بلخ ولایتی مرکزی مزارشریف شهریده تاریخ و تیلی‌میزنینگ پارلاق یۉلدوزی حضرت امیر الکلام میرعلیشیرنوایی حضرتلری نینگ هیکلی، بیوگرافیسی و شعرلری نمونه‌سی طالبان تامانیدن یۉق اېتیلیشی کینگ مناسبت‌لرگه سبب بۉلماقده و بو ییرده اوشبو مناسبت‌لردن بیر بۉلیمی سیزنینگ اختیارینگیزده قوییلگن.
نوایی هیکلی یۉق اېتیلیشی؛ ارسلان: مسووللر بو حقده آچیقلیک بېرسین
مزارشریفده نوایی هیکلی یۉق اېتیلیشی برابریده‌گی مناسبت‌لر دوامی‌ده، کابل بیلیم یورتی اۉزبېک تیلی و ادبیاتی استادی عبدالحنان قیلیچ ارسلان مسووللردن بو حقده آچیقلیک بېریش‌لرینی سۉره‌دی.
عبدالحنان قیلیچ ارسلان جنابلری، بو هیکل شرعی و بلدیه ایشلری بهانه‌سی بیلن یۉق اېتیلیشی قانقرلی اېمس دېب اورغوله‌گن.
شونینگدېک بو حرکتلر بیلن نوایی قدر و قیمتی کم بۉلمه‌یدی بلکه قلب‌لرده تاباره آشه‌دی دېب معلوم قیلدی.
نوایی هیکلی یۉق اېتیلیش؛ نیازی: تار فکرلی متعصب‌لر جاهل‌لیگینی نمایان اېته‌دی
ژورنالیست و فعال نجیب الله نیازی نوایی هیکلی یۉق اېتیلیشی برابریده یازگن بیاناتیده، بو بیلن نوایی نینگ بی‌بها میراثی، یوکسک سیاسی مقامی همده علمی و مدنی فعالیتلری میلیون‌لب معرفت‌پرور و علم‌سیور انسانلر قلبیدن هیچ قچان اوچیریلمه‌یدی دېب بیلدیردی.
شونینگدېک نیازی جنابلری، بو حرکت تار فکرلی متعصب‌لرنینگ قنچه‌لیک جاهل بۉلگنینی کۉرسه‌تدی دېب یازگن.
نوایی هیکلی یۉق اېتیلیشی؛ بابر فرهمند: نوایی هیکلی یۉق اېتیلیشی بو یورت تاریخینی اۉلدیریلیش دیر
مزارشریف شهریده حضرت امیرعلیشیر نوایی نینگ هیکلی یۉق اېتیلیشی‌گه نسبتن مناسبت‌لر دوام اېتر اېکن، سابق حکومت سیاسی سیمالریدن عنایت الله بابر فرهمند هم بیر بیانات یازیب، بو حرکت برابریده اۉز مناسبت‌نی بیلدیردی.
فرهمند جنابلری، طالبان تامانیدن نوایی هیکلی یۉق اېتیلیشی بو یورت اوتمیش‌دن قالگن میراث‌گه حرمت‌سیزلیک دېب، طالبان بو حرکت‌نی قارله‌لدی.
شونینگدېگ سابق سیاسی سیمالردن بو کیشی، نوایی هیکلی یۉق اېتیلیشی، بو یورت تاریخینی اۉلدیریش معناسیگه دېب معلوم قیلگن.
عینی حالده، فرهمند جنابلری خلق‌ارا تشکیلات‌لر و انسان حقلری فعاللریدن، بوندی حرکت آلدی آلینیشی و انسانیت تاریخی و مدنیتی سقلنیشی اوچون اعتبار قره‌تیشلرینی سۉره‌دی.
نوایی هیکلی یۉق اېتیلیشی؛ مدثر: طالبان نینگ مدنیتگه نسبتن دشمن‌لیگینی کۉرسه‌تدی
ژورنالیست و انسان حقلری فعالی محب مدثر، مزارشریف شهریده حضرت امیرعلیشیر نوایی هیکلی طالبان تامانیدن یۉق اېتیلیشی برابریده مناسبت بیلدیریب، طالبان بو حرکت‌نی قاره‌لدی.
مدثر جنابلری طالبان بو حرکتی ینه بیربار، بو گروه نینگ افغانستان خلقی مدنیتی‌گه نسبتن دشمن‌لیگینی کۉرسه‌تدی دېب اورغوله‌گن.
…..
تیمور: نوایی قلب‌میزده دیر
بدخشان‌لیک فعال مسعود تیمور، حضرت نوایی هیکلی یۉق اېتیلیشی برابریده مناسبت بیلدیریب، «سیز بیزنینگ تیلی‌میزده اېمس، بلکه قلب‌میزده سیز» یازگن.
…..
تاتار اۉغلی: باشقه مملکتلر میلیونلرچه دالر خرجت بیلن نوایینی قدرله‌یدی
بلخ ولایتی مرکزی مزارشریف شهریده، طالبان تامانیدن حضرت امیرعلیشیر نوایی هیکلی یۉق اېتیلیشی برابریده‌گی مناسبت‌لر دوامی‌ده، اۉزبېک یاش فعاللردن شیرآغا تاتار اۉغلی، بو حرکت‌گه قۉل اۉرگن افغانیت توشینه‌سی تاریخ و بشریت اوچون ننگ دېب یازدی.
