امریکا قوشمه ایالتلرینینگ جمهور باشلیغی دونالد ترامپ ادعا قیلیشیچه، افغانستان هلی هم مخدره مادهلر ایشلب چیقاریلیشی و قاچاق اېتیلیشی منبعلریدن بیری دیر.
بو حقده نشر اېتیلگن خبرلرگه کۉره، امریکا جمهور باشلیغی بو مملکت نمایندهلر کېنگشی یا ده «کانگرس»ده یازگن حساباتیده، اوشبو مسالهنی بیان قیلگن.
ترامپنینگ تاکیدلشیچه، افغانستانده موجود مخدره مادهلر ذخیرهلری و اولرنینگ دایمی ایشلب چیقاریلیشی قاچاق اوچون زمینه یرهتگن و بوندن طالبان ایریم اعضالری عاید قۉلگه کېلتیرهدی.
شونینگدېک امریکا جمهور باشلیغی، افغانستانده صناعتی مخدره ماده ایشلب چیقاریلیشی و قاچاق اېتیلیشی هم کۉپهیگنینی معلوم قیلدی.
ایتیش کېرهک که طالبان حاکمیتگه قیتگنیدن کېین، افغانستانده مخدره مادهلر ایشلب چیقاریلیشی، استعمال اېتیلیشی و قاچاق بۉلیشینی تقیقلگن. بیراق شوندی بۉلسه هم بو مساله خصوصیدهگی خواطرلر هلی هم موجود دیر.
