افغانستان‌لیک تورک فعاللر و اولرگه تېگیشلی مدنی اویوشمه‌لر همده ناراضلیک حرکتلر بیرلشکن ملتلر تشکیلاتی‌گه آچیق مکتوب یازیب، آلمان حکومتی نینگ افغانستان‌لیک مهاجرلرنی چیقاریشی و بو خصوصده طالبان بیلن علاقه قوریشی همده ایران و پاکستان تامانیدن مهاجرلر چیقاریلیشی جدی‌لشگنیدن خواطر بیلدیردی.
ذکور مکتوب، افغانستان تورکلری‌گه تېگیشلی کمیده۱۸ اویوشمه، حرکت و مرکز تامانیدن تیارلنیب، نشر اېتیلگن.
مکتوب‌ده، آلمان، ایران و پاکستان حکومتلری تامانیدن افغانستان‌لیک مهاجرلرگه نسبتن آلینگن قرارلر همده بو مملکتلر طالبان بیلن علاقه قوریش‌لری تنقید اېتیلیب،اوشبو حرکتلر انسانی ارزش‌لرگه قرشی دېب اورغوله‌نگن.
افغانستان‌لیک تورک فعاللری نینگ تاکیدلشیچه، آلمان، ایران و پاکستان مملکتلری تامانیدن افغانستان‌لیک مهاجرلرگه نسبتن آلینگن قرارلر، ۱۹۵۱ – ییل تصدیق‌لنگن «جبری قیتریلمس‌لیک» کنوانسیونی بویروغ‌لریگه قرشی دیر.
شونینگدېک افغانستان‌لیک تورک فعاللر، افغانستان‌ده طالبان نینگ باسیم‌لری، زوره‌وانلیکلری و بو حاکمیت یره‌تگن آغیر شرایط‌لردن اېسلب، بو شرایطده انسان‌لر افغانستان‌گه قیتریلمس‌لیگینی سۉره‌گن.
بو فعاللر تامانیدن نشر اېتیلگن مکتوب‌ده کېلیشیچه “شوندی بیر شرایطده، انسان‌لر جانی ارزشی بۉلمه‌گن بیر مملکتده، مهاجرلر حتا اولرنینگ بیر بۉلیمی قیتریلیشی خصوصیده قرار آلینیشی، خلق‌ارا عدالت اساسیده بۉلمه‌ی بلکه تشقی سیاست‌ده اقتداگرلیک و برقرارسیزلیک نشانه‌سی دیر.”
عینی حالده افغانستان تورکلری فعاللری اۉز بیانات‌لریده، افغانستان‌لیک مهاجرلر ایران و پاکستان تامانیدن چیقاریلیشی برابریده خلق‌ارا همجمعیتی نینگ جیم‌لیگی و مهاجرلر افغانستان‌گه قیتریلیشی جریانی‌ده قوله‌یلیک یره‌تیلیشی مقصدیده، طالبان بیلن مناسبت قوریلیشی‌دن تنقید اېتیلیب، بو قرارلر عاقبتی‌دن آگاه‌لنتیریلگن.
ایتیش کېره‌ک که سونگی وقتلرده، ایران و پاکستان‌دن افغانستان‌لیک مهاجرلر چیقاریلیشی جدی‌لشگن و عینی وقتده، آلمان حکومتی هم طالبان بیلن مناسبت قوریب، ۸۱ افغانستان‌لیک مهاجرنی مملکت‌گه قیتردی.
