سونگی وقتلرده ایران‌دن جبری چیقاریلیب، فاریاب‌گه قیتیب کېله‌یاتکن مهاجرلر سانی، کیسکین کۉپه‌یگن.
ایران‌دن قیتیب کېلگن بو شخص‌لرنی سیماسی‌دن قنچه‌لیک جبر تارتکن‌لری، چرچه‌گنلری و امیدسیزلیکلرنی سیزیشینگیز ممکن.
روحی تینچ‌سیزلیکلر و باش‌دن کېچیریب کېله‌یاتکن آغیر احوال سبب، قییندلیک بیلن گپیره‌یاتکن بو شخص‌لر، ایران تامانیدن جبری چیقاریلگنلری و یۉلده ایران حربی‌لری تامانیدن اولرگه نسبتن حقارت‌لر و باج‌گیرلیکلردن سۉزلب بېره‌دیلر.
بو شخص‌لردن بیری صبغت الله جباری نینگ ایتیشیچه «ایران حربی‌لر اۉریب و اذیت قیلدی. بیزلرنینگ پوللریمیزنی زوردن آلدی، یاتاقخانه‌لرده کېلتیره‌دی نه سوو بار و نه نان بار و نه هم تشقری‌گه چیقیب بیر نفس تارتکنی قویه‌دی.»
بیر لقمه نان اوچون بدرغه بۉلیب شونچه آغیر کونلرنی کۉریب کېلگن افغانستان بو وطنداشلری بو ییر افغانستان‌ده هم ایش‌سیزلیک و ناانیق کېله‌جک بیلن یوز مه یوز بۉلیشیدن خواطرده دیر.
بو شخص‌لردن ینه بیری غلام رسول یۉلده کۉرگن آغیر احواللری و تشویش‌لری حیقده بوندی دېدی «بیز شیراز شهریدن چیقاریلیب، بیر هفته یۉلده قالدیک، باشقه ایرانده‌گی دوستلردن خواهلهیمیز کېلیش اوچون ۱۵ میلیون پول نظرگه توتسین‌لر، یۉلگه زوردن هم آله‌دی اذیت قیلیب اۉره‌دی، یۉللر اوستیده یاتیب نان‌سیز و سووسیز شوییرگه کۉپ عذاب بیلن ییتیب کېلدیک.»
فاریاب-هرات قتناو یۉلیده موتر هیداوچیلر هم ایران‌دن مهاجرلر آغیر احوالده قیتیب کېله‌یاتکنینی معلوم قیله‌دی.
اولرنینگ ایتیشیچه، قیتیب کېله‌یاتکن مهاجرلر کۉپینچه‌لری ییماق اوچون نان‌گه هم پوللری یۉق بیرحالده مملکت‌گه قیتیب کېلماقده دیر.
بو هیداوچیلردن بیری میرویس نینگ ایتیشیچه «کونیده یوزدن کۉپ موتر ایران‌دن قیتگنلرنی آلیب کېله‌دی، مهاجر کۉپ کېله‌دی احواللری آغیر یریمی‌گه پول بار یریمی‌گه یۉق دیر. بیرانته‌لرینی احوالینی کۉریب کۉپ قیغوره‌سیز.»
ایتیش کېره‌ک که اخیرگی وقتلر ایچیده، ایران حکومتی مهاجرلرنی چیقاریش جریانینی جدی‌لشتیرگن و بو مملکت تامانیدن مهاجرلرگه نسبتن ناانسانی حقارت‌لر هم گزارش بېریلماقده دیر
