اۉزبېک ادبیاتی و تیلی‌نینگ ییریک چناری قوله‌دی. افغانستان شمالیده جایلشگن یخلیت اۉزبېکلر یشاوی فاریاب ولایتی بوگون اۉزی‌نینگ عزیز دلبندی استاد محمدعالم کوهکننی قۉلدن بېردی. وطنی، یورتی، تیلی، ملتی، خلقی، فرهنگی، ادبیاتی و اېلینی چین کۉنگیل‌‌دن سېوگن کوهکن امریکه‌ده عالمدن کۉز یومدی. اونینگ قیغولی وفاتی حقیده تیل‌شناس، اتاقلی ژورنالیست، شاعر، یازوچی و محقق دوکتورعزیزالله آرال استاد کوهکن وفاتی باره‌سیده شونده‌ی یازگن « دۉستیمیز محمدعالم کوهکن‌نینگ وفاتی مناسبتی بیلن رحمتلی‌نینگ عایله اعضالری، یقینلری و دوستلریگه چوقور قیغوداشلیک بیلدیره‌من. اللّه مرحومنی اۉز رحمتیگه آلسین، مکانینی جنت قیلسین، روحی شاد، آخرتی آباد و خاطره‌لری منگو یشه‌سین! فرزندلری و یقینلریگه صبر و متانت عطا اېتسین، آمین! یازووچی، شاعر و ژورنالست محمدعالم کوهکن ۱۳۴۱ ییل نینگ بهاریده فاریاب‌ده توغیلگن. اۉرته مکتبنی خواجه سبزپوش تومنی، لیسه‌نی میمنه شهریده تمامله‌گن. ۱۳۶۲ ییلی فاریاب دارالمعلمین اۉقو درگاهینی، ۱۳۹۵ ییلی کابلده “گوهرشاد” بیلیم یورتی حقوق فاکولته‌سینی بیتتیر‌گن. کوهکن، ۱۳۶۱ ییلی “فاریاب” کونده‌لیگی مسوول سکرتری اۉله‌راق ایشگه کیرگن، بیر نېچه ییل “فاریاب” روزنامه‌سی باش محرری، ولایت مدنیت اداره‌سی رئیسی بۉلگن. آزادلیک رادیوسی اۉزبېک ژورنالستی، آیینه تلویزیونی کابل اداره‌سی باشلیغی و آریانا تلویزیونی اۉزبېک بۉلیمی مسوولی صفتیده ایشله‌گن. شعرلری “فاریاب”، “یولدوز”، “بیلگی” و باشقه نشرلرده چاپ اېتیلگن. او ۱۳۷۸ و ۱۳۷۹ ییللری پیشاورده “چاوش” مجله‌سی باش محرری معاونی بۉلگن. ایریم حکایه‌لری “قۉرقینچلی کونلر” ناملی حکایه‌لر تۉپلمیده چاپ قیلینگن. عالم کوهکن، “افغانستان قلم انجمنی”، “توران” اجتماعی و مدنی جمغرمه‌سی، “کتاب مرکزی” جمغرمه‌سی مؤسسلریدن. او اساسی قانون لویه جرگه‌سیده قتنشگن. ذکرالله ایشانچ بیلن بیرگه‌لیکده تألیف اېتگن کتابی – “اۉزبېک ادبیاتی فرهنگی”نی۱۳۹۵ ییلی میمنه‌ده چاپ اېتگن، شعرلری‌نینگ بیرینچی تۉپلمی “افغانستان قلم انجمنی” تامانیدن چاپ قیلینگن. ایککینچ شعری توپلمی «قراکوزلریم» اوتگن ییلی کابلده نشر قیلینگن. کوهکن، دولت تامانیدن “میر مسجدی‌خان”، شونینگدېک قیرغیزستان شاعر-یازووچیلر جماعت اویوشمه‌سی طرفیدن “چنگیز ایتماتوف” کۉکره‌ک مدالی بیلن اعزازلنگن.» استادمحمدعالم کوهکن آغیر بیر کسللیکدن سۉنک کېچه امریکه قۉشمه ایالتلری‌نینگ مساچوست ایالتیده‌گی شفاخانه‌لردن بیریده بودنیا بیلن وداعله‌شیب ابدی کاروانگه قۉشیلدی.
استادمحمدعالم کوهکن وفاتی؛ آرال: کوهکن «میرمسجدی‌خان» کۉکره‌ک مدالی بیلن اعزالنگن اېدی.
