لاجورد یۉلی تدقیقات مرکزی تامانیدن علیحده نشر اېتیلگن بیاناتلر اساسیده، سویدن نینگ استکهلم شهریده اۉتکزیلگن «افغانستان کېله‌جگی» عنوانی آستیده‌گی کنفرانس‌ده، اشتراک قیلگن فعاللر، افغانستان‌ده دوام اېتیب تورگن وضعیت، اۉتمیش‌ده‌گی معمالر و کېله‌جگده‌گی خواطرلر حقیده اۉز فکر و تکلیف‌لرینی شریک قیلگن.
دېیرلی لاجورد یۉلی تدقیقات مرکزی تشبثی بیلن اۉتکزیلگن بو ییغین‌ده، مذکور مرکز باشلیغی عالیه ییلماز، بیرلشکن ملتلر تشکیلاتی نینگ افغانستان خصوصیده بۉلگن «موزاییک ریجه‌سی» تۉغریسیده نطق سۉزلب، بو کبی ریجه‌لرده، افغانستان خلقی سیسی و اراده‌سی نظرگه توتیلیشینی تکلیف قیلگن.
لاجورد یۉلی تدقیقات مرکزی باشلیغی؛ افغانستان سیاسی تقدیری خصوصیده، یۉق اېتیش و انحصار آرقه‌لی اېمس بلکیم سۉزلشوو آرقه‌لی ییچیم-یۉل تاپلیشی و بو بیلن افغانستان کېله‌جگی اوچون ینگی بیر کېلیشوو اۉرته‌گه کېلیشینی تکلیف قیلگن.
عیاللر حقلری فعاللریدن فرشته بیگم ضیایی، لاجورد یۉلی تدقیقات مرکزی تشبثی بیلن اۉتکزیلگن ییغین‌ده، افغانستان مساله‌سیگه عاید بیرلشکن ملتلر تشکیلاتی نینگ موزاییک ریجه‌سیدن تنقید قیلدی.
خانم ضیایی نینگ ایشانچ‌گه کۉره “کۉرینیش‌ده بو ریجه افغانستان‌ده تینچ‌لیک و برقرارلیک تامین‌لنیشی مقصدیده بۉلسه‌ده، بیراق حقیقت‌ده عیاللر و مدنی گروه‌لرنی یۉق اېتیلیشی بیلن طالبان تیزیمی‌گه مشروعیت بېریش اوچون تیارلنگن.”
لاجورد یۉلی تدقیقات مرکزی تامانیدن نشر اېتیلگن معلومات اساسیده، خانم ضیایی انیق بیرلشکن ملتلر تشکیلاتی نینگ بو ریجه‌سیده، افغانستان خاتین-قیزلری حقلری نظرگه توتیلمه‌گنیدن تنقید قیلگن.
استکهلم شهریده لاجورد یۉلی تدقیقات مرکزی تشبثی بیلن اۉتکزیلگن افغانستان کېله‌جگی خصوصیده‌گی کنفرانس‌ده، خلق‌میزنینگ تانیقلی بیلیم‌دانلری و سابق سیاسی سیمالریدن عبدالحکیم شرعی جوزجانی، افغانستان معاصر تاریخیده تورلی قوملرگه قرشی بۉلگن یامان سیاست‌لر حقیده صحبت قیلگن.
جناب جوزجانی نینگ تاکیدلشیچه “افغانستان‌ده خاص قوملر اجتماع، سیاست و مدنیت ساحه‌لریدن یۉق اېتیلیشی اوچون بۉلگن سعی‌وحرکتلرگه گواه‌میز و بو وضعیت مملکت معاصر تاریخیده، تیزیملی روشده دوام اېتیب کېلگن.”
عبدالحکیم شرعی جوزجانی جنابلری بو تۉغریده، انیق اۉزبېکلر و تورکمن خلقلری رسمی اۉقیش‌لردن محروم اېتیلیشی، اۉزبېکلر، هزاره‌لر و تورکمن‌لر سیاست و دولتی تشکیلات‌لردن اوزاق‌لشتیریلیشی و خاتین-قیزلرنینگ برحق طلب‌لری نظرگه توتیلمسلیگیگه اشاره قیلگن.
شونینگدېک سیاسی مساله‌لر بۉییچه تانیقلی بیلرمان‌لردن بیری بسم الله توردیقل میمنه‌گی جنابلری، استکهلم شهریده اۉتکزیلگن ییغین‌ده، افغانستان‌ده اۉتگن ییللر دوامی‌ده دیموکراسی تیزیمی اۉرته‌گه کېلیشی اوچون بۉلگن سعی‌وحرکتلر اونملی بۉلمه‌گنیدن تنقید قیلدی. جناب میمنه‌گی نینگ تاکیدلشیچه، “دیموکراسی تامین‌لنیشی مقصدیده بۉلگن سعی‌وحرکتلر و بو حقده بۉلگن تشکیلات‌لر کۉپینچه ایچکی و چیت‌ایللیک اره‌لشیش و باسیم‌لر آستیده اېدی. شو باعث بو سعی‌وحرکتلر یالغیز دیموکراسی اۉرته‌گه کېلمس‌لیگی اوچون اېمس بلکه اقتدارگرلیک کوچ‌لنیشی‌گه یاردم بېرگن.”
میمنه شهری نینگ سابق بلدیه باشلیغی جاوید کیوان هم، افغانستان کېله‌جگی اوچون هر قندی بیر ریجه‌ده، محلی خلق طلب‌لری و اراده‌سی نظرگه توتیلیشینی سۉره‌گن.
میمنه شهری نینگ سابق بلدیه باشلیغی، استکهلم‌ده اۉتکزیلگن لاجورد یۉلی تدقیقات مرکزی نینگ ییغینی‌ده، بو مساله خصوصیده فکر بیلدیرگن.
جناب کیوان نینگ تاکیدلشیچه، افغانستان‌ده دایمی برقرارلیک تامین‌لنیشی اوچون مهم قرارلر خلق طلب‌لری اساسیده آلینیب، بوتونله‌ی قرارلر متمرکز بیر تیزیم آرقه‌لی آلینمس‌لیگینی بیلدیرگن.
بو ییغین‌ده، شونگه اوخشش افغانستان کېله‌جگی تقدیری خصوصیده باشقه کۉپلب تکلیف و فکرلر بیلدیریلگن.
