صدرالدین انتظار جوزجانی, حاجی عبدالرحیم اوغلی۱۳۲۲ نچی ییل، سرپل شهری نینگ عربخانه گذریده دنیاگه کیلدی. باشلنغیچ مکتبنی سرپل شهریده‌گی منهاج السراج مکتبیده بیتیرگن. کیین مزار شریف نینگ اسدیه دارلعلومیده سکیز ییل اۉقیب, ۱۳۴۴ نچی ییلیده تمام قیلگن. انتظار, مدرسه‌ده حرمتلی عالم مولوی محمد حنیف «حنیف» دن فیض آلگن. قوشیمچه قیلگنده قاضی ضیاء الدین «ضیاء», قاری صاحب الحاج محمد عظیم «عظیمی» و استاد غلام محمد «خدیم» نینگ شاگردی بۉلگن.
صدرالدین انتظار اوسمیرلیک چاغیدن آق موسیقه گه, تصنیف یازیشگه و یاقملی اشوله‌لر یره‌تیشگه چوقور علاقه‌سی بار ایدی. شو قیزغین علاقه‌لری طفیلی اۉزبېک موسیقه ساحه‌سیده بیرینچی مرته, سرپلده‌گی گلشن گروهی یا اراکسترینی نیچه هم کسبلری حرمتلی محمد الله نوری, محمد اعظم عظیمی, استاد محمد شفیع عظیمی, ملا تاج محمد سرپلی‌لر بیلن بیرگه تاسیس اېتدی. سونگره, ظفر گروهی بیلن موسیقه بابیده اینگ یارقین فعالیتلرده کۉریندی. کیینلری, اندخویلیک استاد غفور جان وفا, ینگلخان باور, عبدالله ایرکین و باشقه بیر قنچه یاش موسیقه شیدالری بیلن بیرگه موسیقی فعالیتنی دوام ایتیردی.
انتظار جوزجانی, اۉنلب کوی و اشوله کمپوز قیلیب کویله‌گن. او، انچه کوپ تصنیف هم یازگن. او اجرا ایتگن اونلب اشوله و اۉزبېک خلق فولکلور قوشیقلری افغانستان ملی رادیو تلویزیونی, آیینه و باتور تلویزیونلری آرشیفلری همده مخلصلر نینگ قاشیده سقلنماقده. انتظار, اوزاق ییللر یاقملی اشوله و قوشیقلری بیلن خلقیمیز کونگیلیگه قووانچ بغیشلب کیلگن. او, میراثیمیز بولگن اوزبیک ایسکی خلق اشوله و قوشیقلرینی تازه‌لب کویله‌گن. قبتالیده ینگی کویلر ایجاد قیلگن.
انتظار نینگ کوپ مشهور اشوله‌لری بار. اینگ کوپ ترقلگنی و خلق کونگیلیگه باتگنلری: «افغانستان-افغانستان», «مریم جان», «کیلدیا کیلدیا ینگی دوران», «مولوده», «آییم آپه جان», «صنم جان», «گل پری», «سرپل دن», «گلنار جان» و باشقه قوشیقلر دیر. قوشیمچه قیلسک انتظار, ملا تاج محمد سرپلی نینگ اۉقیگن موسیقه‌لری نینگ یره‌تووچسی دیر. کیینلری اېسه اۉزی و باشقه‌لر هم اۉقیگنلر.
شونینگ دیک, رحمتلی انتظار جوزجانی نینگ سیماسی مدنیت ساحه‌سیده بیر نیچه قیره‌گه ایگه دیر. شبهه‌سیز بیرینچی اۉرینده, اونینگ صنعتچی سیماسی پارلب توره‌دی. چونکه اۉزی شغله‌نیش و فعالیت قیلیشدن تشقری, کویلردی و یازردی. اینیقسه, چالغوو بویوملر آره‌سیدن دف یا دایره چلیش استعدادیگه ایگه اېدی. موسیقه و شعر بیرـبیراوینی مکمل قیله‌دیگن قوش نینگ ایکی قناتیگه اوخشه‌یدی دیسک، مبالغه بۉلمه‌یدی. انتظار، خوددی قوشگه اوخشش ایکی قناتگه ایکه اېدی. چونکه اشوله‌چی بۉلیش یانیده یخشیگینه شاعر هم اېدی.
