دن ایلگری روسیه‌گه باریب، بو مملکت جمهور باشلیغی ولادیمیر پوتین بیلن اوچره‌شدی. بو دیگنی ایران‌دن خلق‌ارا حمایه‌لر آزه‌یگنی دېب تیلگه آلیشیمیز هم ممکن دیر.
ایران و امریکا مذاکره‌سی نینگ افغانستان‌ده‌گی سایه‌سی
ایران و امریکا مذاکره‌لری اعلام اېتیلگندن بیری، افغانستان‌ده بو مذاکره تاثیرلرینی آچیق سیزیش ممکن دیر. مذکور خبر اعلام اېتیلمس‌دن ایلگری، افغانستان مالی بازارلریده ایران نینگ تومنی احوالی آغیرلشیب بارماقده اېدی و افغانی پول‌گه نسبتن ۶۵۰ گه قدر هم توشیب کېلگن اېدی.
حاضر بو خبرلر نشر اېتیلگندن کیین تومن هم بیراز کوچ‌لنیب ۷۵۰ الی ۶۰ قدر کوتاریلگن.
بوندن اوتیب ایران و امریکا مذاکره‌لری ایجابی نتیجه بېرگن تقدیرده، ایران‌ده یشاوچی افغانستان‌لیک مهاجرلر و اولرنینگ ایران‌ده بۉلگن محنت‌لری پوللریگه کوز تیکیب تورگن افغانستان‌ده‌گی عایله‌لری اوچون یخشی خبر دېسک بۉله‌دی. چونکه بو مذاکره‌لر نتیجه بېرگنده، ایران ملی پولی نینگ احوالی یخشی‌لنیب، نتیجه‌ده ایران‌ده‌گی افغانستان‌لیک مهاجر ایشچی‌لر احوالی خصوصیده یخشی تمام بۉلیشی ممکن دیر.
خلاصه: ایران بیلن امریکا آره‌سیده‌گی مذاکره‌لر قوله‌یلیک بیلن نتیجه بېریشی بیراز قییند کۉرینه‌دی. لیکن امریکا قوشمه ایالتلری‌ده حاکم جمهوری‌خواه حزبی اینقسه بو مملکت جمهور باشلیغی دونالد ترامپ نینگ دیپلوماسی آرقه‌لی توسیق‌لیکلر حل اېتیلیشی اوچون بۉلگن یانده‌شووی و دنیا اوچون نظرگه توتیلگن ینگی ترتیب بو مذاکره‌لر نتیجه بېریشی اوچون آزگینه بۉلسه هم امید یره‌تَدی.
