بلخ ولایتی‌نینگ مرکزی مزارشریف شهریده، بوگون یکشنبه ۲۳ – سنبله طالبان و اۉزبېکستان رسمی‌لری اشتراکیده اۉتکزیلگن بیر احتفال آرقه‌لی، طوطی میدان کانی‌دن گاز ایشلب چیقاریش جریانی باشلندی.
طالبان اوشبو کان‌دن گاز ایشلب چیقاریش جریانی باشلنیشی بیلن، کۉپلب کیشی‌لرگه ایش زمینه‌لری یره‌تیلیشی و افغانستان‌دن گاز صادر اېتیلیشینی معلوم قیلدی.
دیمک طالبان رسمی بیر کېلیشوو آرقه‌لی بو کان‌نی قازیش و گاز ایشلب چیقاریش ایشلرینی اۉزبېکستان‌نینگ «ایریل‌کام» کمپنیه‌سیگه تاپشیرگن.
نشر اېتیلگن معلومات‌لرگه کۉره، اۉزبېکستان‌لیک بو کمپنیه طوطی میدان گاز کانی اوستیده بیر میلیارد دالرگه قدر سرمایه یاتقیزه‌دی.
شونینگدېک طالبان بو کان‌نی ایشلب چیقاریش جریانی باشلنیشی‌دن کېین ایکی ییل ایچیده، ۱۰۰ میگاوات برق هم ایشلب چیقاریلیشینی معلوم قیلگن اېدی.
ایتیش کېره‌ک که طالبان سونگی تۉرت ییل جریانیده، افغانستان کانلری اینقسه تورکستان و قطغن کانلرینی ایشلب چیقاریش‌نی جدی‌لشتیرگن. بیراق بو کانلردن قۉلگه کېلگن عاید اهالی اقتصادی احوالی یخشی‌لنیشی اوچون صرف‌لنمه‌گنی تنقیدلرگه سبب بۉلماقده دیر.
