فاریاب ولایتی مرکزی میمنه شهری‌ده فعال مکتب‌لردن آیدین خصوصی لیسه‌سی‌ده اۉتکزیلگن ادبی ییغین‌ده، بو یورت نینگ تانیقلی قلم ایگه‌لریدن بیری جمشید خورشید فاریابی یاد و خاطره‌سی اېسلنیب، اونینگ فرهنگی خذمت‌لری و ایجادلری قدرلندی.
بو احتفالده فاریاب نینگ اۉنلرچه شاعر، یازووچی و فرهنگی فعاللری ییغیلیب، رحمتلی جمشید خورشید جنابلری نینگ «سوسن چلچراغ‌من» ناملی شعرلر توپلنمه‌سینی تانیشتیردیلر.
دېیرلی رحمتلی خورشید جنابلری نینگ بو شعرلر توپلنمه‌سی، یاش شاعر و یازووچی محبوب الله توران آرقه‌لی ییغیلیب چاپگه تیارلنگن.
توران جنابلری اۉزبېک تی‌وی بیلن بۉلگن صحبت‌لریده بو اثر حقیده شوندی بیلگی بېره‌دی “بو اثرده جمعا ۲۸ پارچه استاد جمشید خورشیدنینگ فارسچه شعرلری ییغیلگن، افسوس بیلن استاد جمشیدگه حیات کۉپ فرصت بېرمه‌دی تا اۉزی‌دن کۉپ اثر قالدیرسه اېدی. اما کم بۉلسه هم جده معناگه بای شعرلر اۉزی‌دن قالدیردی.”
دیمک رحمتلی جمشید خورشید فاریابی قلمی‌گه منسوب «سوسن چلچراغ من» شعرلر توپلنمه‌سی، شاعر وفاتی‌دن کېین چاپگه تیارلنیب، شعریت شیدالری‌گه تقدیم اېتیلماقده.
جمشید خورشید فاریابی کیم اېدی؟
عنایت الله اۉغلی جمشید خورشید فاریابی، قویاش ۱۳۶۵ – ییلی فاریاب مرکزی میمنه شهری‌ده توغیلگن. خورشید فاریابی دستلبکی اۉقیش‌لرنی میمنه‌ده کېین اېسه لیسه دورینی شبرغان شهری «افغان-تورک» مکتبی‌ده بیتیرگن.
فاریاب نینگ تانیقلی بو شاعر و فعالی قویاش ۱۳۸۴ – ییل کانکور سیناوی آرقه‌لی کابل بیلیم یورتی ساینس بیلیم‌لری فاکولته‌سیگه یۉل تاپیب، قویاش ۱۳۸۷ – ییل اوشبو فاکولته‌نی بیتیره‌دی. شونینگدېگ خورشید جنابلری تورکیه نینگ قیصری شهریده‌گی «ایرجیس» بیلیم یورتیده هم ماسترلیک درجه‌سیده اۉقیش آلگن.
رحمتلی خورشید فاریابی آیدین بیلیم مرکزی همده آیدین خصوصی لیسه‌سی اۉقیتووچیلری و مسووللریدن اېدی. بوندن تشقری فاریاب دولتی کسلخانه‌سیده تورک تیلی مترجمی، فاریاب مدنی جماعه‌چیلیک اعضاسی همده بو ولایت احصاییه و معلومات اداره‌سی باشلیغی اوله‌راق فعالیت قیلگن.
جمشید خورشید فاریابی، ادبی و فرهنگی فعالیت‌لری، اۉقیتووچیلیک همده شونگه اوخشش باشقه خذمت‌لری بیلن فاریاب‌لیکلر اوچون حرمت‌گه سزاوار بیر شخص دیر.
فاریاب‌لیک بو کدر قویاش ۱۴۰۰ – ییل ۲ – دلو کونی، میمنه – اندخوی عمومی قتناو یۉلی‌ده یوز بېرگن ترافیکی حادثه نتیجه‌سیده جان بېریب، دنیادن کوز یومه‌دی.
