ناهید؛ بیتمه‌گن آرزولر ایچره اۉلگن باله‌لیک
تانگ حلی یاریلمه‌گن، آسمان اوزره قاره بولوتلر سېکین حرکتلنر، خودّی یوره‌کده‌گی آغیر خَیاللر کبی.
تخار ولایتی‌نینگ غریب قیشلاقلریدن بیریده، اده‌شگن تقدیرلر اۉرته‌سیده، توپراقلی بیر اویده، بیر قیزه‌لاق دنیاگه کېلدی. اسمینی ناهید قۉییشدی، یولدوز نوری دېگن معناده. بلکه آته-آنه‌سی ایسته‌گن. بو قیز اولر اوچون امید نوری بۉلسین دېب. بیراق بو دنیا ناهید اوچون نورلی اېمس بلکه قاره تون دېک قرانغولیکلر اونی کۉتردی.
او گۉیا بهارنینگ اېلک نوده‌لریگه اۉخشر اېدی نازک، بې‌غبار، بیر باله‌لیک بیلن یشر، هنوز مکتب یۉلیده‌گی کاغذ هیدی، دفتری‌نینگ سرغیگن صحیفه‌لری رنگ – برنگ خودکار قلملر حقیده آرزو قیلردی. اما بو آرزولرنی آسمان اۉرته‌سیدن ییرتیلگن قاره بولوتلر، عرف-عادتلر، مجبوريتلر و زۉرآورلیکلر بۉغیب قۉیدی.
ناهید، تخارنینگ اوزاق قشلاقلردن بیریگه توغیلگن اېدی. کمبغل عایله‌ده اۉسگن بو قیزچه‌‌ده حیات کۉزگه کۉرینمس، یوره‌ککه اوریله‌دیگن گۉزللیک بار اېدی. او اوزون بۉیلی، خیمچه بېللی، سېرجلا ساچلی، بې‌غبار نگاه‌لی، باقیشلری اېسه… گۉیاکه سۉزسیز شعر ایتر، ساکن اۉقیله‌دیگن سطرلر کبی اېدی. اما بو دنیاده گۉزللیک بختنی کفالتله‌یالمیدی.
او‌نشتیریلگن آرزولر
او حلی بلاغتگه یېتمسیدن ، 14یاشنی تۉلدیرگن اېمسدی بیر کون آنه‌سی اونی یانیگه چقیردی. کۉزلریده خواطر بار، لېکن آهنگیده قطعیت بار اېدی.
ناهیدجان، بو دنیاده قیز باله اېرنی کۉرمسدن اولغیالمیدی. نصیب قیلسه، بیز سېنی قۉشنی نینگ اۉغلیگه اونشتیره‌میز. ناهید هېچ نرسه دېمه‌دی. او «اونشتیریش» نیمه‌نی انگله‌تیشینی توشونمسدی. یوره‌گی فقط دفتریگه چیزگن گُللرنی ساغینردی. اۉشه کونی او قاغاذیگه هېچ نرسه چیزمدی.
آته – آنه‌سی اونی قۉشنی‌نینگ اۉغلیگه اونشتیریب قۉیدی. بو اۉغیل بدخشان‌دن کۉچیب کېلگن بیر عایله‌‌نینگ فرزندی اېدی. او ملي اوردوده قومندان بۉلیب خدمت قیلردی. ناهید اېسه هنوز باله‌لیک غروریده یشردی نامزاد نیمه، عایله نیمه، محبت نیمه بولر نینگ هېچ بیرینی توشونمس اېدی.
اما اونینگ یوره‌گیده اۉز دنیاسی بار اېدی: مکتبده‌گی بیرینچی اۉقیتووچیسی، صنفده اېنگ یخشی یازگن انشا، دۉستلری بیلن گُل تېرگن کونلر و آنه‌سی نینگ قاوورگن نان هیدی. اونینگ دنیاسی شولر اېدی. او حلی «هه» یاکه «یۉق» دېیه آلمس، حیات‌نینگ آغیر سواللریگه جواب بېره آلمس اېدی چونکه اونینگ آغزیدن حلی سوت هیدی کېلر اېدی-کو…
اۉیلگن ساوغه‌لر، یالغان مِهر
نامزادلیگیدن آلتی آی اۉتگچ، ییگیت‌نینگ عایله‌سی ناهیدگه بیر دانه تېلفون و یازگی کییم یوباردی. ناهید اېسه ایلک بار اۉشه آیدن نامزادی بیلن گپلشه باشله‌دی. بیراق بو علاقه‌ده مِهر، اعتبار، ایلیقلیک یۉق اېدی فقط «سلام»، «قنده‌یسن» دېگن ساووق، معناسیز سۉزلر.
کونلرنینگ بیریده ناهید دوگانه‌لری بیلن اۉتیرگن اېدی. هر بیری اۉز نامزادی حقیده فخر بیلن گپیرر، کیمدیر آلتین اوزوک، ینه بیری اېسه تورکيه‌دن یوباریلگن ساوغه‌لرنی کۉرستر اېدی. باشقه‌سی: مېنگه اینترنیت تېلفون آلیب بېرگن، تیکتاک آچیب بېرگن! ناهید اېسه ایچ-ایچیدن اېزیلر، سۉزسیز جیم بۉلر اېدی.
