بیرلشکن ملتلر تشکیلاتی‌ده افغانستان‌گه عاید بو تشکیلات‌نینگ «موزاییک ریجه‌سی» خصوصیده، بیر ییغین اۉتکزیلیب، اشتراکچی فعاللر خودی شو موضوع حقیده فکر المشتیردی‌لر.
اوشبو ییغین‌ده، فعال اۉزبېک قیزلردن نازیلا علمی هم اشتراک اېتیب، نطق سۉزله‌دی.
نازیلا علمی‌نینگ بو ییرده بیان قیلگن نطق‌لری کۉپینچه، افغانستان کېله‌جگیده یاشلر اۉرنی‌گه قره‌تیلگن بۉلیب، خانم علمی افغانستان کېله‌جگی اوچون هر قنده‌ی بیر ریجه‌ده یاشلر اۉرنی اعتبارگه آلینیشی کېره‌ک دېب بیلدیرگن.
نازیلا علمی اۉز صحبت‌لری‌نینگ بیر بۉلیمی‌ده ایتیشیچه “افغانستان‌ده تینچ‌لیک جریانلری برقرار اېتیلیشی اوچون یاشلر فقط کۉزه‌تووچی اېمس، بلکه بو خصوصده قرار قبول قیلیش جریان‌لرده فعال اشتراک اېتیش‌لری کېره‌ک دیر.”
شونینگدېک نازیلا علمی، افغانستان تورلی حدودلریدن بۉلگن یاشلر بیلن اۉتکزگن صحبت‌لری خلاصه‌سیدن اېسلب، اولر ایرکین‌لیک، تعلیم و عدالت اوچون اینتیلیش‌لرینی تاکیدلگن حالده، تینچ‌لیک جریان‌لریده چیت‌ده قالیب کېلگنلریدن خواطر بیلدیرگنلرینی معلوم قیلدی.
ایتیش کېره‌ک که بیرلشکن ملتلر تشکیلاتی، افغانستان قیته خلق‌ارا هم‌جمعیتی‌گه قوشیلیشی اوچون «موزاییک ریجه‌سی»نی تکلیف قیلگن. اوشبو ریجه اونگه بۉلگن قرشی‌لیکلر سبب حاضرگچه بوتونله‌ی عملگه آشیریلگن اېمس.
