بیرلشکن ملتلر تشکیلاتی‌نینگ افغانستانده‌‌گی یاردمچی هیٲتی یاده «یوناما» کابل ده خاتین – قیزلرنینگ طالبان تامانیدن حبسگه آلینیشی یوزه‌سیدن تشویش بیلدیردی.
یوناما معلوم قیلیشیچه، بو باره‌ده قوشیمچه معلومات آلیش اوچون طالبان بیلن علاقه اورنه‌تیلگن.
بیرلشکن ملتلر تشکیلاتی اداره سی‌نینگ بیاناتیگه کۉره، اوشبو سۉنگی حبسلر خاتین – قیزلرنینگ ینه‌ده جمعیتدن چیتلنیشیگه، قۉرقوو محیطی کوچه‌یشیگه و جماعتچیلیک ایشانچی یۉقالیشیگه سبب بۉله‌دی.
یوناما طالبان نینگ انسان حقلری و خاتین – قیزلرنینگ اساسی اېرکینلیکلرینی چېکلاوچی سیاست و عملیاتلرنی بېکار قیلیشینی سۉره‌دی.
دیمک سۉنگی کونلرده طالبان نینگ “امر بالمعروف و نهی‌المنکر” اداره‌سی خادملری، کابلده بیر قطار یاش خاتین – قیزلرنی کیینیش اسلوبلری سببلی حبسگه آلگنی خبر قیلینگن اېدی. طالبان اوشبو عملیاتی دوامی‌ده، اۉتگن کېچه هم کابل نینگ غربی حدودلریدن بیر قنچه خاتین-قیزلرنی حبسگه آلگنی اَیتیلماقده.
طالبان تامانیدن خاتین- قیزلر حبسگه آلینیشی کېنگ ناراضیلیک‌گه سبب بۉلماقده. طالبان اېسه حاضرگچه حبسگه آلینگن بو خاتین-قیزلر تقدیری حقیده انیق تفصیلات بېرگن اېمس.
