بلخ ولایتی مرکزی مزارشریف شهریده تاریخ و تیلی‌میزنینگ پارلاق یۉلدوزی حضرت امیر الکلام میرعلیشیرنوایی حضرتلری نینگ هیکلی، بیوگرافیسی و شعرلری نمونه‌سی طالبان تامانیدن یۉق اېتیلیشی کینگ مناسبت‌لرگه سبب بۉلماقده و بو ییرده اوشبو مناسبت‌لردن بیر بۉلیمی سیزنینگ اختیارینگیزده قوییلگن.
نوایی هیکلی یۉق اېتیلیشی؛ تابان: بو حرکت طالبان‌نینگ چوقور دشمن‌لیگی دیر
بلخ ولایتی مرکزی مزارشریف شهریده حضرت امیرعلیشیر نوایی هیکلی طالبان تامانیدن یۉق اېتیلیشی برابریده، سابق حکومت سیمالریدن بسم الله تابان جنابلری هم مناسبت بیلدیردی.
جناب تابان بو حقده یازگن بیاناتیده، بشریت فخری همده بویوک دانشمند بۉلمیش نوایی حضرتلری نینگ هیکلی یۉق اېتیلیشی طالبان نینگ چوقور دشمن‌لیگی همده خلق‌میز بارلیکلریگه نسبتن بو گروه یانده‌شووینی بیللی قیله‌دی دېب یازگن.
تابان بیاناتیده تاکیدلنیشیچه، طالبان بو یانده‌شوولری بیلن افغانستان جماعه‌سینی شوندی یره‌لنتیرگن که تیزلیکده و قوله‌یلیک بیلن داولنمه‌یدی.
ناجی: نوایی ایجادلری بیلن منگو قاله‌دی
آزادلیک جبهه‌سی نینگ سیاسی کمیته‌سی باشلیغی و هزاره خلقی نینگ تانیقلی و ییریک فعاللریدن داود ناجی بیر بیانات یازیب، مزارشریف شهریده حضرت نوایی هیکلی یۉق اېتیلیشی برابریده مناسبت بیلدیردی.
داود ناجی جنابلری نینگ آگاه‌لنتیریشیچه، نوایی هیکل‌نی بوزگن بالقه تیزلیکده نوایی باله‌لری نینگ آرقه سویه‌گیده هم اۉریله‌دی.
شونینگدېک آزادلیک جبهه‌سی نینگ سیاسی کمیته‌سی باشلیغی، نوایی و تیموری‌لر آبادانچیلیک و مدنیت اوچون قوشگن حصه‌سیدن اېسلب، نوایی ایجادلری بیلن منگو قاله‌دی دېب بیلدیردی.
ثانی: مدنیت‌گه قرشی بو حرکت دنیاگه ییتیشتیریلسین
بلخ ولایتی مرکزی مزارشریف شهریده، حضرت نوایی هیکلی یۉق اېتیلیشی برابریده‌گی مناسبت‌لر دوامی‌ده، سیاسی و مدنی فعاللردن فرهاد ثانی هم بیر بیانات یازیب، بو حقده مناسبت بیلدیردی.
ثانی جنابلری نینگ بیاناتیده، طالبان نینگ بو مییه قاره‌لیگیدن تورکی دولتلر هم آگاه بۉلیش‌لرینی طلب قیلیب، بو خصوصیده اوشبو مملکتلر ژورنالیست‌لری و فعاللریدن حکومت‌لرینی توشینتیریش‌لرینی سۉره‌دی.
عینی حالده جناب ثانی، بو قرانغو کونلر بیر کون یکونلنیب، تورکلر اۉز توپراق‌لریگه ینه ایگه چیقیش‌لریگه امید بیلدیردی.
ایل‌سیور: بو ایش‌گه قۉل اۉرگنلر اۉز تعصب و نادانلیکلرینی اثبات‌لدی
خلق‌میزنینگ تانیقلی شاعر، یازووچی و ژورنالیستی مزارشریف شهریده حضرت امیرعلیشیر نوایی هیکلی یۉق اېتیلیشی، تار فکرلی و تحجرلی اویلاوگه ایگه کیشی‌لرنینگ ایشی دېب مناسبت بیلدیردی.
جناب ایل‌سیورنینگ یازیشیچه «نېگه اۉزیمیزنی افغانستانلیک تنیشتیرگنیمیزده چېت اېللیکلر کۉزیگه اېنگ جاهل، ایرتقیچ و ترورچی کۉریله‌میز؟نېگه افغانستانلیکلر دنیاده انسان صفتیده تن‌آلینمه‌یدی؟ بولرنینگ برچه‌سی‌گه منه‌شو بیر مشت سۉقور، دنبا قره‌شی تار، جهل مرکبده‌گی افراطچی و متحجر کیشیلر باعث دیر.»