رحمتلی صدرالدین انتظار ۱۳۴۰نچی قویاش ییلی شعر یازیشگه باشله‌گن. «گلشن ایچره» اونینگ شعری توپلمی دیر. بو شعری توپلم ۱۳۸۶ قویاش ییلی (۲۰۰۷ میلادی ییلی) گلوبل پارتنر یا جهانی همکارلیکلر موسسه‌سی یاردمی بیلن باسیمدن چیققن. بو شعری توپلم وطن سیورلیک, ملت سیورلیک, علم سیورلیک, تینچلیک و فصللر گوزه‌لیگی و باشقه موضوعلر حقیده بۉلگن مضمونلی شعرلرنی اۉز ایچیگه آله‌دی. اورنک: وطن حقیده, شهید سن, اولوغ بابام, صلح ترانه‌سی, دهقان حقیده, سواد اورگن و باشقه شعرلریده یققال کۉریشیمیز ممکن. (حلیم یارقین جنابلری نینگ سۉزلریگه کۉره، «او، اوقیگن قوشیقلر نینگ ۳دن بیر قسمی موسیقه خزینه‌میزده‌گی اشوله و قوشیقلر دیر که تاج محمد سرپلی بیلن تینگ‌مه تینگ ایجاد قیلیب, اۉزبېک موسیقه‌سی نینگ پاغانه‌لریگه چیققنلر.»
گونی تورکستان نینگ چیبر چالغووچی‌سی حرمتلی استاد محمد شفیع عظیمی جنابلری, اوز اېسده‌لیکلریده اونی شونده‌ی اېسله‌یدیلر. »رحمتلی انتظار همده رحمتلی محمد الله نوری نی ایلک بار بابام رحمتلی عظیم عظیمی جنابلری نینگ بالا خانه‌لریده که او پیت نینگ موسیقه دنیاسیده خوددی قطب یولدوزی اېدی, کۉرگن اېدیم. محمد الله نوری جنابلری مادولین چه‌لر ایکن, انتظار جنابلری هم دایره یا دف چه‌لیب, قوشیقلر کوییلر و اوقیه‌ر اېدی. مین اوشه پیت حالی بو گروه‌گه قوشیلیب رباب چه‌لمس ایدیم. کیینراق مینده بو گروه یعنی گلشن گروهی بیلن تویلرده, احتفاللرده و کابل رادیوسی سفرلریده بیرگه اېدیم. اولر بیلن موسیقه ساحه‌سیده انچه فعالیتلرده کۉرینگن‌میز. اولر نینگ روحی شاد بۉلسین.«
رحمتلی انتظار نینگ اۉغلی, جاوید انتظار قبله گاهی نینگ شعری دفترلرینی و تصنیفلرینی چاپ قیلگن.
ینه اونینگ تونغیچ فرزندی آته‌لری تصنیف قیلگن قوشیقلرنی، شعرلرینی و باشقه‌لر کویله‌گن اشوله‌لرینی توپله‌گن. بو مجموعه کتاب نینگ اسمی «قوشیقلر سلطنتی» دیر. اونینگ دری شعر توپلمی «گنج جاویدان» ۱۳۷۷ نچی ییلیده باسیلگن.
بوندن تشقری انتظار شبرغان نفت و گاز نینگ قیدیرو باشقرمه‌سی نینگ تخنیک خادمی بولگن.
سارا دسن شونده‌ی دیگن ایکن: «موسیقه بویوک بیرلشتیرووچی کوچ دیر. عجایب و ایشانیب بولمس قوت. حتی هر نرسه‌ده بیر-بیریدن فرق قیله‌دیگن آدملر هم موسیقه ده عمومیلیک تاپه آله دی.» بیش دهه() دوامیده, ۱۳۴۰ ییلدن حاضرگچه, او موسیقه‌چی و شاعر صفتیده اۉزبېک-تورک فلوکلور قوشیقلرینی دوام ایتریدی. رحمتلی صدرالدین انتظار جوزجانی ۱۴۰۱ نچی ییلی قوس آیی نینگ ۱۷.سیده وفات ایته‌دی. او، وفاتیدن بیر نیچه کون آلدین ترافیکی حادثه طفیلی شفاخانه‌گه یاتقیزیلگن اېدی. او، آته بابالری نینگ مزارلیگیده دفن اېتیلگن.
«موزیک, انسانلیک نینگ ایورنسل تیلی دیر» دیگنلری دیک, بیر ملت نینگ موسیقه‌سی اولر نینگ کیملیگی دیر؛ حسلر, تیل, توره و ایشانچلرینی عکس ایتیره‌دی.
