فاریاب ولایتی نینگ دولت‌آباد اولسواللیگی اخیرگی کونلر ایچیده، طالبان‌گه قرشی جدی قوزغلان و ناراضلیکلرگه گواه اېدی.
اهالی طالبان نینگ تعصب‌لی یانده‌شوولری‌گه قرشی کۉچه‌لرگه چیقیب «یشه‌سین دوستم» کبی شعارلر بیلن طالبان یانده‌شوولری، اینقسه منطقه‌ده ناتانیش طالب‌لر بارلیگی برابریده، ناراضلیک بیلدیردی‌لر.
اۉزبېک تی‌وی منبع‌لری اۉتگن کون سه‌شنبه ۲۰ – جوزا توش‌دن کیین آق‌سقاللر و طالبان محلی رسمی‌لری آره‌سیده مذاکره بۉلیب اوتیشینی معلوم قیلگندی. بیراق اۉتگن کیچه ایریم منبع‌لر تامانیدن اۉزبېک تی‌وی‌گه یوباریلگن معلومات‌گه کۉره، اوشبو مذاکره هم نتیجه‌سیز یکونلنگن.
ایتیلیشیچه هلی‌گچه هم طالبان قماقده بۉلگن بیر نیچه اۉزبېک‌نی آزاد قیلگن اېمس و شو باعث ناراضلیکلر هم دوام اېتیشی ممکن دیر.
بونگه قوشیمچه، دولت‌آباد اولسواللیگیده‌گی منبع‌لردن بیری، بو جنجللرگه باغلیق طالبان بیر نیچه اۉزبېک اعضالرینی هم ایش‌دن بوشه‌تگنینی اَیته‌دی.
