مصرنینگ قاهره شهریده‌گی الازهر بیلیم یورتی‌نینگ عربچه تیل و ادبیاتی بۉلیمی‌دن ماسترلیک درجه‌سینی بیتیرگن عبدالرب نسیمی، اۉزی‌نینگ تیزس‌نی «امیرعلیشیر نوایی و اونینگ سلطان حسین بایقرا حکومتی‌ده سیاسی رولی» حقیده تیارلب، حمایه قیلدی.
جناب نسیمی اۉزبېک تی‌وی بیلن بۉلگن صحبتیده، بو حقده معلومات بېریب اوشبو تدقیق‌ده تاریخ‌میز و مدنیت‌میزنینگ بو ییریک سیماسی حقیده تۉلیق تدقیقات بجرگنینی معلوم قیله‌دی.
نسیمی‌گه کۉره، تیزس عنوانی حضرت امیرالکلام میرعلیشیر نوایی‌نینگ حیاتی همده سیاسی حصه‌سی حقیده قره‌تیلگن بۉلیب، بو تدقیق‌ده بو ییریک سیمانینگ اداری و عمرانی فعالیت‌لری همده باشقه خلق‌لرگه نسبتن بۉلگن یانده‌شووی هم یخشی‌لب آچیق‌لنگن.
نوایی حقیده‌گی تدقیق‌نی حمایه قیلیب، ماسترلیک درجه‌سینی بیتیرگن عبدالرب نسیمی، تیموری‌لر حکومتی اینقسه سلطان حسین بایقرا دوریده، حضرت نوایی‌نینگ رولی تورلی ساحه‌لرده کوچلی بۉلگنینی تاکیدله‌یدی.
دیمک مذکور تیزس عنوانی عبدالرب نسیمی تامانیدن، مصر و سعودی عربستان مملکتلری‌دن بۉلگن تانیقلی بیلیم یورتی اۉقیتووچیلری حضوریده، حمایه اېتیلگن.
الازهر کبی تانیقلی و اعتبارلی بیلیم یورتی‌ده نوایی حقیده تدقیقات بجریلیشی، تیلی‌میز و مدنیت‌میزنینگ بو ییریک سیماسی و ایجادلرینی اوزگه خلق‌لرگه تانیتیش اوچون اونملی آدیم دیر.
ایتیش کېره‌ک که سلطان حسین بایقرا دوری‌نینگ وزیری بۉلمیش حضرت نوایی، اۉزیدن قالدیرگن میراث‌لری باعث، تیموری‌لرنینگ پارلاق سیمالریدن بیری تانیله‌دی.