تاتار اۉغلی نینگ یازیشیچه «نوایی هیکلی اروپا و امریکا همده قزاقستان، اۉزبېکستان و تورکمنستان کبی تورکستان دولتلریده. اولر نوایی اثرلری اوستیده تدقیقات قیلیش و ترجمه قیلیش اوچون هر ییلی میلیونلرچه دالر خرجت قیلیب بو اولوغ سیمانی اېسله‌یدی.»
ساعی: بو ایش افغانستان خلق‌لری آره‌سیده ینگی فتنه‌لرگه سبب بۉله‌دی
افغانستان سابق سیاسی سیمالریدن محمدعالم ساعی، مزارشریف شهریده طالبان تامانیدن حضرت امیرالکلام میرعلیشیر نوایی هیکلی، بیوگرافیسی و شعرلری نمونه‌سی ویران اېتیلیشینی قاره‌لدی.
جناب ساعی طالبان بو حرکتی، دینی و مذهبی توشینچه‌لر اساسیده اېمس، بلکه دینی بویروغ‌لرگه ضد جاهللیک بیر حرکت دېب بیلدیردی.
سابق سیاسی سیمالردن بو کیشی، مذکور حرکت افغانستان خلق‌لری آره‌سیده تفرقه سالیب، ینگی فتنه‌لرگه سبب بۉلیشینی معلوم قیلدی.
شونینگدېک ساعی جنابلری، طالبان بو حرکتی تورکستان و قطغن نینگ میلیونلرچه نینگ خاطره‌لریده تاریخده‌گی اچچیق صحیفهلرنی قیته تیریلتیردی دېب اورغوله‌دی.
….
اندیش: تورک مدنیتی بیلن دشمن‌لیک آچیق‌لندی
یاشلر فعاللردن طاهر اندیش، مزارشریف شریف‌ده نوایی هیکلی یۉق اېتیلیشی برابریده مناسبت بیلدیریب «حضرت امیرعلیشیر نوایی هیکلی یۉق اېتیلیشی بیلن پشتونیزم تورک مدنیتی‌گه قرشی اۉز دشمن‌لیگینی آچیق‌لدی.» دېب تاکیدلگن.
احدی: طالبان حکومتیدهگی اۉزبېک عملدارلر اعتبار قره‌تسین
بلخ ولایتی مرکزی مزارشریف شهریده، طالبان تامانیدن حضرت امیرعلیشیر نوایی هیکلی یۉق اېتیلیشی‌گه مناسبت‌لر دوامی‌ده، ژورنالیست نصرت الله احدی بو حرکت اۉزبېکلرگه قرشی حرمت‌سیزلیک دېب بیلدیردی.
احدی جنابلری بو حقده یازگن بیاناتیده، بو حقده شوندی دېب یازگن « بو تۉغریده اسلام امیرلیگی حکومتی باشیده بۉلگن اۉزبېک عملدارلری، وقتینچه‌لیک چوکینی قۉلدن بېریشدن و باشی کسیلیشیدن قورقمه‌ی، حکومت گه قرشی تیک توریش‌لرینی ایسته‌یمیز.»
شونینگدېک احدی جنابلری، بو تۉغریده اۉزبېکستان دولتی هم اعتبار قره‌تیش کېره‌ک دېب معلوم قیلگن.
سیاره رحمانی: بو حرکت اۉزبېکلرگه کته جفا دیر
بلخ ولایتی مرکزی مزارشریف شهریده، حضرت امیرعلیشیر نوایی هیکلی یۉق اېتیلیشی‌گه نسبتن مناسبت‌لر دوام اېتر اېکن، ژورنالیست، یازووچی و فرانسه‌ده مهاجرلر پارلمانی نینگ اعضاسی سیاره رحمانی بو حرکت‌نی قتتیق قاره‌لدی.
خانم رحمانی بو حقده یازگن بیاتاتیده، طالبان بو حرکتی اۉزبېکلرگه قرشی کتته جفا دېب بیلدیرگن.
فرانسه مهاجرلر پارلمانی بو اعضاسی نینگ یازیشیچه « افغانستان نینگ آغیر شرایطیده کونگلیمیزنی ایسیتیب تورگن اوشبو یادگارلیکنی بوزیب تشله‌نیشی اۉزبېکلرگه کته جفا. بیر مدنیتگه تیگیشلی اېسده‌لیکنی یۉق اېتیش اوچون آلغه سوریلگن هیچ بیر دلیل قانیقرلی اېمس! بو- اۉزبېک دیگن آتیمیزنینگ بوگونی و کیله‌جگیگه کته خطر یره‌ته‌دی.»
خانم رحمانی بیاناتیده، نوایی حضرتلری نینگ دولت‌چیلیک و عدالت‌ده قالدیرگن بویوک میراثی تاکید اېتیلگن.
