بوندن تۉرت ییل ایلگری، خودی شو کونده طالبان افغانستان پایتختی کابل شهرینی باسیب آلیش بیلن ایگیرمه ییللیک جمهوریت تیزیمینی یۉق اېتیب، اۉزلری نینگ امارت حکومت‌نی اعلام قیلدی.
افغانستان تاریخیده‌گی ییریک سیاسی و حربی بو اوزگریش‌دن تۉرت ییل اوتیشی بیلن هلی‌گچه، ایگیرمه ییللیک کوره‌شیشدن کېین قندی بیر دَمده حکومت بوتونله‌ی طالبان‌گه تاپشیریلیشی آچیق‌لنمه‌گن.
کۉپینچه ایشانچ‌لرگه کۉره، افغانستان حکومتی سِری معامله‌لر اساسیده طالبان‌گه تاپشیریلگن و شو باعث طالبان‌گه قرشی کوره‌شیشلر برابریده هم توسیق‌لیک یره‌تیلگن.
طالبان‌گه قرشی ییریک حربی قومندان‌لردن نظام الدین قیصاری، اۉزبېک تی‌وی گه بۉلگن صحبت‌لریده، طالبان‌گه قرشی کوره‌شیشی اوچون توسیق‌لیک یره‌تیلگنینی تیلگه آله‌دی.
قیصاری نینگ ایتیشیچه ” تۉرت ییل ایلگری‌ده‌گی جنگلرده، کۉپ رسانه‌لر و کتته‌کانلرگه صدا قیلدیم و ایتدیم که مینی میمنه و شبرغان‌گه یوبارینگلر مین طالبان برابریده اوروشه‌‌من، میمنه‌گه مینی یوبارینگلر اگر میمنه سقوط قیلسه مینی دارگه آسینگلر دېدیم، لیکن سیس‌لریمنی هیچ کیم ایشیتمه‌دی.”
تۉرت ییل ایلگری، طالبان کمیده بیر آی ایچیده شوندی بیرحالده افغانستان‌نی باسیب آلدی که دوحه‌ده افغانستان تقدیری حقیده سۉزلشوولرنی دوامی بار اېدی. افغانستان سابق جمهور باشلیغی اشرف غنی طالبان‌گه قرشی اوروش‌لرنی ناتۉغری باشقیریشی و نهایت مملکت‌دن قاچیب کېتیشی جمهوریت تیزیمی قوله‌شی‌گه سبب بۉلدی.
حاضر تۉرت ییل‌دن بویان، افغانستان حاکمیتی آستیده سیاسی تقدیرسیزلیکلرگه قوشیمچه، انسان حقلری و باشقه ساحه‌لرده اینگ آغیر و قرانغو کونلرنی باش‌دن کېچیرماقده دیر.
طالبان حاکمیتیده بیر نیچه وقت افغانستان‌ده یشه‌گن سابق حربی‌لردن نظام الدین قیصاری، طالبان حاکمیتیده‌گی افغانستان کېله‌جگی و طالبان نینگ یانده‌شوولری عاقبتیدن خواطرده.
قیصاری نینگ آرتیق‌لشیچه “طالبان‌دی برنامه‌سی شو دیر که تورکتبارلر و اۉزبېکلر بوتونله‌ی افغانستان‌دن حذف بۉلسه، اۉزبېک و تورکمن‌لرنینگ مالی اختیاریده اېمس، همه‌سی طالب و پشتون‌لر اختیاریده دیر.”
ایتیش کېره‌ک که افغانستان‌ده طالبان حاکمیتی ییللیگی شوندی بیرحالده ییتیب کېلماقده دیر که اهالی احوالی اقتصادی کۉرینیش‌دن آغیر و مملکت کېله‌جگی هم ناانیق بیر وضعیت‌گه توشیب قالگن.