«آصفه» اسملی دوگانه‌سی: ناهید، سېنینگ نامزادینگ سېنگه نیمه بېردی؟ دېب سۉره‌دی. ناهید اېسه قیسقه جیملیکدن سۉنگ قولاغیده‌گی سیرغه‌نی کۉرستیب جیلمه‌یدی: منه شو سرغه‌نی نامزادیم بېرگن. چیرایلی اېمسمی؟ دېدی.
بیراق بو سیرغه اصلیده اونینگ آنه‌سی نعنا و پالک ساتیب ییغگن پوللریگه آلیب بېرگن، عادي بیر سیرغه اېدی. ناهید بو یالغان ایچره اۉزینی آووتردی، بلکه باشقه‌لر آلدیده شرمنده بۉلیشدن قۉرقردی. بلکه… یوره‌گیده اۉزینی ارزیمیدیگن دېب اۉیلردی.
اۉلیم و ایکّینچی اونشتیریش
ییللر اۉتدی. ناهید حلی هم نامزادینی سېومسدی، اونی کوتمسدی، فقط تقدیریگه کۉنگن اېدی. نامزادی اونگه هېچ قنده‌ی روحي یاکه مادّي اعتبار بېرمه‌دی. تقدیر اېسه ینه اۉز شفقتسیزلیگینی کۉرستدی. بیر کونی قویاش جزیره‌مه‌سیده ییگیت‌نینگ شهید بۉلگن خبری کېلدی. جسد اوچ کوند‌ن سۉنگ اویگه کېلتیریلدی. قیشلاق‌نینگ بیرجیملیک باسگندی فقط آنه کۉز یاشی، آته سکوتی، ناهیدنینگ اېسه ایچکی بۉغیلیشی بار اېدی. اونینگ جسدی اېسه قیشلاق قبرستانیگه دفن قیلیندی. ناهید اېندی‌چگینه اۉزیگه کېله‌یاتگن اېدی براق قسمت اونی ینه یۉلینی تۉسدی.
نامزادی‌نینگ وفاتیدن 40 کون اۉتمه‌ی، عایله‌سی اونی مرحوم ییگیت‌نینگ اوکه‌سیگه اونشتیریب قۉیدی. بو باله اېندی 17 یاشده اېدی. ناهیدنینگ راضیلیگی سۉره‌‌لمه‌دی. بو اونشتیریش مِهريه (تۉی پولی)نی یۉقاتمسلیک اوچون قیلینگن اېدی. سېوگی اېمس، شرطنامه اېدی بو. کۉز یاش اېمس، حساب-کتاب.
بیر ییل اۉتیب، تۉی قیلیشدی. طالبان ینه حاکمیتگه قَیتگندی. آوازلر سۉنیب، عیاللر نینگ نفسی تاره‌یگن اېدی. ناهید بو دنیاگه قرشی چیقیشگه کوچ تاپه آلمه‌دی. او چرچه‌گن اېدی.
آنه بۉلیش آغریغی؛ حیاتدن واز کېچیش
تۉی ثمره‌سیده ناهید اۉغیل فرزندلی بۉلدی. ییللر اۉتدی، اما حیات اونگه بری‌بیر کولیب قره‌مه‌دی. حامله‌دارلیک‌نینگ سۉنگّی آیلریده ناهید مطلقا اۉزگریب قالدی ، ییغینلرگه قتنشمس، هېچ کیم بیلن گپلشمس، یوره‌گی بیرغم بیلن قاپلنگن اېدی. تنه‌سی اېسه کون سایین ضعیفلشدی، روحی خیره‌لشدی.
تالقانگه آلیب باریلگنیده، داکترلر اونگه قاره – سریق (زردی) تشخیسینی قۉیدی. جوده کېچ بۉلگندی. ناهید کسلخانه‌گه یاتقیزیلدی، اما خرجتلر سبب قَیناته‌سی اونی اویگه آلیب کېتدی.
و نهایت، اۉشه کېچه، تون ساعت 9 لرده توغیش آغریغی باشلندی. قۉشنیلر، آنه‌سی یوگوریب کېلیشدی. کلینیکگه یېتکزیلگچ، ناهید قتّيق عذابلر ایچره بیر قیز فرزندنی دنیاگه کېلتیردی. اما اۉزی کوچلی قان‌سیره‌ب وفات اېتدی.
اېرته‌لب، مسجد مناره‌سیدن جنازه اعلانی ینگره‌دی. قیشلاق جیم بۉلیب قالدی.
ناهید دنیانی ترک اېتدی. او باله‌لیگینی یشه آلمه‌سدن، یوره‌گیده‌گی آرزولرنی هېچ کیمگه ایتالمسدن، سېوگینی حس قیلمسدن، اېرکینلیکنی توشونمسدن کېتدی. او بو یالغان دنیاگه اۉخشش بیر قیزنی قیزیقیشلری، آرزولری، بې‌غبار نگاه‌لری بۉلگن ینه بیرقیزه‌لاقنی قالدیریب کېتدی.
اېندی بو دنیا ینه بیر گودک آرزولرینی یېب قۉییشگه تیار…
ایضاح:
بو حکایه افغانستانلیک اۉزبېک وعموماً برچه مسلمان جمعیتلریده حلیگچه دوام اېته‌یاتگن باله‌لر نکاحی، مجبوري اونشتیریش، عیاللر حقوقلری‌نینگ پایمال قیلینیشی، و ساغلیقنی سقلش تیزیمی‌نینگ ضعیفلیگی حقیده سیگنال دیر. ناهید بو فقط بیر اسم اېمس، بو مینگلب بېچاره قیزلرنینگ کۉز یاشیده آقه‌یاتگن حقیقتی دیر.
