محمد یحیی حفیظی جوزجانی، الحاج عبدالحفیظ بای اۉغلی ۱۳۲۱ – نچی قویاش ییلی (۱۹۴۲ – عیسوی) ییلی، سرپل ولایتی نینگ بلوچ‌خانه‌سیده دنیاگه کېلگن. باشلنغیچ مکتب و لیسه‌نی سرپل ولایتی نینگ «قاضی سراج» لیسه‌سیده بیتیرگن. او مکتب چاغیدن شعر و ادبیاتگه مهر قویگن اېدی. اونینگ شعرلری و یازوولری ۱۳۵۲-نچی ییللردن اعتبارأ مملکت مطبوعاتلریده نشر اېتیلگن.
یحیی حفیظی, ۱۳۵۴ -ییلی مقدس اۉقووتووچیلیک وظیفه‌سیگه مقرر بۉلدی. حفیظی, ۱۳۵۹- نچی ییلیده، ناخوش خوفسیزلیک شرایطلر طفیلی, شبرغانگه کوچیب، اوییرده یشه‌ی باشله‌دی. او ییرده اۉقوتووچیلیک وظیفه سینی دوام اېتیره‌دی. بیراق, کیینچه‌لیک جوزجان ولایتی نینگ حاکمیتی قراریگه کۉره, اوشبو ولایت نینگ اخبارات و مدنیت باشقرمه‌سی رهبری اېتیب تعیین‌لنه‌دی. حفیظی جوزجانی, ۴۰ ییل دوامیده سرپل و جوزجان ولایتلریده، معلملیک وظیفه‌سینی بجریب, کۉپلب شاگرد تربیه‌لگن.
جوزجانی، رسمی لوازم قطاریده «امیر علی شیر نوایی» و «بابر شاه» مدنی جمغرمه سی نینگ ولایت کېنگاشی رهبری و جوزجان ولایتی نینگ شاعرلری و یازووچیلری اویوشمه‌سی نینگ باشلیغی کبی، کونگیللی فعالیتلرده کۉرینگن. حفیظی جوزجانی, طبع سرشار و تاتلی سۉز شاعر و ایجادچی اېدی. حفیظی, اۉز اثرلرینی ایکی تیل یعنی اۉزبېکچه و فارسچه تیللریده یره‌تگن. اونینگ اۉزبېک تیلیده‌گی شعرلر توپلمی «نوایی گه ساوغه», اۉزبېک ادبیاتی نینگ آته‌سی بۉلمیش نوایی زمانیده ,حاضرگی افغانستان خلقی نینگ حیاتیدن بیر تصویر دیر. محبت نامه دیوانی، کتته حجمگه ایگه بۉلگن منظوم اثر, تانیقلی شاعریمیز نینگ شاهکارلریدن بیری دیر.
انجینیر سید سراج الدین قانع ملاحظه‌لری دیوان حقیده شونده‌ی دیر: بو دیوان نازکخیال و بدیهه گوی شاعریمیزنینگ ۵۰ ییللیک حیاتی دوامیده‌گی ادبی فعالیتنی کۉرسته‌دی. دیوانده‌گی منظوملر, شاعر نینگ حیاتیده‌گی بولیب اۉتگن یخشی-یمان خاطره‌لری, خوشلیک و خفه‌لیک احوالی, اجتماعده‌گی نابرابرلیکلر و تینگسیزلیکلر همده ایچکی کیچینمه‌لری نینگ تمثالی دیر.
بو دیوانده اجتماعی, میهنی, حماسی یا ایپیک, و طنز یا عکسیه غزللردن هم نمونه‌لر بار. عکسیه‌لر و طنزلر, اۉقووچیگه ایلات ایچیده‌گی بار نابرابرلیکلرنی بیان قیلیشدن تشقری, مقمی, فرقت, عبید زاکانی و ابولقاسم کبیلرنی اېسلته‌دی.
حرمتلی حفیظی نینگ هم اۉزیگه خاص بیر اسلوب و طریقه سی بار, یازگن منظومه لری عموما کلاسیک شکلیده بۉلیب, قدیمگی شاعرلر و یازوچیلر اثرلریدن الهام آلینگن. قۉشیمچه تۉرتلیک, رباعیلر و مستزادلر هم دیوان نینگ بیر قسمینی تشکیل اېتگن, شاعریمیز بو قالبده هم ایریم موضوعلر اوچون قلم تارتیب کېلگن. شونینگ دیک, اونینگ شعرلری تورلی شیوه‌لرده مثال غزل, مثنوی, رباعی و ترکمنی, هزاره‌گی لهجه و پشتو تیللریده دوبیتی‌لری نشر بۉلگن. حفیظی، ملت آره‌سیده هجوی شعرلری و افغانستانلیک اۉزبېک قوشیقچیلریگه یره‌تگن قوشیقلری و تصنیفلری بیلن مشهور دیر.
