طالبان، نظارتی‌ده‌گی ملی تیلویزیون خبری‌گه کۉره، طالبان تخار ولایتی چاه‌آب تومنیده‌گی آلتین/طلا کانینی ایشلب چیقاریش ایشلری باشلنیشیدن خبر بېرگن.
بو حقده نشر اېتیلگن خبرنی بیلدیریشیچه، اوشبو کان ۵ ییللیک، ۳۱۰ میلیون دالرلیک شرطنامه اساسیده چین-افغان قۉشمه شرکتی‌گه تاپشیریلگن.
خبرده ایتیلیشیچه، مذکور کان سۉنگی ایکی ییل دوامیده ایزلنیش(قیدیروو) باسقیچیده بۉلگن و حاضرده رسمی قازیب آلیش جریانی باشلنگن.
شرطنامه شرطلری‌گه کۉره، کان قازیب آلیشدن آلینگن درامدی‌نینگ ۵۶ فایزی طالبان حکومتی اولوشی‌گه تۉغری کېله‌دی.
طالبان‌نینگ کان و نفت وزیرلیگی رهبری هدایت الله بدری اوشبو شرکت‌دن شرطنامه اساسیده محلی اهالی‌گه خذمت کۉرستیشینی و ایش‌گه آلیش‌ده اولر اوچون استوارلیک بېریشنی سۉره‌گن.
طالبان حکومت‌گه قیتگنی‌دن کېیین افغانستانده‌گی طبیعی بایلیک‌لرنی قازیب آلیش‌گه کته اعتبار قره‌تگن.
شو بیلن بیرگه، افغانستان‌نینگ یېر آستی بایلیک‌لرینی تالان-تاراج قیلینیشی باره سیده جدی خواطرلر موجود. بو حالت اینیقسه، اهالی‌نینگ یریمی قشاقلیک و آچلیک‌دن اذیت چېکه‌یاتکن، تشقی انسان پرورلیک یاردمی بیلن کون کېچیره‌یاتگن بیر دورده صادر بۉلماقده
