بوندن ۱۳ – ییل ایلگری، سمنگان ولایتی مرکزی آیبیک شهریده، کتته بیر قوووانچ مراسمی ماتم بیلن یکونلندی. پارتلش ماده‌لرینی اۉزی بیلن آلیب کېلگن شخص آیبیک شهری نینگ الماس توی‌لر سالونینی قان‌گه بیله‌دی.
بو واقعه‌نی ایشیتگن هر بیر یوره‌ک قیغوگه باتیشی ممکن اېدی. چونکه واقعه‌ده بیر عایله نینگ آی‌لردن بیری تیارگرلیک کۉریب، اۉتکزه‌یاتکن قووانچ تویی، بیر دَمده عزاگه اَیله‌نیب، توی نینگ آق کییم‌لری قان‌گه باتیب، ماتم دسترخوانی توشَلدی.
کېین‌راق واقعه‌ده قربان بۉلگنلر کیم‌لیگی انیق‌لنیشی بیلن، بو عزا و قیغو نیچه برابر کوچه‌یدی. چونکه دهشت‌لی بو واقعه‌ده سمنگان خلقی نینگ ملت وکیلی و اۉزبېکلرنینگ تانیقل سیاستچی و حربی قومندانی احمدخان سمنگانی اۉز یقین‌لری بیرگه قربان بۉلگن اېدی.
احمدخان سمنگانی بو واقعه‌ده، اۉز قیزی نینگ توی مراسمی‌ده یقین‌لری بیلن بیرگه قربان بۉلدی.
احمدخان سمنگانی کیم اېدی؟
احمدخان سمنگانی قویاش ۱۳۳۶ – ییلی سمنگان مرکزی آیبیک شهری‌گه قره‌شلی «جوی ژوندون» ناملی قیشلاقده دنیاگه کېلگن.محمد عمر اۉغلی احمدخان، ۲۲ یاشی‌دن باشلب، قورال کوتاریب اوشبو وقت حکومتی‌گه قرشی توردی.
باشلنیش‌ده اسلامی جمعیت حزبی قومندان‌لریدن بۉلگن احمدخان سمنگانی کېین‌راق، مارشال عبدالرشید دوستم رهبرلیگیده‌گی جنبش حزبی‌گه قوشیلیب، شو بیلن افغانستان معاصر تاریخیده، اۉزبېکلر نینگ ایلک ییریک سیاسی و حربی جریانینی کوچلی فعال اېتیلیشیگه حصه قوشه‌دی.
احمدخان سمنگانی، افغانستان خلقی دیموکراتیک حزبی نینگ حکومتی قولهشی و مجاهدلر حکومتی اۉرته‌گه کېلیشی بیلن، سمنگان ولایت حاکمی اۉرین باسری و ۱۹ – فرقه قومندانی اوله‌راق فعالیت قیله‌دی. اوندن کېین سمنگان خلقی ایشانچ آوازی بیلن مملکت پارلمانی‌گه یۉل تاپیب، ملت وکیلی اوله‌راق فعالیت قیله‌دی.
نهایت احمدخان سمنگانی قویاش ۱۳۹۱ – ییلی ۲۴ – سرطان، قیزی نینگ توی مراسمی‌ده اۉیوشتیریلگن پارتلش هجوم نتیجه‌سیده جان بېره‌دی.
اوشبو هجومده احمدخان سمنگانی بیلن بیرگه کمیده ۲۰ کیشی جان بېریب و ینه ۴۰ کیشی یره‌لنگن اېدی. بو واقعه هم افغانستان‌ده یوز بېرگن کۉپلب قانلی باشقه واقعه‌لر کبی یاپیق قالماقده و حاضرگه قدر بوندی قانلی واقعه‌لرنی اۉیوشتیرگن شخص‌لر جوابگرلیککه تارتیلگن اېمس.