ایل‌سیور بو حرکت مدنیت و اسلامیت‌گه قرشی دېب، اونگه قۉل اۉرگن کیشیلر اۉز تعصب و نادانلیکلرینی اثبات‌لدی دېب بیلدیرگن.
راحله دوستم: خلق‌ارا هم‌جمعیتی بو حرکت برابریده چاره کۉرسین
افغانستان سابق حکومتی سنا کېنگشی نینگ کاتبی حاجی راحله دوستم، مزارشریف شهریده نوایی هیکلی یۉق اېتیلیشی، طالبان نینگ مدنیت و تاریخی بارلیکلرگه قرشی چوقور دشمن‌لیگینی نمایان اېتدی دېب بیلدیردی.
راحله دوستم بو حقده نشر قیلگن بیاناتیده، طالبان بو حرکتی یالغیز تیموری‌لر دوری نینگ بو بویوک سیماسی همده شعریت اربابی‌گه حرمت‌سیزلیک اېمس بلکه افغانستان بوتون خلق‌لری نینگ مشترک بارلیکلرینی خوارلش دېب تاکیدلدی.
شو بیلن بیرگه راحله دوستم، خلق‌ارا هم‌جمعیتی بوندی مدنیت‌گه قرشی حرکتلر برابریده چاره کۉرینیشی سۉره‌گن.
اونچی‌زاده: تورکلر مدنیتی‌گه نسبتن کۉر-کۉرانه دشمن‌لیک دیر
عیاللر حقلری تانیقلی فعالی فرخلقا اونچی‌زاده، طالبان تامانیدن مزارشریف شهریده حضرت امیرعلیشیر نوایی هیکلی بوزیلیشنی قاره‌لدی.
اونچی‌زاده بو حقده یازگن بیاناتیده، بو حرکت طالبان نینگ تورکلر مدنیتی‌گه قرشی کۉر-کۉرانه دشمن‌لیگینی نمایان قیلدی دېب بیلدیرگن.
شونینگدېک عیاللر حقلری بو فعالی، طالبان هیچ قندی کوچ نوایی میراث‌نی یۉق قیلالمسلیگینی بیلیب قوییشینی تاکیدلدی.
صارم: بو سلطه‌جویلیک و قبیله‌وی اۉیله‌شلر محصولی دیر
مزار شریف شهریده حضرت نوایی هیکلی یۉق اېتیلیشی برابریده‌گی مناسبت‌لر دوامی‌ده، خلقی‌میزنینگ یاش فعاللریدن صمد صارم جنابلری هم بیر بیانات یازیب، طالبان بو حرکت‌نی قاره‌لگن.
صمد صارم نینگ یازیلیشیچه، بو حرکت سلطه‌جویلیک و قبیله‌وی فاشیزم محصولی دېب، بو ایشلر دوامی اۉزبېکلر مدنیتی اوچون ضررلی بۉلگنینی تاکیدلدی.
شونینگدېک صارم جنابلری، افغانستان‌ده تورکلر مدنیتی‌گه قرشی حرکتلر جمله‌دن مدنی بارلیکلرنی یۉق اېتیش و اۉزبېکلر حدودلری نامینی اوزگرتیریش‌لردن اېسلب، بو ایش‌لرگه قۉل اۉرگنلر تاریخ‌دن عار قیلیش‌لرینی بیلدیردی.
عینی حالده، صارم جنابلری خلق طالبان بو حرکتلریدن عقده‌لنگینی اېسلب، کونی کېلیب جوابرگرلیککه تارتیلیش‌نی معلوم قیلدی.
قرلق: بو حرکت هیچ قندی شرعی اساس‌گه ایگه اېمس
افغانستان سابق سیاسی سیمالریدن و دین عالملریدن بیری مولوی عبدالله قرلق حضرت نوایی نینگ هیکلی بوزیلیشی هیچ قندی شرعی اساس‌گه ایگه اېمس‌لیگینی بیلدیردی.
مولوی قرلق نینگ یازیشیچه «بویوک شاعر و عالم امیرعلیشیر نوایی هیکلی بوزیلیشی هیچ قندی شرعی اساس‌گه ایگه اېمس و بو ایش دین و دینی قدریت‌لرگه اصلا باغلیق اېمس دیر.»
لبیب: بیر اولوغ اۉلیک، مینگ‌ته تیریک آدم‌گه رقیب دیر!
یاش فعاللردن مظهرالدین لبیب مزارشریف‌ده حضرت نوایی هیکلی بوزیلیشینی مناسبت بیلدیریب، «بیر اولوغ اۉلیک، مینگ‌ته تیریک آدم‌گه رقیب دیر» دېب تاکیدلدی.
