افغانستان سابق انسان حقلری کمیسیونی باشلیغی شهرزاد اکبر، بوگون پنجشنبه ۹ – اسد نشر قیلگن بیاناتیده، افغانستان عیاللری اوچون مخصوص محکمه ایش‌گه باشله‌گنیدن خبر بېردی.
دېیرلی بو محکمه «افغانستان عیاللر اوچون خلق محکمه‌سی» نامی آستیده، اۉز فعالیتی‌گه باشله‌گن.
ایتیلیشیچه بو محکمه، طالبان نینگ افغانستان‌ده خاتین-قیزلرگه نسبتن باسیم‌لر و چیکلاولریگه قرشی عدالت ایزلش مقصدیده فعالیت‌گه باشله‌گن.
افغانستان سابق انسان حقلری کمیسیونی باشلیغی نینگ یازیشیچه “ییللرچه آرزو و تدقیقات همده آی‌لرچه قوشمه محنتلردن کېین خرسندمن که افغانستان عیاللری اوچون خلق محکمه‌سی فعالیت‌گه باشله‌گنینی اعلام قیله‌من. امید قیله‌من بو محکمه آچیلیشی افغانستان عیاللری اوچون عدالت تامین‌لنیشی و امید یره‌تیلیشی‌گه کیچیک بیر آدیم بۉلالسه.”
ایتیلیشیچه، بو محکمه نینگ ییغینی جاری ییل اکتبر آیی‌ده، اسپانیا مملکتی نینگ مادرید شهریده اۉتکزیلیشی ریجه‌لشتیریلگن.
بو محکمه شوندی بیر حالده اۉز فعالیت‌نی باشله‌ماقده دیر که حاضرگی شرایط‌ده طالبان نینگ خاتین-قیزلرگه قرشی باسیم‌لر و چیکلاولری کونسه‌یین جدی‌لشیب بارماقده.
