حیاتده شونده‌ی لحظه‌لر بار که، اولر آنگیمیزده مُهرلنیب قاله‌دی. دایمي طرزده ایلنیب توره‌دی-یو، اولرنی هیچ قچان اونوتیب بۉلمه‌یدی. انسان قنچه داوانلردن اۉتمه‌سین، انه شونده‌ی لحظه‌لر تأثیری اۉزینی دایما نمایان قیلیب توره‌دی. بعضاً اېسه انسان‌نینگ کمالات سری اینتیلیشی اوچون اساسي عاملگه ایلنه‌دی.
بعضیده اېسه بو لحظه‌لرنی ایزلب هم تاپیب بۉلمه‌یدی – اولر کوتیلمه‌گنده کېله‌دی. اولرنی امکان توغیلگونچه توتیب قالماق ایستگی آدمنی اۉز-اۉزیگه: «قنی اېدی اۉشه کونلر؟ قنی اېدی اۉشه شیرین خاطره‌لر؟» – دېب سۉره‌شگه مجبور قیله‌دی.
عیناً منه شونده‌ی لحظه‌لر مېنینگ حیاتیمده هم یوز بېردی. اۉشه دقیقه‌لر مېن اوچون جوده مهم اېدی. اونده‌گی صمیمي سۉزلر و شیرین رغبتلر اونوتیلمس درجه‌ده اېدی. بو لحظه‌لرنی هر سفر ایسله‌گنیمده، ایچیمده عجیب بیر فخر تویغوسی پیدا بۉله‌دی. گویا عالم یوره‌گیمگه سیغمه‌ی قاله‌من.
کیم بیلن اوچره‌شگنیم مېن اوچون حیرتلی و اۉزگچه غرورلی اېدی:
- «کیچکینه بۉلسنگ هم یخشی شعرلر ایته آلر اېکنسن-کو!»
- «یۉغ اې، استاذ، بعضاً شونچه که قاره-قاره یازیب قۉیه‌وېره‌من، – دېب اویلدیم.»
- «مجلسده‌گی شعرلرینگ مېنگه معقول کېلدی. یۉلینگ‌نینگ دوامی بۉلیشینی تیله‌یمن!»
- «قنی، ینگیسیدن بارمی؟»
- «هه، بار. – دېب بیرته-ایکّی یازگنلریمنی اۉقیب بېردیم.»
- «جوده زۉر! یشه، باله! کېله‌جگینی یارقین کۉره‌یپمن»
بیر لحظه‌لیک بۉلسه-ده، بو سۉزلر مېن اوچون جوده قدرلی اېدی. اویاتدن اېریب باره‌یاتگن بۉلسم-ده، اۉشنده اۉزیمده غرور هم حس قیله‌یاتگن اېدیم.
مجلس بیر کون آلدین بۉلیب اۉتگندی – «بهاریه شعر کېچه‌سی» اېدی. بو تدبیر میمنه شهری‌نینگ بلدیه بناسی آلدیده‌گی میدانیده اۉتکزیلگن اېدی. مجلس، یقینده تېنگری رحمتیگه قاووشگن استاذ محمد عالم کوهکن باشچیلیگیده، محمد حسن تۉلقین و جمال ناصر فرهمند یاردمچیلیگیده تشکیل اېتیلگن اېدی.
احتمال بو ۱۳۸۸- ییل بهار آیلریدن بیری اېدی. مېن سکّیزینچی صنفنی اېندی باشله‌گن اېدیم.
اۉشنده باشقه یاش شاعرلر قطاری مېن هم شعرلریمدن بیر-ایکّی پرچه اۉقیگن اېدیم. استاذ کوهکن و باشقه استاذلر بیزنی تینگلب تورر، رغبتلنتیرر اېدی.
استاذ اۉشنده مېنینگ شعرلریمنی یاقتیریب قالیب، محمد حسن تۉلقین آرقه‌لی مېنی تاپیب، اۉزلری بیلن تنیشتیریشنی بویورگن اېکنلر.
اوچره‌شووده جمال ناصر فرهمند و مېنگه تاغه بۉلگن محمد حسن تۉلقین‌نینگ رحمتلی آته‌سی هم بار اېدی. استادنینگ مېنگه قره‌ته ایتگن سۉزلریدن نه‌فقط مېن، بلکه اطرافیمده‌گیلر هم قووانیب، اولر هم مېنگه رغبتلی سۉزلر ایته باشله‌دیلر.
او سۉزلرنینگ نې چاغلیک کوچلی اېکنینی اېندی انگله‌یپمن. ایتیلیشی جوده عادي بۉلسه-ده، تأثیری نهایتده کوچلی بۉلگن انه شونده‌ی سۉزلر و رغبتلر مېنی منه شو یېرگچه یېتکلب کېلدی. حیات یۉلیمنی چیزیب بېریشده کتّه یاردم بېردی.
اېندی بۉلسه، اۉشه آنلرنی ساغینیب یوره‌گیم اۉرتنه‌دی. سۉزنینگ کوچینی اېندی انگله‌ماقده‌من.
