پروفیسور غلام محمد میمنه‌گی معاصر هنرچیلیک مکتبی‌نینگ اساسچی‌سی
غلام محمد میمنه‌گی نامیده‌گی افغان عنعنوي صنعتلرینی اۉقیتیش مکتبی اۉز اساسلرینی 1930- ییلده غلام محمد مصور میمنه‌گي تامانیدن کابل‌ده آچیلگن صنعت مکتبیدن آله‌دی. بو مکتب افغانلرگه غرب صنعتی اسلوبلرینی تنیشتیریش و افغان هنرمندچیلیگی‌نینگ یوقاری صفتینی سقلب قالیش مقصدیده تشکیل اېتیلگن اېدی. بو مؤسسه فعالیتی 1955ییلده عبدالغفور برشنا (1907–1974) رهبرلیگیده تصویري صنعت کالجی تشکیل اېتیلیشیگه زمینه یره‌تدی. برشنا مشهور بسته‌کار، رسّام، دراما‌تور و افغانستان ملي مدحیه‌سی‌نینگ مؤلفی اېدی. کېینچه‌لیک کالج غلام محمد میمنه‌گي نامی بیلن اته‌لدی، چونکه او صنعت و مدنیتنی رواجلنتیریش یۉلیده کتّه حصّه قۉشگن اېدی.
مکتبده میناتور رسّامچیلیگی، خطاطلیک، یاغاچ اۉیمه‌کارلیگی، رسّامچیلیک، هیکلتراشلیک، کشته تیکیش و زرگرلیک صنعتلری اۉرگه‌تیله باشله‌گن اېدی. هر کیم بو یېرده افغان اۉقیتووچیلریدن صنعتنی اۉرگنیشی ممکن اېدی. حتا 7 یاشدن باشلب باله‌لر هفته‌سیگه 3 کون، هر کونی 2 ساعت تحصیل آلیشگن اېدی. اولر چیزمه‌چیلیک و یاغلی رنگ بیلن ایشلشنی 3 ییل دوامیده اۉرگنه‌دیلر. مکتبنی موفقیت بیلن تمامله‌گن اۉقووچیلرگه سرتفیکیت هم بېریلگن اېدی. لېکن، افسوس کی، بو یېرده صنعت تاریخی یاکه نظریه‌سی درسلری موجود اېمس. شو سببلی، کۉپ اقتدارلی طلبه‌لر بیلیم یورتی نینگ تصویري صنعت فاکولته‌سیگه اۉتیش اوچون ضرور بۉلگن کانکور امتحانلریدن اۉته آلمه‌یدیلر.
موادلرینی اۉزی بیلن آلیب کېلگن اۉقووچیلرگه کیچیک نمایشگاه‌لرده اۉز ایشلرینی ساتیشگه رخصت بېریله‌دی. درسلر دوامیده اۉقووچیلر فوتوصور‌ت یاکه طبیعتدن کۉچیرمه چیزه‌دیلر. مکتبده کیچیک ستدیو و کۉرگزمه میدانی موجود بۉلیب، او یېرده یاغلی رنگ، سوولی رنگ، افغان میناتور صنعتی، کشته دۉزلیک و هیکلتراشلیک اثرلری نمایش اېتیله‌دی.
طالبان دوریده هم مکتبده خطاطلیک و منظره چیزیش درسلری دوام اېتگن، لېکن حیوانلر یا که انسانلرنی تصویرلش منع اېدی. اۉقیتووچیلر درس بېریشده احتیاطکار بۉلیشگن و یشیرینچی ایشلشگن، چونکه عکس حالده جزاگه تارتیلیشلری ممکن اېدی.