اونینگ شهرتی قلم اهلی آره‌سیده, اینقسه جنوبی تورکستان یازووچیلری و شاعرلری آلدیده اثرلری بیلن , اهمیتگه ایگه دیر. بوندن تشقری حفیظی, فرهنگی ساحه‌ده فعالیت یوریتگنی اوچون هم خلق یوره‌گیدن جای آلگن. چنانچه حلیم یارقین جنابلری او کیشی حقیده شونده‌ی فکر بیلدیره‌دی:
رحمتلی حفیظی جوزجانی, سرپل و جوزجان ولایتلریده اینگ کۉپ عملی و نظری ایش قیلگن ایلغار ضیالی؛ مدنی اویشمه‌لر فعالی؛ ادبی ییغینلر تشکیلاتچیسی, بوتون شاعرلر, ادیبلر و صنعتچیلرنینگ بیرلشتیریش سرحلقه‌سی و اویی اېسه مدنی فعالیتلر و مدنی توپلملر مرکزی اېدی. استاد حفیظی نینگ ایشلری حقیده قوییده‌گی اېسلتمه‌لر گه دقت قیله‌میز:
– یحیی حفیظی, طبعی سرشار و تاتلی سۉز شاعر و ایجادچی اېدی. اۉزبېکچه و فارسچه‌گه ایکی شعر دفتری باسیلیب چیققن؛
– شعر صنعتلری حقیده میده بیر رساله تالیف قیلیب, چاپ اېتگن.
– استاد قاری محمد عظیم عظیمی دیوانی بیرینچی مرته, ۱۳۷۲-نچی ییلی شبرغانده اونینگ اهتمامی بیلن باسیلگن.
– جوزجان و سرپل شاعرلری نینگ تذکره‌سی.
– حفیظی جوزجانی, یاش شاعرلر و استعدادلر نی ترغیب و تشویق قیلیب, امکانی باریچه اورگتگن.
– خوش قریحه‌لی مصنف صفتیده کۉپگینه تصنیفلر و ترانه‌لر یازگن. اولرنینگ ایریملرینی رحمتلی ملا تاج محمد سرپلی, حرمتلی خیر محمد چاووش, رحمتلی صابر عندلیب, حرمتلی عبدالکبیر کمال و باشقه قوشیقچیلر چیرایلی کویلر بسته‌لب کویلگنلر؛
– حفیظی نهایت هزال و مطایبچه اېدی. او اۉزبېک و دری تیللریده, کۉپکینه هجوی و طنزی شعرلر یازگن. او, کفتر اولیا, تاغه مردان, مست کیلین, روزی ملنگ,… کبی، اوندن آرتیق مستعار آت بیلن, اوز منظوم هجویه‌لر و مطایبه لرینی مطبوعات و مجازی صفحه لرده ترقتگن.
– ماهر خطاط, رسام و محنتکش اۉقوتووچی صفتیده ادبیات, رسم و خط ساحه‌لریده درس بېرگن. – جوزجانی, یاش شاعرلر و استعدادلرنی ترغیب و تشویق قیلیب, امکانی باریچه اولرگه یۉلاووچی بۉلگن.
-جدا کۉپ ادبی و شعری مشاعره ییغینلرنی یۉلگه قوییب ,همده مطبوعاتده ییغینلر اۉیوشتیرگن.
حفیظی جوزجانی نینگ جودا بای و قیمتلی کتابخانه‌سی بۉلگن. بو کتابخانه کتابلری دایم تحقیق و مطالعه اهلی اوچون قولای شرایط یره‌تیب بېرگن.
– رحمتلی حفیظی نینگ قوشخانه‌سی بیلیم, شعر, ادبیات, و صنعت اهللری نینگ اوچره‌شوو مرکزی بۉلگن.
شعر, بیر مدنیت نینگ اوریب تورگن نبضی و شاعر اېسه, ملت نینگ حس و تویغولرنی اسروچیسی دیر. اولرنینگ یوره‌گیدن توکیلگن هر بیر سۉز, اۉز زمانه‌سی نینگ روح عکسی دیر. کیلینگ اولرنینگ سۉزلرینی یاد سقله‌یله‌یلک و سۉزلرینی اونوتمه‌یلیک. سیز بو اولوغ شاعردن بیران ایسده‌لیگینگیز بار می؟ اولرنینگ قیسی کتابلرینی اۉقیگن‌سیز!
