آلمان تېرمه جماعه‌سی صفیده 2014 ییلگی برازیلده بۉلیب اۉتگن جهان قهرمانلیگیده غالب بۉلگن، 37 یاشلی جیرام باتېنگ پروفیشنل فوتبالچیلیک فعالیتی یکونله‌دی. حمایه‌چی بو حقده اجتماعي ترماقده خبر بېریب، اېسده قالرلی لحظه‌لر عکس اېتگن ویدیونی جایلشتیردی.
«عایله، دۉستلر، مخلصلر، وقت کېلدی»، دېب یازه‌دی باتېنگ اجتماعي ترماقلرده‌گی خیرلشوو پُستیده.
باتېنگ 2006 ییلدن بېری مرکزي حمایه‌چی صفتیده پروفیشنل فوتبالده تۉپ سوردی. فعالیتی‌نینگ اساسي قِسمینی «بوريه»ده اۉتکزیب، 2011-2021 ییللرده 364 ته اۉیین اۉتکزدی و 10 ته گول اوردی. میونخېن کلوپی بیلن او تۉقّیز مرته بوندېسلیگه قهرمانی بۉلدی، ایکّی مرته قهرمانلر لیگه‌سیده (2013، 2020) غلبه قازاندی و جمعی 25 ته ساورین قۉلگه کیریتدی.
شونینگدېک، باتېنگ «گېرته»، «گمبورگ»، «لیون»، «سَلېرنیت‌نه» و اوستريه نینگ «لسک» کلوپلریده هم تۉپ سورگن. سۉنگّی جماعه‌سی «لسک» بۉلیب، او بیلن بیر موسم اۉینه‌گنیدن سۉنگ 2025 ییل اگستیده کلوپدن کېتگن اېدی.
جرمني تېرمه جماعه‌سی صفیده باتېنگ 76 ته اۉیین اۉتکزگن. 2014 ییلگی برازیلده اۉتکزیلگن جهان قهرمانلیگیده تېرمه جماعه‌سی بیلن موند‌ل غالبی بۉلدی.
اېسله‌تیب اۉته‌میز، 2018 ییلگی جهان قهرمانلیگی غالبی سمیوېل اومتیتی هم یقینده فوتبالچیلیک فعالیتینی یکونله‌گنینی اعلان قیلگن اېدی.
منو