یاش فعاللردن بو کیشی نینگ یازیشیچه « حضرت نوایی‌نینگ تندیسی سیندیریلگنی بیلن اونینگ درجه و مقامی‌گه هېچ قنده‌ی بیر کمچیلیک کېلمی، بلکه خلق اۉرته‌سیده تاباره کوتریله‌دی. نوایی‌نینگ قدر و قیمتی بوتون آسیا خلقی و اینقسه بوتون تورک ملتی آلدیگه نهایتده یوقاری درجه‌گه توتیله‌دی، بو اوچون او عالی‌جناب‌نینگ اۉرنی “یوره‌ک‌لرده سقلنه‌دی نه تاش یوزه‌سی‌گه”!
تورکتبار عیاللر حرکتی: نوایی میراثی قلب‌میزده تیریک دیر
افغانستان تورکتبار عیاللری حرکتی بیر بیانات نشر قیلیب، طالبان تامانیدن حضرت امیرالکلام میرعلیشیر نوایی هیکلی بوزیلیشی برابریده مناسبت بیلدیردی.
افغانستان تورکتبار عیاللری بیاناتیده کېلیشیچه، طالبان نینگ بو حرکتی تورکتبار عیاللر چوقور باغلیق بۉلگن اۉزلیکلری بیر بۉلیمینی یۉق اېتیش دیر.
شونینگدېک افغانستان تورکتبار عیاللری حرکتی حاضرگی شرایطده، افغانستان‌ده تورلی خلقلرگه قرشی بو کبی یانده‌شوولر و باسیم‌لر آشگنیدن خواطر بیلدیریب، طالبان بو حرکت‌نی مدنیت‌گه ضد بیر یوریش دېب معلوم قیلگن.
عینی حالده افغانستان تورکتبار عیاللر حرکتی خلق‌ارا هم‌جمعیتی و انسان حقلری تشکیلاتی، افغانستان‌ده تورکلر مدنیتی و تورک عیاللر احوالی‌گه دقت اېتیش‌لرینی سۉره‌ب، بو کبی طالبان حرکتلری آلدینی آلینیشینی تاکیدلگن.
خلیلیار: نوایی سیوگی، تفکر، مدنیت و ایرکین بیر خلق نینگ غروری دیر
مزارشریف نوایی حضرتلری نینگ هیکلی بوزیلیشی برابریده بۉلگن مناسبت‌لر دوامی‌ده، ژورنالیست و عیاللر حقلری فعالی فروزان خلیلیار تاریخ‌میزنینگ بو پارلاق سیماسی بوندی مدنیت‌گه قرشی حرکتلر بیلن یۉق اېتیلمه‌یدی دېب بیلدیردی.
خلیلیار حضرت نوایی ایجادلری و میراثی بیلن منگو قالگنینی بیلدیریب، بو بویوک سیما یالغیز بیر شخص اېمس بلکه «سیوگی، تفکر، مدنیت و ایرکین بیر خلق نینگ غروری دېب تاکیدلدی.»
شونینگدېک خانم خلیلیار، نوایی هیکلی بوزیلیشی اونینگ قدر و قیمت‌‌نی آزه‌یتیرمه‌دی بلکه جاهللر یوزینی آچیق‌لدی دېب بو جنایت جاهللر اوچون بیر عار بۉلگنینی بیان قیلدی.
….
کاظمی: بو حرکت «اۉزلیک، بیلیم و تاریخ» بیلن دشمن‌لیک دیر
مقاومت جبهه‌سی نینگ عیاللر کېنگشی باشلیغی زهرا کاظمی، طالبان تامانیدن امیرعلیشیر نوایی حضرتلری نینگ هیکلی بوزیلیشینی قاره‌لدی.
خانم کاظمی بو حقده نشر قیلگن بیاناتیده، بو حرکت بیلیم، مدنیت، اۉزلیک و افغانستان خلقی نینگ تاریخی‌گه قرشی چوقور دشمن‌لیک دېب بیلدیرگن.
شونینگدېک زهرا کاظمی، طالبان بو یانده‌شوولری بیلن اۉرته‌گه کېلگن یره‌لر تیزلیک بیلن دوالنمس‌لیگینی تاکیدلدی.
خانگیلدی: جهل طایفه‌سی تورکستاننی اشغال قیلماقده
خلق‌میزنینگ یاش و تویغولی یازووچیلریدن امین الله نایل خانگیلدی نوایی بابا هیکلی بوزیلیشی‌گه نسبتن بۉلگن یازوولریدن بیری‌ده ایتیشیچه « انسانلیک و مدنیت دشمنی بولگن جهل طایفه‌سینی، انچه مستقل تورکستاننی قورقینچه مقدس یورتیمیزدن هیده‌ب بیله‌میز. بولمسه بو طایفه کوندن کونگه تورکستاننی اشغال قیلیشگه دوام ایته‌دی!»
