بدخشان ولایتی خاش تومنی‌دن بیر نیچه ایشانچ‌لی منبع‌لرنینگ اۉزبېک تی‌وی گه ایتیشیچه، ایکی کېچه و کوندوزدن بیری طالبان و اهالی آره‌سیده قانلی تۉقنه‌شوو دوام اېتماقده دیر.
محلی منبع‌لرنینگ تاکیدلشیچه، بو تۉقنه‌شوو خاش اولسواللیگی اۉزبېک اهالیسی و طالبان کوچلری آره‌سیده دیر و حاضرگه قدر محل یشاوچیلریدن ۱۵ کیشی جان بېرگن و کمیده ۶۰ کیشی یره‌لنگن.
بو واقعه عاقبتیده جان بېرگن کمیده ۷ کیشی نینگ صورتلری هم اۉزبېک تی‌وی گه یوباریلگن که بو صورتلرده قربان بۉلگنلر شخص‌لر یاش-ییگیت‌لر بۉلگنی کۉرینه‌دی.
منبع‌لرنینگ اۉزبېک تی‌وی گه ایتیشیچه، طالبان خاش اولسواللیگی تشقری‌سیدن هم حربی کوچ آلیب کېلگن و اهالینی اوستیده باسیم‌لر کۉپه‌یگن.
بو منبع‌لردن بیری نینگ ایتیشیچه “ایکی کېچه و کوندوزدن بیری طالبان بو ییرده هجوم قیلگن و آنتنلرنی قطع قیلگن، ۱۵ گه یقین کیشی شهید بۉلگن و ۵۰ دن کۉپ یره‌لنگن دیر. یره‌لنگنلردن یریمی فیض آباد کسلخانه‌سیگه انتقال بېریلگن و اولرنی قان‌گه کېره‌گی بار.”
شونینگدېک بو وضعیت آره‌سیده خاش اولسواللیگیده اهالی اوی-جایلریدن بدرغه بۉلگنینی هم تاکیدلب، اولرنی وضعیتی‌گه هیچ کیم اعتبار قره‌تمه‌گنیدن هم شکایت قیله‌دیلر.
خاش اولسواللیگیدن ینه بیر منبع نینگ اۉزبېک تی‌وی گه ایتیشیچه” حاضر پشتونلر هجوم کېلتیرگن، یریم اهالی اسیر آلینگن و یریمی اۉققه توتیلگن.”
بدخشان ولایتی خاش اولسواللیگی اهالیسی، بو وضعیت دوام اېتگن تقدیرده طالبان تامانیدن اهالی قیرغین قیلنیشی ممکن دېب، اولر احوالی‌گه توجه قره‌تیلیشینی سۉره‌یدیلر.
