اېسلتمە: بو مقاله تورغن فیض‌یف نینگ «تېموری ملکهلر» کتابی بیر بۉلیمی بۉلیب «Ziyo uz» سایتیده نشر اېتیلگن، مذکور مقاله اۉزبېک تی‌وی ژورنالیستی آرقه‌لی عرب الفباسیده اۉگیریلیب، بو یېرده سیزنینگ اختیارینگیزده قوییلگن.
گلبدن بېگیم ظهیر الدین محمد بابرنینگ دلدار بېگیم ناملی خاتینیدن توغیلگن اوچینچی قیزی دیر. گلبدن بېگیم ۱۵۲۳- ییلی کابلده توغیلگن. اونینگ آنه‌سی دلدار بېگیم‌نینگ حقیقی اسمی، صالحه سلطان بېگیم بۉلیب، ظهیر الدین محمد بابر میرزانینگ عمکی‌سی سلطان محمود میرزانینگ قیزی اېدی. گلبدن بېگیم آته‌سی پادشاه نینگ فرمانیگه کۉره کته آنه‌سی، یعنی همایون میرزانینگ آنه‌سی ماهیم بېگیم قۉلیده تربیه‌لنه‌دی. ماهیم بېگیم بابر پادشاه نینگ اېنگ سېویکلی کته خاتینی، حکمدارنینگ خاتینلری آره‌سیده اېنگ عاقله و بیلیمدانی اېدی. بنابر این، ۱۵۲۵ – ییلی گلبدن بېگیمنی ماهیم بېگیم اۉز تربیه‌سیگه آله‌دی. گلبدن بېگیم هر ایککله آنه‌سینی هم صمیمی اعزازلگن. او اۉز اره‌سیده آنه‌سینی «دلدار بېگیم» دېب، ماهیم بېگیمنی اېسه، «آنم حضرتلری» دېب تیلگه آله‌دی. گلبدن بېگیم ۱۵۲۹ – ییلگچه کابلده یشه‌یدی. بابر هندوستاننی قۉلگه کیریتگچ، ماهیم بېگیم بیلن بیرگه پادشاه آته‌سی نینگ حضوریگه آگراگه باره‌دی. آته‌سی بابر وفاتیدن سۉنگ، اکه‌سی همایون پادشاه سراییده یشه‌یدی. ۱۵۳۹- ییلده گلبدن بېگیمنی خضر خۉاجه خانگه تورموشگه چیقره‌دیلر. او بیر اۉغیل کۉره‌دی، اسمینی سعادتیار دېب اته‌یدیلر. ۱۵۵۶- ییلی همایون پادشاه وفاتیدن سۉنگ سلطنت تختیگه اونینگ اۉغلی جلال الدین اکبر شاه (۱۵۴۲-۱۶۰۵) اۉتگچ، شاه نینگ آنه‌سی حمیده بانو بیلن گلبدن بېگیم سراییگه، دهلیگه یېتیب کېله‌دیلر. انه شوندن سۉنگ، گلبدن بېگیم تا عمرینینگ آخریگچه جییه‌نی اکبر پادشاه سراییده یشه‌یدی.
گلبدن بېگیم اۉز زمانه‌سی نینگ عاقله، دانشمند عیاللریدن اېدی. او جییه‌نی جلال الدین اکبر پادشاه نینگ «فردوس مکان و جنت آشیان حضرت حقیده‌گی واقعه‌لردن نیمه که بیلسنگیز، یازینگیز»، دېگن اشاره‌سیگه موافق، «همایوننامه» ناملی عجایب و مهم تاریخی اثرینی یازیشگه کیریشه‌دی. «همایوننامه» بابر پادشاه بیلن همایون پادشاه نینگ حیات طرزی و سرگذشتلری نینگ مختصر تاریخی بۉلیب، منطقاً «بابرنامه»نینگ دوامی دیر. بو اثرنینگ مهم‌لیگی ینه شونده‌که، «بابرنامه» اثریده‌گی ایریم واقعه‌لرنینگ کېلیب چیقیش سببلری مکمل آچیب بېریله‌دی. گلبدن بېگیم اۉز اثریده سرای اهلی نینگ حیات طرزی، شونینگدېک، تاریخی اثرلرده اوچره‌میدیگن بابر پادشاه خاندانی نینگ نازک خصوصیتلری، عایله‌وی شرایطلری، طۉی و عزا بیلن باغلیق آدملر، اۉی-رۉزگار اسبابلری، میین-کېچیک تورلری کبی جهازلر حقیده مفصل حکایه قیله‌دی. اما افسوسکه، اثرنینگ آخرگی قسمی اوشه زماننینگ جنگلریده یۉقالیب کېتگن.
میر مهدی میرزانینگ «تذکرة الحیاتین» اثریده کېلتیریلگن «سېوگیسیز حیاتده معنا یۉق» مضمونیده‌گی ایککی بیتیگه قره‌گنده، گلبدن بېگیم نینگ غزلیاتیدن هم خبری بۉلگن. «اکبرنامه» اثری نینگ مولفی ابوالفضل نینگ بېرگن معلوماتی‌گه قره‌گنده، ۱۵۷۵- ییلده گلبدن بېگیم کۉبت الله زیارتیگه جۉنب کېته‌دی و ۱۵۹۲ – ییلده کۉپ قیینچیلیکلر بیلن زیارتگاه‌دن قه‌یتیب کېله‌دی. ابوالفضل نینگ یازیشیچه، گلبدن بېگیم ۱۶۰۳ – ییلده ۸۰ یاشیده وفات اېته‌دی. اکبر پادشاه اونی کته حرمت و احترام بیلن دفن اېتدیره‌دی. اکبر پادشاه نینگ اۉزی گلبدن بېگیم تابوتینی اۉغیلی صفتیده کۉتریب، دفن مراسیمیده اۉغیللیک بورچینی اعتمامیگه یېتکیزه‌دی.
