اسراییل کوچلری بوگون اېرته‌لب، ایران‌گه قرشی کینگ هجوملرنی اۉیوشتیریب، بو مملکت هسته‌ی قوریلمه‌لرینی نشان‌گه آلیشی‌گه علاوه، ایران‌لیک یوقاری مرتبه‌لی رسمی‌لرنی اۉلدیردی.
شونینگدېک اسراییل، بوگون دوامی‌ده اۉزی نینگ ایران‌گه قرشی هجوملری ایکینچی باسقیچ‌نی هم عملگه آشیردی و بو هجوملرگه جواب ایران تامانیدن هم یوزلرچه راکته اسراییل‌گه آتیلگنی اَیتیله‌دی.
اسراییل و ایران نینگ بو هجوملری، منطقه‌ده ینه‌ده جدی بیر اوروش یوز بېریشی احتمالینی آشیرگن.
ایران تشقی ایشلر وزیری سیدعباس عراقچی بیرلشکن ملتلر تشکیلاتی‌گه یوبارگن مکتوبی‌ده، اسراییل بو هجوملرینی اوروش اعلامی دېب بیلدیرگن. دېیرلی بوندن ایلگری ایران رهبری آیت الله خامنه‌ای هم جیم تورمسلیکلرینی اورغوله‌گن اېدی.
بیرلشکن ملتلر تشکیلاتی و اروپا اتفاقی بو هجوملر عاقبتیدن خواطر بیلدیریب، منطقه اوروش تامان کېته‌یاتکنیدن آگاه‌لنتیرگن.
