اۉزبېکلر اخیرگی تۉرت ییل ایچیده، طالبان‌گه قرشی ناراضلیک بیلدیریب کۉچه‌گه چیققن کتته خلق دېب ایتیش‌میز تۉغری دیر چونکه طالبان‌گه قرشی قومی جنجللر و ناراضلیکلر کۉپینچه اۉزبېکلر تامانیدن و اۉزبېکلر یشاوچی منطقه‌لرده ریجه‌لشتیریلگنی.
بو دېگنی، طالبان حاکمیتی دوری‌ده هر بیر خلق‌دن کۉره، اۉزبېکلر کۉپراق آغیر احوالده بۉلگنی و بو خلق برابریده کۉپراق تعصب‌لی یانده‌شوولر روا کۉرینگنی دیر. چونکه اخیرگی ییللرده اۉزبېکلر نینگ تیل، مدنیت، تاریخی بارلیکلری و حتا ییرلری هم امان اېمس و دایما باستیریش تهدیدی بیلن بیرگه بۉلیب کېلگن.
اوشبو وضعیت دوامیده، هر بیریمیز اخیرگی تۉرت ییل ایچیده، کۉپلب شو سوراغ بیلن دوچ کېلگن‌میز که «اۉزبېک طالب‌لر نیمه قیله‌یبتی»
دېیرلی بو سوراغ، هر مراتبه که اۉزبېکلر طالبان قومی یانده‌شوولریدن چرچه‌ب، ناراضلیک بیلدیرگن جدی تیللرگه آلینه‌دی.
بو سوراغ کۉرینیشده عادی بیر سوراغ بۉلسه-ده، لیکن اۉزی بیلن کۉپ جدی ناراضلیک و بیر دعوا ۉ یۉل‌نی قنچه‌لیک برحق‌لیگینی آچیب بېره‌دی و بو بیلن اۉزبېک طالب‌لر قنچه‌لیک اسلامی شعار آستیده، قومی مقصدلر قربانی بۉله‌یاتکنی بیلدیریله‌دی.
طالبان افغانستان اوروشی‌ده دینی شعارلر بیلن اشتراک قیلیب، مینگلرچه اۉزبېک‌نی اۉز صف‌لریگه توپله‌دی. حاضر بو گروه حاکمیت‌نی قۉلگه آلگندن بیری طالبان اسلامی بویروغ‌لر اساسیده اېمس، قومی اویله‌شلر اساسیده، حکومت قیلیب کېلماقده و کابینه‌لری و سیاسی قدرت هم خودی شو فکر اساسیده توزیع اېتیلگن.
شوندی اېکن اۉزبېک خلقی، طالبان صفی‌گه قوشیلیب، ییللرچه اوروش قیلیب، کۉپلب انسان‌لر اینقسه اۉزبېکلر قانلرینی توککن طالبان‌دن سیزلر بو گروه‌گه نیمه اوچون قوشیلگن‌سیزلر و بو کون حاکمیت‌نی آلگن اېکن‌سیزلر نیمه اوچون اۉز خلق‌لرینگیزگه روا کۉریلیب تورگن ظلملر برابریده جیم‌سیزلر و هیچ نرسه قۉللرینگیزدن کېلمه‌یدی دېب سورهماقده دیر.
